ဆိုင်ကလုန်း မုန်တိုင်းဖြတ်သန်းသွားတဲ့လမ်းကြောင်းက လူဦးရေ ၅ သန်းကျော် မုန်တိုင်းဒဏ်သင့်ခဲ့တယ်လို့ ကုလသမဂ္ဂလူသားချင်းစာနာမှုဆိုင်ရာညှိနှိုင်းရေးရုံး(UNOCHA) က ပြောဆိုလိုက်ပါတယ်။
မုန်တိုင်းဖြတ်သန်းသွားတဲ့ ရခိုင်ပြည်နယ်နဲ့ မြန်မာနိုင်ငံအနောက်မြောက်ပိုင်းက ဒေသတွေက သဘာဝဘေးဒဏ် ထိခိုက်ခံစားရသူဦးရေကို UNOCHA က ခန့်မှန်းတွက်ချက်ထားတာပါ။
အဲဒီလူဦးရေ ၅ သန်းကျော်ထဲမှာ ၃.၂ သန်းဟာ လူသားချင်းစာနာထောက်ထားမှုအရေးပေါ် အကူအညီတွေလိုအပ်နေတယ်လို့လည်းဆိုပါတယ်။
မကွေးတိုင်းနဲ့စစ်ကိုင်းတိုင်းမှာလည်း လူဦးရေ ၁သိန်းကျော်လောက် ဆိုးရွားတဲ့ ရေကြီးမှုဒဏ် ခံခဲ့ရတယ်လို့ UNOCHA က ပြောပါတယ်။
လက်ရှိမှာတော့ မုန်တိုင်းကြောင့် ထိခိုက်ပျက်စီးသွားတဲ့ ရခိုင်ပြည်နယ်မြောက်ပိုင်းက စစ်တွေ၊ ပေါက်တော၊ ရသေ့တောင်၊ မောင်တော၊ ပုဏ္ဏားကျွန်း၊ ကျောက်တော်တို့မှာအရေးပေါ်ကူညီထောက်ပံ့မှုတွေ ဆောင်ရွက်ပေးဖို့ စာရင်းစတင်ကောက်ယူနေတယ်လို့ UNOCHA ဘက်က ပြောထားပါတယ်။
မြေပြင်သတင်းတွေအရ စစ်ကိုင်းနဲ့ မကွေးတိုင်းဘက်မှာ ရေကြီးရေလျှံမှုတွေဖြစ်ပြီး ရွာတွေ နဲ့ လယ်ကွင်းတွေရေမြှုပ်တာ ၊စိုက်ခင်းတွေ ပျက်စီးတဲ့အထိ ထိခိုက်ဆုံးရှုံးမှုတွေရှိနေတယ်လို့သိရပါတယ်။
ချင်းပြည်နယ်မှာဆိုရင်လည်း မနေ့ မေလ ၁၆. ရက် ညနေပိုင်းအထိစာရင်းတွေအရ လူနေအိမ်ခြေ ၇၀၀ နဲ့ ၈၀၀ ကြားထိခိုက်ပျက်စီးခဲ့တယ်လို့ သိရပါတယ်။
