အာဏာသိမ်းစစ်ခေါင်းဆောင်မင်းအောင်လှိုင်အပါအဝင် လူပုဂ္ဂိုလ် ၁၁၆ ဦးနှင့် အဖွဲ့အစည်း ၁၈ ခုကို အရေးယူပိတ်ဆို့ထားသည့် ဥရောပသမဂ္ဂ(EU)၏ဆုံးဖြတ်ချက်ကို ဥရောပရှိ နိုင်ငံ ၁၀ နိုင်ငံ ထပ်တူ အရေးယူပိတ်ဆို့မည်ဟု အီးယူအကြီးအကဲ ဂျိုးဆက်ဘော်ရဲလ်က ယမန်နေ့(မေလ ၂၃ရက်)တွင် ကြေညာသည်။
ပြီးခဲ့သည့် ဧပြီ ၂၈ ရက်တွင် ချမှတ်ခဲ့သော ဥရောပကောင်စီ၏ ဆုံးဖြတ်ချက်ကို မြောက်မက်ဆီဒိုနီးယား၊ မွန်တီနီဂရိုး၊ ဆားဘီယား၊ အယ်ဘေးနီးယား၊ ယူကရိန်း၊ ဘော့စနီးယား၊ ဂျော်ဂျီယာနှင့် EFTA(ဥရောပလွတ်လပ်စွာကုန်သွယ်ရေးအသင်း)နိုင်ငံများဖြစ်သည့် အိုက်စလန်၊ လက်ချင်စတိန်းနှင့် နော်ဝေးတို့က လိုက်နာကျင့်သုံးမည်ဟု အီးယူအကြီးအကဲက ကြေညာခဲ့ခြင်းဖြစ်သည်။
မြန်မာနိုင်ငံတွင် ဒီမိုကရေစီလျော့ပါးစေသည့်လုပ်ဆောင်ချက်များနှင့် ဆိုးရွားပြင်းထန်သောလူ့အခွင့်အရေးချိုဖောက်မှုများအပါအဝင်ဆက်လက်စိုးရိမ်ဖွယ်အခြေအနေများကြောင့် ဥရောပကောင်စီက အာဏာသိမ်းစစ်ခေါင်းဆောင်မင်းအောင်လှိုင်အပါအဝင် စစ်ဗိုလ်ချုပ်များ၊ အာဏာသိမ်းမှုတွင် ပါဝင်ပတ်သက်သူများ စသည့် လူပုဂ္ဂိုလ် ၉၂ ဦးနှင့် အဖွဲ့အစည်း ၁၇ ခုကို ၂၀၂၄ ဧပြီ ၃၀ ရက်အထိ အရေးယူပိတ်ဆို့ကြောင်း ၂၀၂၃ ဧပြီ ၂၈ ရက်တွင် ဆုံးဖြတ်ခဲ့သည်။
ထပ်မံရရှိသော သတင်းအချက်အလက်များအရ စစ်ကောင်စီ၏ နိုင်ငံခြားရေးဝန်ကြီး၊ ကာကွယ်ရေးဝန်ကြီးတို့အပါအဝင် စစ်ဗိုလ်ချုပ်များနှင့် စစ်ကောင်စီအဖွဲ့ဝင် စုစုပေါင်း ၂၄ ဦး နှင့် အဖွဲ့အစည်း တစ်ခုတို့ကို ဥရောပကောင်စီ၏အရေးယူပိတ်ဆို့မှုစာရင်းတွင် ထည့်သွင်းခဲ့သည်။
အဆိုပါ လူပုဂ္ဂိုလ် ၂၄ ဦးနှင့် အဖွဲ့အစည်းတစ်ခု တို့ကို မကြာသေးမီက EFTA အဖွဲ့ဝင်နိုင်ငံဖြစ်သည့် ဆွစ်ဇာလန်က အရေးယူပိတ်ဆို့ကြောင်း ကြေညာထားသည်။
