ချင်းပြည်နယ် ကန်ပက်လက်မြို့မှ တပ်ချိန်းပြန်လာသည့် စစ်ကောင်စီတပ်သည် ဆောမြို့နယ် ကျောက်ထုသို့ ဦးတည်လာနေကြောင်း ဆောမြို့နယ် ဒေသခံပြည်သူ့ကာကွယ်ရေးတပ်(PDF) တပ်ဖွဲ့တာဝန်ရှိသူတစ်ဦးက ပြောသည်။
ကန်ပက်လက်မြို့မှ တပ်ချိန်းပြန်လာသည့် စစ်ကောင်စီတပ် စစ်ကြောင်းနှင့် ဒေသခံ ကာကွယ်ရေးတပ် ပူးပေါင်းဖွဲ့များသည် ဇူလိုင် ၂၃ရက်နှင့် ၂၄ရက်များက တိုက်ပွဲဖြစ်ပွားခဲ့ပြီး စစ်ကောင်စီတပ်က ၅ဦးထက်မနည်းသေဆုံးကာ ပူးပေါင်းတပ်ဖွဲ့မှ ရဲဘော် တစ်ဦးကျဆုံးခဲ့သည်။
“ကျောက်ထုဘက်ကိုသူတို့လာမှာပေါ့။ လာရင် တိုက်ပွဲဖြစ်မှာပဲ။မနေ့ကလည်း ဖြစ်တယ်။ ကန်ပက်လက် အထွက် နတလ ကျောင်းနားမှာ ဖြစ်တယ်”ဟု ဆော PDF တာဝန်ရှိသူတစ်ဦးက ပြောသည်။
ယမန်နေ့ တိုက်ပွဲ၌ စစ်ကောင်စီတပ်၏ အထိအခိုက်အခြေအနေ မသိရသေးဟု ၎င်းက ဆိုသည်။
“CDFနဲ့ ကျနော်တို့ အဖွဲ့တွေနဲ့ပူးပေါင်းတိုက်တာ။ သူတို့က ၁၂၀လောက်ရှိတယ် အင်အားက။ခြေလျင်လာတာ”ဟု ဆောနယ် PDF တာဝန်ရှိသူက ပြောသည်။
ထို့ပြင် စစ်ကောင်စီတပ်၏ စစ်ကြောင်းတစ်ခုသည် ကန်ပက်လက်မြို့နယ် ကျင်ဒွေးမြို့သို့ သွားရောက်လျက်ရှိရာ ယင်းစစ်ကြောင်းနှင့်လည်း တိုက်ပွဲဖြစ်ပွားမှုရှိခဲ့သည်ဟု ကန်ပက်လက် CDF က အသိပေးသည်။
ကျင်ဒွေးသို့ ဦးတည်စစ်ကြောင်းထိုးနေသော အင်အား ၃၀၀ကျော်ပါရှိသည့် စစ်ကောင်စီတပ်သည် လက်ရှိတွင် လှိုင်ဒုတ်ကျေးရွာသစ်အနီးသို့ ရောက်ရှိနေကြောင်း ကန်ပက်လက် CDFက ယမန်နေ့တွင် အသိပေးထားသည်။
ယင်းစစ်ကြောင်းနှင့် မဟာမိတ် ပူးပေါင်းတပ်ဖွဲ့များအကြား ဇူလိုင် ၂၁ရက်က မဆာတွီရွာနှင့် မောချောင်းရွာအကြား တိုက်ပွဲဖြစ်ပွားခဲ့ရာ စစ်ကောင်စီတပ်မှ လေးဦးသေဆုံးကာ အများအပြား ဒဏ်ရာရခဲ့သည်ဟုဆိုသည်။
အဆိုပါ စစ်ကြောင်းနှင့် ဆောနယ်ရှိ ကာကွယ်ရေးပူးပေါင်းတပ်များသည် ဇူလိုင်လကတည်းက တိုက်ပွဲများဖြစ်ပွားလျက်ရှိရာ နှစ်ဖက်ထိခိုက်ကျဆုံးရှိခဲ့သည်။
