ကရင်နီ(ကယား)ပြည်နယ်၊ ဘောလခဲမြို့နယ်တွင် စစ်ကောင်စီတပ်က တိုက်လေယာဥ်ဖြင့်ပစ်ခတ်တိုက်ခိုက်၍ ဒေသခံပြည်သူနှစ်ဦးသေဆုံးပြီး သုံးဦးဒဏ်ရာရရှိကြောင်း Bawlakhe PDF က အသိပေး ထုတ်ပြန်သည်။
ယနေ့(မတ်လ ၂၃ ရက်) ညနေ ၄ နာရီ ခွဲခန့်တွင် ဘောလခဲခရိုင်အတွင်း ပြည်သူများ လုပ်ငန်းလုပ်ဆောင်နေသော နေရာတစ်ခုကို တိုက်လေယာဉ်ဖြင့် ဗုံးကြဲတိုက်ခိုက်ခဲ့ခြင်းဟု ဆိုသည်။
ထိုသို့ တိုက်ခိုက်မှုတွင် ဒေသခံ ပြည်သူ နှစ်ဦးသေဆုံးခဲ့ပြီး သုံးဦး ထိခိုက်ဒဏ်ရာရရှိခဲ့ကြောင်း အသိပေးသည်။
ယခုလ ၁၆ ရက်က စစ်ကောင်စီတပ်အထိနာခဲ့သော ရေနီပေါက်ကျေးရွာအနီးဖြစ်ပွားခဲ့သောတိုက်ပွဲဖြစ်စဉ်နှင့်ပက်သက်၍ အကြမ်းဖက်စစ်ကောင်စီတပ်နှင့် ဘောလခဲပြည်သူ့ကာကွယ်ရေးတပ်ဖွဲ့တို့အကြား စစ်ရေးတင်းမာလျက်ရှိသည်။
ထို့အပြင် စစ်ကောင်စီမှ ဘောလခဲမြို့အနီးရှိ ရေနီပေါက်ကျေးရွာနှင့် မိုင်းထမ်းကျေးရွားများအား လက်နက်ကြီးနှင့်နေ့စဉ် ပစ်ခတ်နေသည်။
ထိုသို့ ပစ်ခတ်မှုများကြောင်း ကျေးရွာ နှစ်ရွာမှ နေအိမ် ၂၀ ထိခိုက်ပျက်စီးခဲ့ပြီး ဘုန်းကြီးကျောင်း တစ်ကျောင်းလည်း ထိခိုက်ပျက်စီးထားသည်။
အဆိုပါ ကျေးရွာ နှစ်ရွာရှိ ဒေသခံပြည်သူများမှာ ဘေးလွှတ်ရာသို့ ရွာလုံးကျွတ်ထွက်ပြေးတိမ်းရှောင်နေရပြီး စစ်ဘေးရှောင်အခက်ခဲများနှင့် ကြုံတွေ့နေရသည်။
“ ရွာနှစ်ရွာက စစ်ရှောင်အရေအတွက်က လူဦးရေတစ်ထောင်လောက်ရှိနေတယ်။အခုက ဘယ်သူမှလည်း မပြန်ရဲကြသေးဘူး။လက်နက်ကြီးက တစ်နာရီ ခြားတခါလောက်ကိုပစ်နေတာ” ဟု ကရင်နီစစ်ဘေးရှောင်ကူညီကယ်ဆယ်ရေးအဖွဲဝင်တစ်ဦးက ပြောသည်။
အလားတူ ဖေဖော်ဝါရီ ၂၇ ရက်မှ မတ်လ ၁၂ ရက်အထိ နှစ်ပတ်တာကာလအတွင်း ကရင်နီ ဒေသ၌ အရပ်သား ၄၁ဦးကို သတ်ဖြတ်ကာ ၁၄ဦးကို စစ်ကောင်စီတပ်က ဖမ်းဆီးကျူးလွန်ခဲ့ ကရင်နီလူမှုအသင်းအဖွဲ့များကွန်ရက်က ဆိုသည်။
လက်ရှိစစ်ရေးအခြေအနေကြောင့် ဘောလခဲ-ဖားဆောင်း လမ်းမကြီးနှင့် ဘောလခဲ-ရွာသစ်လမ်းမကြီးကို ရက်အကန့်အသတ်မရှိ ပိတ်ထားမည်ဟု Bawlakhe PDF က ယမန်နေ့တွင် ထုတ်ပြန်ထားသည်။
