မြန်မာစစ်တပ်ကျူးလွန်နေမှုများ ရပ်တန့်ရေး ကုလသမဂ္ဂလုံခြုံရေးကောင်စီ၏ ပိုမိုအားကောင်းသည့် နောက်ထပ်ဆုံးဖြတ်ချက်အဆိုတစ်ခု ထပ်မံချမှတ်ရန် မြန်မာသံအမတ်ကြီးဦးကျော်မိုးထွန်းက တိုက်တွန်းလိုက်သည်။
ယမန်နေ့က ကုလသမဂ္ဂ လုံခြုံရေးကောင်စီတွင် ‘အမျိုးသမီး၊ ငြိမ်းချမ်းရေးနှင့် လုံခြုံရေး : ပဋိပက္ခအတွင်း လိင်ပိုင်းဆိုင်ရာ အကြမ်းဖက်မှု’ နှင့် ပတ်သက်၍ Open Debate ကျင်းပပြုလုပ်ရာ မြန်မာသံအမတ်ကြီးက တိုက်တွန်းပြောကြားခဲ့သည်။
ထိုသို့ ပိုမိုအားကောင်းသည့် မြန်မာ့အရေး ဆုံးဖြတ်ချက်အဆိုအား အချိန်နှင့် တပြေးညီ ချမှတ်နိုင်ရေးအတွက် စေ့စပ်ညှိနှိုင်းသည့် လုပ်ငန်းစဉ်တစ်ရပ်ကို မဆိုင်းမတွဘဲ ယခုပင် စတင်လုပ်ဆောင်ရန် လုံခြုံရေးကောင်စီ အဖွဲ့ဝင်နိုင်ငံများကို တဆက်တည်းတောင်းဆိုသည်။
မြန်မာနိုင်ငံရှိ အမျိုးသမီးများနှင့် မိန်းကလေးငယ်များ အထူးသဖြင့် ပဋိပက္ခ ဖြစ်ပွားရာ နေရာဒေသများတွင် မှီတည်းနေထိုင်သူများသည် စစ်တပ်၏ လိင်ပိုင်းဆိုင်ရာ အကြမ်းဖက်မှု အန္တရာယ်ပေးခြင်းမှ အကာအကွယ်ရရှိရန် အထူးလိုအပ်လျက်ရှိပြီး ရှင်ကျန်ရစ်သူများ အနေဖြင့်လည်း တရားမျှတမှုရရှိရန် ထိုက်တန်ကြောင်း သံအမတ်ကြီးက ကောင်စီသို့ အစီရင်ခံသည်။
ထို့အပြင် စစ်တပ်သည် ၎င်း၏ တပ်သားများမှ လိင်ပိုင်းဆိုင်ရာ အကြမ်းဖက်မှုများ ကျူးလွန်နေခြင်းကို ကိုင်တွယ်ဖြေရှင်းပေးရန် ဆန္ဒအလျဉ်းမရှိဘဲ ယင်းအစား ပစ်ဒဏ်ခတ်ခြင်းမခံရသည့် ကျင့်စဉ်ကိုသာ ဆက်လက်ထိန်းသိမ်းနေမြဲဖြစ်ကြောင်း သံအမတ်ကြီးက တင်ပြသည်။
မြန်မာပြည်သူများအဖို့ မြန်မာစစ်တပ်၏ လုပ်ရပ်များသည် စက်ဆုပ်ရွံရှာဖွယ်ကောင်းပြီး လက်သင့်ခံနိုင်ခြင်းလည်း မရှိကြောင်း သံအမတ်ကြီးက ဆိုသည်။
ထို့အတွက် ကုလသမဂ္ဂလုံခြုံရေးကောင်စီသည် စစ်တပ်မှ အကျိုးခံစားနေသည့် ပြစ်ဒဏ်ကျခံရခြင်းမှ ကင်းလွတ်နေမှုအား အပြီးတိုင်ချုပ်ငြိမ်းစေရန် ထိရောက်သည့် အရေးယူဆောင်ရွက်ချက်များ ချမှတ်ရန်လိုအပ်ကြောင်း တိုက်တွန်းသည်။
လုံခြုံရေးကောင်စီသည် မြန်မာနိုင်ငံရှိ အမျိုးသမီးများနှင့် မိန်းကလေးငယ်များ၊ အထူးသဖြင့် ပဋိပက္ခဖြစ်ပွားသည့် နေရာဒေသများတွင် ဖြစ်ပေါ်နေသော အခြေအနေများကို အလေးထားအာရုံစိုက် သင့်ပြီး စစ်တပ်မှ ကျူးလွန်လျက်ရှိသည့် လိင်ပိုင်းဆိုင်ရာ အကြမ်းဖက်မှုများကို ချက်ချင်းရပ်တန့်စေရေး တောင်းဆိုရန် သံအမတ်ကြီးက ဆက်လက်တိုက်တွန်းသည်။
