တော်လှန်ရေးရဲဘော် ၆၀ဦးကျဆုံး၊ ဒရုန်းတိုက်ခိုက်မှု ၁၂၀ကြိမ်အပါအဝင်တိုက်ပွဲ ၄၀၀ကျော်ရှိခဲ့ဟု ဖော်ပြ
ပြည်သူ့ကာကွယ်ရေးတပ်မတော် အမှတ်(၁)စစ်ဒေသနယ်မြေအတွင်း မတ်လအတွင်းက တိုက်ပွဲပေါင်း ၄၀၀ကျော်ဖြစ်ပွားခဲ့ရာ စစ်ကောင်စီတပ်မှ သေဆုံးထိခိုက်များပြားခဲ့သည်ဟု အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက သတင်းထုတ်ပြန်သည်။
စစ်ဒေသ(၁)နယ်မြေဖြစ်သည့် စစ်ကိုင်းတိုင်း၊ မကွေးတိုင်း၊ မန္တလေးတိုင်း၊ ရှမ်းပြည်နယ် မြောက်ပိုင်းတို့တွင် မတ်လအတွင်း တိုက်ပွဲပေါင်း ၄၃၇ကြိမ် ဖြစ်ပွားခဲ့သည်ဟု ဖော်ပြထားသည်။
အဆိုပါတိုက်ပွဲများအတွင်း ရန်သူ ၆၁၂ဦး သေဆုံး၍ ၇၀၀ဦး ထိခိုက်ဒဏ်ရာရရှိခဲ့ဟု NUG ကာကွယ်ရေးက ထုတ်ပြန်သည်။
ထို့အပြင် ရန်သူ့ထံမှ လက်နက်မျိုးစုံ (၂၇)လက်အပါအဝင် ခဲယမ်းမီးကျောက် အမြောက်အမြား သိမ်းဆည်းရမိခဲ့ ကြောင်း ဖော်ပြထားသည်။
တိုက်ပွဲများအတွင်း တော်လှန်ရေးတပ်များဘက်က ၆၀ဦး ကျဆုံးခဲ့ရပြီး ၉၄ဦး ဒဏ်ရာရခဲ့သည်ဟု အသိပေးထားသည်။
တိုက်ပွဲပေါင်း ၄၃၇ကြိမ်ဖြစ်ပွားခဲ့ရာ ထိတွေ့တိုက်ပွဲ ၁၃၇ ကြိမ်၊ မိုင်းဆွဲတိုက်ခိုက်မှု ၁၁၈ ကြိမ်၊ တော်လှန်ရေးတပ်များက ဒရုန်းဖြင့် တိုက်ခိုက်မှု ၁၂၅ကြိမ်၊ တော်လှန်ရေးတပ်များက ပစ်ခတ်တိုက်ခိုက်မှု ၄၅ကြိမ်၊ စစ်ကောင်စီတပ်မှ လေကြောင်း တိုက်ခိုက်မှု ၁၂ ကြိမ်ရှိခဲ့သည်ဟု ဖော်ပြထားသည်။
အဆိုပါ တိုက်ပွဲများကို အမှတ်(၁)စစ်ဒေသကွပ်ကဲမှုအောက်ရှိ PDF၊ ပကဖနှင့် EROs ပူးပေါင်းအဖွဲ့များက ဆင်နွှဲခဲ့ခြင်းဖြစ်သည်ဟု ထုတ်ပြန်ခဲ့သည်။
