စစ်ကိုင်းတိုင်း ကလေးမြို့ တောင်ဖီလာရပ်ကွက်ရှိ အထက(၂)ကျောင်းရှေ့၌ စစ်ဆေးရေးလုပ်နေသည့် စစ်ကောင်စီတပ်သားများအား မိုင်းဆွဲတိုက်ခိုက်ရာ လေးဦးသေဆုံးကြောင်း ဒေသခံများထံမှ သတင်းရရှိသည်။
ယမန့်နေ့(ဩဂုတ် ၃ရက်)နံနက် ၉နာရီခန့်က တိုက်ခိုက်ရာတွင် စစ်ကောင်စီတပ်သားတစ်ဦး ပွဲချင်းပြီးသေဆုံးပြီး သုံးဦးမှာ ဒဏ်ရာပြင်းထန်စွာရရှိပြီးနောက် သေဆုံးသွားခြင်းဖြစ်သည်ဟု ဒေသခံများက ပြောသည်။
“မိုင်းကွဲပြီးတော့ သူတို့ထဲက တစ်ယောက်က သေတယ်။ သုံးယောက်က လှုပ်တောင်မလှုပ်နိုင်လို့ အနားကအမှိုက်ကားပေါ်ဆွဲတင်သွားတာတွေ့ လိုက်ရတယ်”ဟု မျက်မြင်သက်သေတစ်ဦးက ပြောသည်။
ဒဏ်ရာရရှိသည့် စစ်ကောင်စီတပ်သားများအား ကလေးမြို့ပေါ်ရှိ ကုတင်(၁၀၀)စစ်ဆေးရုံသို့ ပို့ဆောင်ထားသည်ဟု ကလေးမြို့ခံများက ပြောသည်။
သို့သော် စစ်ကောင်စီတပ်သားများသေဆုံးမှုကို People’s Spring က သီးခြားအတည်ပြုနိုင်ခြင်းမရှိသေးပေ။
စစ်ကောင်စီတပ်သားများက အထက (၂)ကျောင်းရှေ့ရှိ ဂေါက်ကွင်းလမ်း၌ အင်အား ၁၅ဦးခန့်ဖြင့် စစ်ဆေးရေးလုပ်နေစဉ် ကလေးမြို့ပြစစ်ဆင်ရေးအဖွဲ့က ဆောင်ရွက်ခဲ့ခြင်းဖြစ်သည်ဟု အဆိုပါအဖွဲ့နှင့်နီးစပ်သူတစ်ဦးက ပြောသည်။
မိုင်းဆွဲတိုက်ခိုက်ခံရပြီးနောက် စစ်ကောင်စီတပ်က ရမ်းသမ်းပစ်ခတ်မှုကြောင့် အရပ်သား ကျည်ထိမှန် ဒဏ်ရာရခဲ့သည်ဟု မျက်မြင်သက်သေတစ်ဦးက ပြောသည်။
