စစ်ကောင်စီတပ်က လေကြောင်းတိုက်ခိုက်ခဲ့၍ ပျက်စီးခဲ့သည့် ကချင်ပြည်နယ် ဝိုင်းမော်မြို့နယ် မလိရေအားလျှပ်စစ်စက်ရုံ ဓာတ်အားလိုင်းကို ပြုပြင်ရန်မှာ စစ်ရေးအခြေအနေများကြောင့် အခက်အခဲရှိနေကြောင်း ဒေသခံသတင်းရင်းမြစ်က ပြောသည်။
မလိချောင်းအနီးရှိ စစ်ကောင်စီတပ်စခန်းတစ်ခုကို ဩဂုတ် ၃ရက်တွင် ကချင်လွတ်လပ်ရေးတပ်မတော် (KIA)က သိမ်းပိုက်ပြီးနောက် ယမန်နေ့ ဩဂုတ် ၄ရက် နံနက် ၁၁နာရီခွဲခန့်တွင် စစ်ကောင်စီက အဆိုပါဒေသသို့ လေကြောင်းမှ ဗုံးကြဲတိုက်ခိုက်ခဲ့ခြင်းဖြစ်သည်။
“မနေ့က ပျက်သွားလို့ ၁၁နာရီကျော်လောက်မှာ ဖြစ်သွားလို့ မီးကလည်း မလိစက်ရုံကနေ လွှတ် တဲ့လိုင်းက မီးလွှတ်လို့မရတော့တာ။ ပြန်ပြင်ဖို့တော့ မလွယ်လောက်သေးဘူး။ အဲဒီမှာလည်း တိုက်ပွဲဖြစ်တယ်လို့ ကြားတယ်”ဟု ဒေသခံသတင်းရင်းမြစ်က ပြောသည်။
အဆိုပါ မလိရေအားလျှပ်စစ်စက်ရုံသည် ကချင်လွတ်လပ်ရေးအဖွဲ့(KIO/KIA)ပိုင် ဘူးဂါးကုမ္ပဏီက ဆောင်ရွက်သည့်လုပ်ငန်းဖြစ်ပြီး မြစ်ကြီးနား၊ ဝိုင်းမော်မြို့သို့ ဓာတ်အားပေးပို့ခြင်းဖြစ်သည်ဟုဆိုသည်။
KIA သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူက မလိချောင်းအနီး စစ်ကောင်စီတပ်စခန်း သိမ်းပိုက်နိုင်မှုကို သတင်းကြားရကြောင်း နှင့် ယမန်နေ့တွင် စစ်ကောင်စီက လေကြောင်းက တိုက်ခိုက်လာကြောင်း ပြောပြသည်။
“သူတို့ ဗုံးကြဲတဲ့အတွက် ကျနော်တို့ မလိကနေ ဝိုင်းမော်၊ မြစ်ကြီးနားဘက်ကိုသွယ်ပေးတဲ့ ရေအားလျှပ်စစ်ရဲ့မီးကြိုးတွေ ပျက်စီးသွားတယ်။ အခုတော့ မလိရေအားလျှပ်စစ်ကနေ မြစ်ကြီးနား၊ဝိုင်းမော်ဘက်ပေးတဲ့ဟာ နည်းနည်း အခက်အခဲရှိသွားတာ”ဟု ဗိုလ်မှူးကြီးနော်ဘူက ပြောသည်။
KIAနှင့် စစ်ကောင်စီတပ်တို့သည် ဇူလိုင်လဆန်းမှစ၍ မြစ်ကြီးနား ဗန်းမော်လမ်းတလျှောက်နှင့် နမ်ဆန်ယန်ဒေသတွင် တိုက်ပွဲများနေ့စဉ်နီးပါးဖြစ်ပွားခဲ့သည်မှာတစ်လကျော်ပြီဖြစ်သည်။
