▪︎ရွာသားတစ်ဦး လက်နက်ကြီးကျည်ထိမှန် သေဆုံး
စစ်ကိုင်းတိုင်း၊ ချောင်းဦးမြို့နယ်ရှိ ငါးယှန်ကျေးရွာကို စစ်ကောင်စီတပ်က မီးရှို့ဖျက်ဆီးရာ နေအိမ် ၂၀၀ခန့် ပြာကျပြီး ရွာသားတစ်ဦး လက်နက်ကြီးကျည်ထိမှန်သေဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။
ယမန်နေ့ (မေလ ၁၁ရက်) ညနေပိုင်းက မီးရှို့ခြင်းဖြစ်ပြီး စစ်တပ်၏ လက်နက်ကြီးပစ်ခတ်မှုကြောင့် ကိုစံလင်းဆိုသူပွဲချင်းပြီးသေဆုံးခဲ့ပြီး ၎င်း၏ဇနီးဖြစ်သူမှာလည်း ဒဏ်ရာအပြင်းထန်ရရှိခဲ့ကြောင်း ဒေသခံများက ပြောသည်။
![(ငါးယှန်ကျေးရွာအား စစ်ကောင်စီတပ်က မီးရှို့ဖျက်ဆီးသွားပြီးနောက် တွေ့ရစဥ်။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/05/346782584_181365864858965_8142017679470165376_n.jpg?resize=720%2C956&ssl=1)
” ရွာတစ်ဝက်လောက်ကမီးထဲပါသွားပါတယ်။ မီးထဲပါသွားတဲ့ ရွာမြောက်ခြမ်းက လက်လုပ် လက်စားတွေများပါတယ်”ဟု ဒေသခံတစ်ဦးက ပြောသည်။
![(ငါးယှန်ကျေးရွာအား စစ်ကောင်စီတပ်က မီးရှို့ဖျက်ဆီးသွားပြီးနောက် တွေ့ရစဥ်။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/05/345322581_1432344397602711_4181007661803510133_n.jpg?resize=720%2C956&ssl=1)
ယမန်နေ့ညကပင် စစ်ကောင်စီတပ်သည် ချောင်းဦးမြို့ပေါ်ရှိ ရပ်ကွက် သုံးခုအား မီးဝင်ရှို့ရာ နေအိမ် ငါးလုံးထက်မနည်း မီးလောင်ပျက်စီးခဲ့ကြောင်း ဒေသခံများက ပြောသည်။
ချောင်းဦးမြို့နယ်တွင် မေလ ၉ ရက်က စျေးဝယ်လာသော စစ်သားနှစ်ဦး ပစ်ခတ်ခံရပြီး တစ်ဦးသေဆုံးခဲ့ကာ မေလ၁၀ ရက်ကလည်း စစ်ကောင်စီယာဥ်တန်း မိုင်းဆွဲတိုက်ခိုက်ခံခဲ့ရသေးသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)