စစ်ကိုင်းတိုင်း၊ ကန့်ဘလူမြို့နယ်တွင် မုန်တိုင်းတိုက်အပြီး စစ်ကောင်စီတပ်က စစ်ကြောင်းပြန်ထိုးနေ၍ ကျေးရွာအများအပြားမှ ဒေသခံထောင်နှင့်ချီ ထွက်ပြေးတိမ်းရှောင်နေရကြောင်း သတင်းရရှိသည်။
ယနေ့(မေလ ၁၇ရက်) နံနက်ပိုင်းတွင် ကန့်ဘလူမြို့နယ်တောင်ခြမ်း ထန်းကုန်းတိုက်နယ်အား စစ်ကောင်စီ၏ ခမရ (၃၆၁) ၊ ခမရ (၃၆၈)နှင့် နယ်မြေခံပျူစောထီး အင်အား ၃၀၀ ကျော်က စစ်ကြောင်း လေးကြောင်းခုဖြင့် စစ်ကြောင်းထိုး ဝင်ရောက်နေခြင်းဖြစ်ကြောင်း ဒေသတွင်းသတင်းရင်းမြစ်များက ပြောသည်။
ထိုသို့ စစ်ကြောင်းထိုးမှုကြောင့် ထန်းကုန်းတိုက်နယ်ရှိ ကျေးရွာ (၁၉) ရွာမှ ဒေသခံပြည်သူပေါင်း သုံးသောင်းကျော် ထွက်ပြေးတိမ်းရှောင်နေရကြောင်း ဒေသတွင်း ဒေသတွင်း သတင်းအချက်အလက်များ ဖော်ပြပေးနေသော Infinity Group က အသိပေးသည်။
စစ်ကြောင်းတစ်ကြောင်းမှာ ထန်းကုန်းတိုက်နယ်ရှိ ဉာဏ်အင်းကျေးရွာအား မီးရှို့ဖျက်ဆီးနေကြောင်း သိရသည်။
“ထန်းကုန်းတိုက်နယ်မှာ အခုစစ်ကြောင်းထိုးလို့ထပ်ပြေးနေရတယ်။”ဟု ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့ဝင်တစ်ဦးက ပြောသည်။
ကန့်ဘလူခရိုင်၌ လက်ရှိတွင် စစ်ရှောင်ပြည်သူ ငါးသောင်းကျော်အထိ မြင့်တက်လာပြီး တိမ်းရှောင်ရသည့်ကျေးရွာပေါင်း ၂၄ ရွာထက်မနည်းရှိလာကာ စစ်ရှောင်များအတွက် စားနပ်ရိက္ခာ၊ အမိုးအကာနှင့် အခြေခံသုံးဆေးဝါးများ၊ မြွေဆိပ်ဖြေဆေးများ လိုအပ်နေကြောင်း ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ -ကန့်ဘလူခရိုင်က ပြောသည်။
