ကရင်အမျိုးသားအစည်းအရုံး(KNU) ဒူးပလာယာခရိုင် တပ်မဟာ(၆) ကော့ကရိတ်မြို့နယ်ကို စစ်ကောင်စီတပ်က ယမန်နေ့ လေကြောင်းမှဗုံးကြဲတိုက်ခိုက်ခဲ့ကြောင်း KNUက အသိပေးထုတ်ပြန်သည်။
KNU လက်အောက်ခံ ကရင်အမျိုးသားလွတ်မြောက်ရေးတပ်မတော်(KNLA) တပ်ရင်း(၂၀၁) နယ်မြေ မောခီးကျေးရွာအုပ်စု ၊ ခလယ်လောကျယ်(ခ)ပနွယ်ဖိုးကလိုးရွာအတွင်းသို့ မေလ ၂၃ရက် ည ၁၁နာရီခွဲတွင် တိုက်လေယာဉ်ဖြင့် ဗုံးကြဲခဲ့ခြင်းဖြစ်သည်ဟု ဆိုသည်။
လေကြောင်းတိုက်ခိုက်မှုတွင် ဗုံးနှစ်လုံးကြဲချတိုက်ခိုက်ခဲ့ရာ ခလယ်လောကျယ်(ခ)ပနွယ်ဖိုးကလိုးရွာရှိ ခရစ်ယာန်ဘုရားရှိခိုးကျောင်းတစ်ကျောင်း ဗုံးထိမှန်ပြီး ပြန်လည်ပြုပြင်မရသည်အထိ ပျက်စီးခဲ့ကြောင်း KNUက ထုတ်ပြန်သည်။
“ဖြစ်တဲ့နေရာက KNU ဘက်မှာတော့ ကော့ကရိတ်မြို့နယ်ပဲ။ ဒါပေမဲ့ မြို့နဲ့နည်းနည်းဝေးတာပေါ့။ လူအထိအခိုက်တော့ မကြားဘူး။”ဟု ကော့ကရိတ်ဒေသခံက ပြောသည်။
ကော့ကရိတ်နယ်တွင် စစ်ကောင်စီတပ်က လေကြောင်းမှ ကင်းထောက်မှုများ နေ့စဉ်နှင့်အမျှ လုပ်ဆောင်နေကြောင်း ဒေသခံက ပြောသည်။
