စစ်ရေးအရှိန်မြှင့်နေ၍ ဖြစ်လာနိုင်သည့်အခြေအနေများအတွက် ကြိုပြင်ထားရန် အသိပေး
စစ်ကိုင်းတိုင်း ဗန်းမောက်မြို့နယ်ရှိ ကြောင်လည်ကျေးရွာအနီး ယနေ့နံနက်က တိုက်ပွဲဖြစ်ပွားခဲ့ပြီး စစ်ကောင်စီတပ်က လေကြောင်း ပစ်ကူပေးတိုက်ခိုက်ခဲ့ကြောင်း Banmauk Revolutionက အသိပေးထုတ်ပြန်သည်။
မေလ ၂၀ရက် နံနက် ၁၀နာရီမှ ညနေပိုင်းအထိ ကြောင်လည်ရွာနှင့် မံထွန်ကျေးရွာအနီးတွင် ဒေသခံကာကွယ်ရေးတပ်များနှင့် စစ်ကောင်စီတပ်တို့ တိုက်ပွဲဖြစ်ခဲ့သည်ဟု ဆိုသည်။
တိုက်ပွဲဖြစ်စဉ်နှင့်ပတ်သက်ပြီး ဗန်းမောက်ဒေသကာကွယ်ရေးတပ်ဖွဲ့ထံသို့ ဆက်သွယ်ရာ အဆက်အသွယ်မရပေ။
ဆက်သွယ်ရေးအခက်အခဲကြောင့် မြေပြင်မှပေးပို့သည့် သတင်းကိုဖော်ပြရခြင်းဖြစ်ကြောင်း၊ ဗန်းမောက်နယ်တွင် နေရာအတော်များများ၌ ဖုန်းလိုင်းမမိကြောင်း Banmauk Revolution တာဝန်ရှိသူက ပြောသည်။
နှစ်ဖက်ထိခိုက်ကျဆုံး အခြေအနေကို မသိရသေးသော်လည်း စစ်ကောင်စီတပ်က လေယာဉ်ဖြင့် နှစ်ကြိမ်ဗုံးကြဲသွားကြောင်း Banmauk Revolutionက ထုတ်ပြန်သည်။
မြေပြင်တိုက်ပွဲများတွင် အမြဲတမ်းရှုံးနှိမ့်နေသည့် စစ်ကောင်စီတပ်များသည် လေယာဉ်ပစ်ကူခေါ်ခြင်း၊ လူသားတံတိုင်းများ ပြုလုပ်ခြင်းတို့ ဆောင်ရွက်လာနိုင်ကြောင်း သတိပေးထားပြီး မြို့နေလူထုများအနေဖြင့် ထိုအခြေအနေကိုရှောင်ကွင်းနိုင်စေရန် သတိပြုရှောင်ရှားကြရန် အသိပေးထားသည်။
တစ်နိုင်ငံလုံး စစ်ရေးအရှိန်မြင့်နေသည့်နည်းတူ ဗန်းမောက်မြို့နယ်သည်လည်း အပါအဝင်ဖြစ်သဖြင့် ဖြစ်ပေါ်လာနိုင်သောအခြေအနေများအတွက် ကြိုတင်ပြင်ဆင်ထားကြပါရန်လည်း အသိပေးထုတ်ပြန်ခဲ့သည်။
