စစ်ကိုင်းတိုင်း၊ မုံရွာမြို့နယ်တွင် ရိက္ခာသွားယူသည့် ပျူစောထီးခေါင်းဆောင်တစ်ဦး အသတ်ခံရကြောင်း ဒေသတွင်းသတင်းရင်းမြစ်များက ပြောသည်။
ယမန်နေ့ (မေလ ၃ရက်) နေ့လည် ၁၂ နာရီခန့်က တောပုကျေးရွာမှ ပျူစောထီးခေါင်းဆောင်ပိုင်းတွင်ပါဝင်သူ ကိုမိုးဝင်းဆိုသူသည် ရိက္ခာထွက်ယူချိန် ၎င်းအားဖမ်းဆီးရန်ကြိုးစားရာ လက်ပစ်ဗုံးနှစ်လုံးဖြင့် ပြန်လည်ပစ်ခတ်ခဲ့၍ နေရာတွင်ပင် ပစ်ခတ်ခဲ့ရကြောင်း Monywa Ninja Team၏ ခေါင်းဆောင် ကိုဂျစ်တူးက ပြောသည်။
အဆိုပါ မိုးဝင်းဆိုသူသည် တောပုရွာအတွက် ရိက္ခာများ သယ်ဆောင်ပေးသူ၊ ထောင်ထားသော မိုင်းနေရာများအား ဖော်ထုက်သူ၊ PDF စခန်းနေရာများအား လိုက်လံပြသနေသူဖြစ်၍ ရှင်းလင်းရခြင်းဖြစ်ကြောင်း Monywa Ninja Team အဖွဲ့က ပြောသည်။
“လာတာတော့ တစ်ယောက်ထဲဗျ။ ရိက္ခာထွက်ယူတဲ့အချိန် သတင်းအတိကျရတာနဲ့ ကျွန်တော်တို့ လေးနေရာခွဲ စောင့်ဆိုင်းနေခဲ့တာ။ ရှင်းလင်းတဲ့ နေရာကတော့ သူတို့ပျူရွာအဝင် တောင်ပုံ ကျေးရွာအထွက်မှာ ရှင်းလင်းခဲ့တာပါ။”ဟု Monywa Ninja Team၏ ခေါင်းဆောင် ကိုဂျစ်တူးက ပြောသည်။
ထို့အပြင် ၎င်း၏ဖုန်းထဲတွင် ရန်သူမမြင်နိုင်သောဂါထာ၊ ကျည်ကွင်းဂါထာ၊ မိုင်းကွင်းဂါထာများအား ဖုန်းကင်မရာဖြင့်ရိုက်ယူထားသည့် ဓာတ်ပုံတစ်ပုံကိုလည်း တွေ့ရှိရကြောင်း ကိုဂျစ်တူးက ပြောသည်။
ယင်းလုပ်ဆောင်မှုကို Monywa Ninja Team နှင့် မဟာမိက် Royal God people defense force တို့က ပူးပေါင်းခြင်းဖြစ်ကြောင်း အသိပေးထားသည်။
တောပုရွာသည် မုံရွာနယ်၌ ပျူစောထီးကြီးစိုးရာ ရွာတစ်ရွာဖြစ်ပြီး တော်လှန်ရေးအင်အားစုများအား မကြာခဏဖမ်းဆီးနှိပ်စက် သတ်ဖြတ်ခြင်း၊ စစ်အုပ်စုနှင့်ပေါင်း၍ ကျေးရွာများအား စစ်ကြောင်းထိုးသတ်ဖြတ်ခြင်းများ ပြုလုပ်နေသည်။
