ကရင်အမျိုးသားအစည်းအရုံး(KNU) ဖာပွန်ခရိုင်၌ ယခုလဝက်အတွင်း တိုက်ပွဲပေါင်း ၃၀ကျော်ဖြစ်ပွားခဲ့ရာ စစ်ကောင်စီဘက်က ၂၀ဦးသေဆုံးပြီး ဒဏ်ရာရသူများရှိခဲ့ကြောင်း ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၅)က သတင်းထုတ်ပြန်သည်။
ဇွန်လနှစ်ပတ်တာအတွင်း စစ်ကောင်စီတပ်စခန်းများအား ပြောက်ကျားစစ်ဖြင့် (၃၁)ကြိမ်ဝင်ရောက်ပစ်ခတ်ခဲ့ခြင်းဖြစ်သည်ဟု ဖော်ပြသည်။
ယင်းတိုက်ပွဲများ၌ KNLA တပ်မဟာ(၅) စစ်သည်တော်များ အသက်ဆုံးရှုံးခြင်း ထိခိုက်ဒဏ်ရာအနာတရ ရရှိခြင်းတစ်ဦးတစ်ယောက်မျှမရှိခဲ့ကြောင်းလည်း အသိပေးထားသည်။
စစ်ကောင်စီတပ်နှင့် ကရင်အမျိုးသားလွတ်မြောက်ရေးတပ်မတော်၊ အမှတ်(၅)တပ်မဟာလက်အောက်ရှိ တပ်ရင်း၊ တပ်ခွဲများအကြား နေ့စဉ်နှင့်အမျှတိုက်ပွဲဖြစ်ပွားလျက်ရှိကြောင်းထုတ်ပြန်သည်။
ပြီးခဲ့သည့် မေလအတွင်းကလည်း KNU ဖာပွန်ခရိုင် တပ်မဟာ(၅)နယ်မြေ၌ တိုက်ပွဲ ၂၀၀ကြိမ်ဖြစ်ပွားခဲ့ရာ စစ်ကောင်စီနှင့် ၎င်း၏ လက်အောက်ခံ နယ်ခြားစောင့်တပ်မှ တပ်ဖွဲ့ဝင် ၁၂၂ဦး သေဆုံးကာ ၄၈ဦး ဒဏ်ရာရခဲ့ပြီး သေဆုံးသူများတွင် အရာရှိအချို့ပါဝင်ကြောင်း ထုတ်ပြန်ထားသည်။
ထို့အပြင် မေလတိုက်ပွဲများ၌ စစ်ကောင်စီထောက်ပို့ယာဉ် ၆စီးနှင့် မြင်းလား ၆ကောင်ကို တိုက်ခိုက်ဖျက်ဆီးနိုင်ခဲ့သည်ဟု ဆိုသည်။ မေလအတွင်း တပ်မဟာ(၅)ဘက်က ရဲဘော် နှစ်ဦး ကျဆုံးကာ ၁၀ဦး ဒဏ်ရာရခဲ့သည်ဟု ထုတ်ပြန်ထားသည်။
