စစ်ကိုင်းတိုင်း ဟုမ္မလင်းမြို့နယ်တွင် ဧပြီ ၂၈ရက်မှ လက်ရှိအချိန်ထိ တိုက်ပွဲများဖြစ်ပွားနေပြီး စစ်ရေးအရှိန်မြင့်နေဆဲဖြစ်ကြောင်း ဟုမ္မလင်း မြို့နယ် ပြည်သူ့ကာကွယ်ရေးတပ်ဖွဲ့(HPDF)က ယနေ့ မွန်းလွဲပိုင်း၌ ထုတ်ပြန်သည်။
“မနက်ကတစ်နေရာချ(စစ်ကောင်စီတပ်ကိုတိုက်ခိုက်)တယ်။
ကိုယ့်ဘက်က အောင်မြင်တယ်။ ဒီနေ့ခင်းလည်း နောက်တနေရာ ထပ်ချတယ်။ အခု လေကြောင်းကနေလာနေတယ်လို့ ကြားတယ်။ ဒီလို အခြေအနေမှာ ပြည်သူတွေ အန္တရာယ်မကြုံရအောင် သတိပေးချက်ထုတ်ပြန်တာပါ”ဟု ပြည်သူ့ကာကွယ်ရေးတပ်ဖွဲ့ဝင်တတစ်ဦးကPeople’s Spring သို့ပြောသည်။
ထို့ကြောင့် ပြည်သူများအနေဖြင့် အာဏာသိမ်းအကြမ်းဖက် စစ်တပ်နှင့် အခြားလက်နက်ကိုင်အဖွဲ့များ တပ်ထိုင်သောနေရာများ၊ လုံခြုံရေးကင်းထိုးသော နေရာများမှ ဝေးဝေးရှောင်ရန် မေတ္တာရှေ့ထား အထူးသတိပေးကြောင်း ဖော်ပြထားသည်။
ဟုမ္မလင်းမြို့နယ် တောင်ဦးရွာနှင့် တောင်ဘို့လှရွာရှိ စစ်ကောင်စီနှင့် ရှမ်းနီတပ်ဖွဲ့(SNA) ပူးပေါင်း စခန်းကို ယနေ့ မေလ ၄ရက်တွင် ကချင်လွတ်လပ်ရေးတပ်မတော်(KIA)နှင့် ဒေသခံ PDF ပူးပေါင်းတပ်က တိုက်ခိုက်သိမ်းပိုက်ခဲ့ ကြောင်း ဒေသခံသတင်းရင်းမြစ်က ပြောကြားသည်။ အဆိုပါ စခန်းသိမ်းတိုက်ပွဲနှင့်ပတ်သက်ပြီး HPDF၏ ထုတ်ပြန်ချက်တွင် သီးခြားဖော်ပြထားမှုမရှိဘဲ စစ်ရေးအရှိန်မြင့်နေကြောင်းသာ သတိပေးထားသည်။
ဟုမ္မလင်းနယ်တွင် ဧပြီ ၂၈ရက်က ပြည်သူ့ကာကွယ်ရေး ပူးပေါင်းအဖွဲ့က ဟုမ္မလင်း-ဖောင်းပြင် နယ်စပ်ရွာများကို စစ်ကြောင်းထိုး နယ်မြေရှင်းလင်းစဉ် ကင်းပတ်လာသည့် ပျူစောထီးနှင့် ဌာနေပြည်သူ့စစ် တို့နှင့် တိုက်ပွဲဖြစ်ပွားရာ စစ်ကောင်စီလက်ပါးစေ ပျူနှင့် ပြည်သူ့စစ်ဘက်က ၁၀ဦးခန့် သေဆုံးကာ လက်နက် ၇လက် သိမ်းဆည်းရရှိခဲ့သည်ဟု PDFက အသိပေးထုတ်ပြန်ထားသည်။
