ကရင်နီ(ကယား)ပြည်နယ်၊ ဘောလခဲမြို့နယ်တွင် စစ်ကောင်စီက တိုက်လေယာဥ်ဖြင့် ဗုံးကြဲတိုက်ခိုက်မှုကြောင့် (၁၇)နှစ်အရွယ် အမျိုးသမီးငယ်တစ်ဦးသေဆုံးပြီး လေးဦးဒဏ်ရာရရှိကြောင်း ဘောလခဲ PDFက ပြောသည်။
ယနေ့(မေလ ၁၇ရက်) နံနက် ၄ နာရီခန့်က စစ်ကောင်စီ၏ ဗုံးကြဲမှုဖြစ်စဉ်မှာ စောလုံကျေးရွာ သို့ တိုက်ခိုက်ခဲ့ခြင်းဟု ဆိုသည်။
တိုက်ခိုက်မှုကြောင့် ဒေသခံပြည်သူများ သေဆုံးထိခိုက်မှုအပြင် ကျေးရွာဆေးပေးခန်း အဆောက်အဦး နှစ်လုံးနှင့် နေအိမ် ခြောက်လုံး ပျက်ဆီးခဲ့သည်။ထို့အတူ ဘုန်းကြီး ကျောင်းတစ်ကျောင်းလည်း အနည်းငယ် ထိခိုက်ခဲ့သည်။
![(ယနေ့နံနက်အစောပိုင်းတွင် စစ်ကောင်စီက တိုက်လေယာဥ်ဖြင့် ဗုံးကြဲတိုက်ခိုက်ခဲ့သည့် စောလုံကျေးရွာမှ ပျက်စီးခဲ့သည့် အဆောက်အဦးများအား တွေ့ရစဥ်။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/05/347602826_143875692002349_2344199705165049742_n.jpg?resize=718%2C960&ssl=1)
ဘောလခဲခရိုင်အတွင်း လူနေကျေးရွာများအား စစ်ကောင်စီမှ လေယာဉ်ဗုံးကြဲမှုဖြစ်စဉ် သုံးကြိမ် အထိရှိလာပြီဖြစ်ရာ ပြည်သူများအနေဖြင့် လေကြောင်းရန်ကာကွယ်မှုကို ဂရုတစိုက် ပြင်ဆင်သင့်ပြီဖြစ်ကြောင်း ဘောလခဲ PDF က အသိပေးသည်။
![(ယနေ့နံနက်အစောပိုင်းတွင် စစ်ကောင်စီက တိုက်လေယာဥ်ဖြင့် ဗုံးကြဲတိုက်ခိုက်ခဲ့သည့် စောလုံကျေးရွာမှ ပျက်စီးခဲ့သည့် အဆောက်အဦးများအား တွေ့ရစဥ်။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/05/347434489_801132244683059_6880150503809545251_n.jpg?resize=880%2C660&ssl=1)
“အခုက ဘောလခဲမှာ တိုက်ပွဲက မကြာခဏ ဖြစ်နေတာ။ ဒါပေမယ်လို့ ဒီမနက်က စစ်ကောင်စီက လေယာဥ်နဲ့ ဗုံးကြဲတဲ့နေရာက တိုက်ပွဲမရှိဘူး။ရမ်းသမ်းပြီး ဗုံးကြဲတာလို့ ပြောလို့ရတယ်။ဒီလိုမှမဟုတ်ဘဲ ရည်ရွယ်ချက်ရှိရှိ ပစ်တယ်ဆိုရင်တော့ လူထုအပေါ်အကြမ်းဖက်တာပဲ။ဒါလည်း ကြားနေရတဲ့သူတွေအတွက် ရိုးလာနေပြီ။ခံစားနေရတာတော့ ကျွန်တော်တို့ ပြည်နယ်မှာ တော်တော်ဆိုးတယ်”ဟု ဘောလခဲ PDF တပ်ဖွဲ့ဝင်တစ်ဦးက ပြောသည်။
![(ယနေ့နံနက်အစောပိုင်းတွင် စစ်ကောင်စီက တိုက်လေယာဥ်ဖြင့် ဗုံးကြဲတိုက်ခိုက်ခဲ့သည့် စောလုံကျေးရွာမှ ပျက်စီးခဲ့သည့် အဆောက်အဦးများအား တွေ့ရစဥ်။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/05/347452406_1438415726987574_191818606993142763_n.jpg?resize=880%2C660&ssl=1)
ယခုလ ၁ ရက်က ဘောလခဲမြို့အတွင်းရှိ စစ်ကောင်စီတပ်စွဲထားသော နေရာလေးခုကို ပြည်သူ့ကာကွယ်ရေးတပ်များပူးပေါင်း တိုက်ခိုက်ခဲ့ရာ လက်နက်နှစ်လက်ရရှိပြီး စစ်ကောင်စီတပ်သား ခုနစ်ဦးထက်မနည်း သေဆုံးခဲ့သည်။
မကြာသေးမီရက်ပိုင်းကလည်း ဘောလခဲ-ရွာသစ် လမ်းမကြီးပေါ် စစ်ကြောင်းထိုးလာသော စစ်ကောင်စီတပ် တိုက်ခိုက်ခံရပြီး အနည်းဆုံးငါးဦးသေဆုံးကာ လက်နက်တစ်လက်နှင့် ခဲယမ်းအချို့ရရှိကြောင်း ကရင်နီအမျိုးသားများကာကွယ်ရေးတပ်(KNDF)တပ်ရင်း -၂၁က ထုတ်ပြန်ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)