ရန်ကုန်တိုင်းတွင် ပြည်သူ့ခုခံတွန်းလှန်စစ် နှစ်နှစ်တာအတွင်း စစ်ဆင်ရေးပေါင်း ၂,၀၀၀ ကျော် ပြုလုပ်နိုင်ခဲ့ကြောင်း ရန်ကုန်တိုင်းစစ်ဒေသခွဲက ယနေ့(ဇွန် ၃) အသိပေးထုတ်ပြန်သည်။
အဆိုပါစစ်ဆင်ရေးများကို ၂၀၂၁ မေလ ၅ ရက်မှ ၂၀၂၃ မေလ ၃၁ ရက်အထိ အထူးစစ်ဆင်ရေးအ ဖွဲ့ (S.O.F)၊ Special Task Force (S.T.F)၊ ပြည်သူ့ကာကွယ်ရေးအဖွဲ့ (ပ.က.ဖ)၊ မြို့ပြပြောက်ကျားတပ်ဖွဲ့များနှင့် အခြားသော တော်လှန်ရေးအင်အားစုများမှ ဆောင်ရွက်နိုင်ခဲ့ခြင်း ဖြစ်သည်ဟု ဆိုသည်။
“မြို့ပြပျောက်ကြားလှုပ်ရှားမှု အချို့အဖွဲ့က NUG/MOD ရဲ့ COCအောက်က လှုပ်ရှားကြပြီး အချို့ကတော့ သီးခြားလှုပ်ရှားကြပါတယ်။ အဖွဲ့အများစုကတော့ NUG/MODရဲ့ COCအောက်ကပါပဲ”ဟု အထက်ပါစစ်ရေးလှုပ်ရှားမှုများတွင် ပါဝင်သည့် တော်လှန် ရေးအဖွဲ့အစည်းများနှင့်ပတ်သက်ပြီး ရန်ကုန်တိုင်းစစ်ဒေသခွဲမှ တာဝန်ရှိသူတစ်ဦးက People’ Spring သို့ ပြောသည်။
စစ်ဆင်ရေးများတွင် ရန်သူစစ်ကောင်စီမှ ဗိုလ်မှူးကြီးအဆင့်များ အပါအဝင်သေဆုံးမှု ၆၀၀ကျော်၊ ထိခိုက်ဒဏ်ရာရရှိမှု ၉၀၀ ကျော်ရှိခဲ့ပြီး စစ်ဆင်ရေးအတွင်း မတော်တဆထိခိုက်မှုများ၊ စစ်ကောင်စီ၏ ဖမ်းဆီးနှိပ်စက်မှုများကြောင့် တော်လှန်ရေးရဲဘော်များမှ ကျဆုံးရဲဘော် ၈၀ ကျော်၊ ထိခိုက်ဒဏ်ရာရရှိသူ ၁၀၀ ခန့်နှင့် ဖမ်းဆီးထိန်းသိမ်းခြင်းခံရသူ ၁,၀၀၀ကျော်ရှိခဲ့ကြောင်း ဖော်ပြသည်။
ဆောင်ရွက်ခဲ့သည့်စစ်ဆင်ရေးများတွင် စစ်ရေးပစ်မှတ် ၁,၀၀၀ကျော်၊ အုပ်ချုပ်ရေးပစ်မှတ် ၈၀၀ ကျော်နှင့် စီးပွားရေးပစ်မှတ် ၂၀၀ကျော်ပါဝင်ပြီး ၎င်းပစ်မှတ်များကို အထူးစစ်ဆင်ရေးလှုပ်ရှားမှု အကြိမ်ရေ (၅၀)ခန့်၊ ပစ်ခတ်တိုက်ခိုက်မှု အကြိမ်ရေ (၅၀၀)ကျော်နှင့် ဖောက်ခွဲတိုက်ခိုက်မှုပေါင်း ၁,၅၀၀ကျော်တို့ဖြင့် တိုက်ခိုက်ခဲ့ခြင်းဖြစ်ကြောင်း အသိပေးသည်။
ရန်ကုန်တိုင်းစစ်ဒေသခွဲအနေဖြင့် ပြည်သူ့ကာကွယ် ရေးတပ်မတော်၊ ရန်ကုန်တိုင်းစစ်ဒေသခွဲ၏ ပထမဆုံးတပ်ရင်းဖြစ်သည့် တပ်ရင်း (၅၁၀၁)ကိုဖွဲ့စည်းပြီးဖြစ်ရာ မြို့ပြပြောက်ကျားစစ်ဆင်ရေးများနှင့် တောတွင်းကျေးလက်စစ်ဆင်ရေးများကို နည်းဗျူဟာကျကျ ဟန်ချက်ညီစွာ ပေါင်းစပ်၍ တိုက်ပွဲများဖော်ဆောင်သွားမည်ဟုလည်း အသိပေးထုတ်ပြန်ထားသည်။
