▪︎ပျူစောထီးဂိတ် မိုင်ခွဲတိုက်ခိုက်မှု ပျူလေးဦးသေဆုံးပြီး ပျူခေါင်းဆောင်အပါအဝင် ၈ ဦးထက်မနည်းဒဏ်ရာရ
တမူးမြို့နှင့် ၆ မိုင်အကွာရှိပန်းသာရွာမှ စစ်ကောင်စီတပ်စခန်းကို ပြည်သူ့ကာကွယ်ရေးတပ်များက ယနေ့(ဇွန် ၁၅ ရက်) နံနက်အစောပိုင်းတွင်တိုက်ခိုက်သိမ်းပိုက်ခဲ့ပြီး စစ်ကောင်စီတပ်သားအချို့ကို အရှင်ဖမ်းမိကာ လက်နက်ခဲယမ်းများလည်း သိမ်းဆည်းနိုင်ခဲ့ကြောင်းသတင်းရရှိသည်။
ပန်းသာရွာရှိ စစ်ကောင်စီတပ်စခန်းကို ပြည်သူ့ကာကွယ်ရေးတပ်များက ဇွန်လ ၁၅ရက် နံနက် ၅နာရီခန့်တွင် စတင်တိုက်ခိုက်ခဲ့ခြင်းဖြစ်ကြောင်း ပြည်သူ့ကာကွယ်ရေးတပ်ဖွဲ့ဝင်အချို့ကပြောသည်။
” မနက် ၅နာရီကနေ စတိုက်တာ။ စစ်တပ်ဘက်က ဘယ်လောက်အထိ အထိအခိုက်ရှိတယ်တော့မသိဘူး။ တစ်ယောက်တော့ အရှင်ရတယ်။ ကာကွယ်ရေးရဲဘော်ငါးဦးတော့ ဒဏ်ရာအနည်းငယ်ရတယ်”ဟုPDF တစ်ဦးကပြောသည်။
စစ်ခန်းကိုသိမ်းယူပြီးနောက် ပြန်လည်ဆုတ်ခွာခဲ့စဉ် နံနက် ၉နာရီခန့်တွင် စစ်ကောင်စီကဂျက်ဖိုက်တာနှစ်စင်းဖြင့် လာရောက်တိုက်ခိုက်ခဲ့ကြောင်းသိရသည်။သို့သော်အဆိုပါတိုက်ခိုက်မှုတွင် ပြည်သူ့ကာကွယ်ရေးတပ်ဖွဲ့ဝင်များအထိအခိုက်မရှိခဲ့ကြောင်းသိရသည်။
ထို့အပြင် ယနေ့ နံနက်ပိုင်း စခန်းသိမ်းတိုက်ပွဲဖြစ်နေချိန်တချိန်တည်းတွင် အိန္ဒိယနိုင်ငံနှင့်နယ်စပ်အနီးတမူးမြို့၊ နမ့်ဖာလုံးဈေးသို့သွားရာလမ်း ၁၄ တံတားရှိ ပျူစောထီ ဂိတ်ကို တော်လှန်ရေးအဖွဲ့များက မိုင်းခွဲတိုက်ခိုက်ခဲ့ကြောင်းသိရသည်။
ထို့ဖြစ်စဉ်တွင် တမူးမြို့မှနာမည်ဆိုးဖြင့်ကျော်ကြားသောပျူစောထီးခေါင်းဆောင် ချမ်းမြေ့အပါအဝင် ရှစ်ဦးထက်မနည်းဒဏ်ရာရပြီး လေး ဦးသေဆုံးသွားကြောင်း မြို့ခံများကပြောသည်။
” ပန်းသာစခန်းရောပျူဂိတ်ကိုပါ ဗျူဟာမြောက်တိုက်ခိုက်တာနေမယ်။ ပျူစောထီး လေးယောက်သေတာအတည်ပြုနိုင်တယ်”ဟု တမူးမြို့ခံတစ်ဦးကပြောသည်။
တိုက်ခိုက်ခံရသည့် ပျုစောထီးဂိတ်သည် အရပ်သားအစိုးရလက်ထက်က ဝန်ထမ်းအိမ်ယာအဖြစ် ဆောက်ပေးထားသည့် အဆောက်အဦအတွင်း ပျူများကတပ်စွဲထားခြင်းဖြစ်သည်ဟုဒေသခံများကပြောသည်။
ယနေ့(ဇွန် ၁၅) တမူးမြို့နယ်မှတိုက်ပွဲနှင့်ပတ်သက်၍ အမျိုးသားညီညွတ်ရေးအစိုးရ၊ကာကွယ်ရေးဝန်ကြီးဌာနနှင့် တမူးခရိုင်အခြေစိုက်ပြည်သူ့ကာကွယ်ရေးတပ်များက ယနေ့ညအထိ့သတင်းထုတ်ပြန်ခြင်းမရှိသေးပေ။
