မန္တလေးတိုင်း၊ မြင်းခြံထောင်မှာ ဖမ်းဆီးထားတဲ့ နိုင်ငံရေးအကျဉ်းသားတွေထဲက ၇ ဦးကို ခေါ်ထုတ်ကာ မနေ့ ညပိုင်းက စစ်အုပ်စုက ရိုက်နှက်လို့ ၁ဦးသေဆုံးခဲ့ရတယ်လို့ မုံရွာလူထုသပိတ်တိုက်ပွဲဦးဆောင်ကော်မတီက ထုတ်ပြန်အသိပေးပါတယ်။
မနေ့ မေလ ၂၁ ရက် ညနေပိုင်း ၅ နာရီ ၁၅ မိနစ်ခန့်က အိပ်ဆောင်ဝင်း ၂ မှာရှိတဲ့ ကိုကျော်မျိုးမင်း နဲ့ ကိုသက်မောင်မောင်တို့ကို ထောင်ဝန်ထမ်းတွေက ပထမဆုံး ခေါ်ထုတ်သွားတာပါ။
အဲဒီနောက် ည ၁၀ နာရီ ခွဲမှာ ကိုကျော်မျိုးတင့် ၊ ကိုဇော်ဇော်အောင်တို့ကို ထပ်မံ ခေါ်ထုတ်တယ်လို့သိရပါတယ်။
နာရီဝက်ခန့်အကြာမှာ ည ၁၁ နာရီမှာ ကိုဥက္ကာကို ထပ်ခေါ်သွားခဲ့ပါတယ်။ ဒီနေ့ မနက် ပိုင်းမှာလည်း ကိုကျော်တင့်ဦးနဲ့ ကိုအောင်မျိုးသန့် တို့ပါ ထောင်ဝန်ထမ်းတွေက ခေါ်ထုတ်ခဲ့ပါတယ်။
ဒီလို ခေါ်ထုတ်ခံရသူ နိုင်ကျဉ်း ၇ ဦးကို ထောင်မှာရှိတဲ့ စစ်ကောင်စီလက်အောက်ခံ စစ်သားနဲ့ ရဲတွေက ရိုက်နှက် စစ်ဆေးလို့ နိုင်ငံရေးအကျဉ်းသား ကိုဥက္ကာ ကျဆုံးသွားရတယ်လို့ မုံရွာလူထုသပိတ်တိုက်ပွဲဦးဆောင်ကော်မတီကဖော်ပြပါတယ်။
ကျဆုံးသွားတဲ့ ကိုဥက္ကာဟာ မုံရွာဒေသခံ နိုင်ငံရေးအကျဉ်းသားဖြစ်တယ်လို့ မြေပြင်သတင်းတွေအရသိရပါတယ်။
ဒီဖြစ်စဉ်ဖြစ်ပွားပြီးနောက် မြင်းခြံထောင်ထဲမှာ အိပ်ဆောင်တွေကို တန်းဖွင့်ပေးတာမရှိဘဲ အကျဉ်းသားတွေကို အဆောင်ထဲမှာ သော့ခတ်ပိတ်ထားပြီး စစ်ကောင်စီတပ်ဖွဲ့ဝင်တွေနဲ့ ရဲတွေက အုတ်ရိုးအတွင်းမှာ တပ်စွဲထားတယ်လို့ မုံရွာလူထုသပိတ်တိုက်ပွဲဦးဆောင်ကော်မတီက ဆိုထားပါတယ်။
နိုင်ငံရေးအကျဉ်းသားတွေကလည်း ထောင်ကဝေတဲ့ ထမင်းဟင်းတွေ လက်မခံဘဲ အစာငတ်ခံ ဆန္ဒပြနေတယ်လို့လည်းသိရပါတယ်။
