ကချင်ပြည်နယ် ဖားကန့်မြို့နယ် ကသိုဏ်းတောင် စစ်ကောင်စီတပ်စခန်းကို ကချင်လွတ်လပ်ရေးတပ်မတော်(KIA) ပူးပေါင်းတပ်ဖွဲ့က ယမန်နေ့နံနက်အစောပိုင်း၌ တိုက်ခိုက်သိမ်းပိုက်ခဲ့ရာ စစ်ကောင်စီတပ်က ယနေ့ လေကြောင်းမှ တုံ့ပြန်တိုက်ခိုက်ခဲ့သည်ဟု ကချင်ဒေသ စစ်ရေးသတင်းရင်းမြစ်က ပြောသည်။
ယနေ့(ဩဂုတ် ၈ရက်) နေ့လယ် ၃နာရီ ၄မိနစ်အချိန်တွင် လေကြောင်း တိုက်ခိုက်လာခြင်းဖြစ်ပြီး KIA၊PDF ပူးပေါင်းတပ်ဘက်က ထိခိုက်မှုမရှိဟု သတင်းရင်းမြစ်က ပြောသည်။
ထို့အပြင် ဒေသတွင်း စစ်ရေးအခြေအနေများကို ဆက်လက်စုံစမ်းဆဲဟု ဆိုသည်။
“လေကြောင်းက လာတိုက်တယ်။ တိုက်ပြီး လေယာဉ် ဗုံး ၄လုံး ကြဲသွားတယ်။ စစ်ကောင်စီက ဒါထုံးစံပဲ သူတို့ မြေပြင်မှာမနိုင်ရင် တစ်နိုင်ငံလုံး လေယာဉ်နဲ့ ကြဲနေတာပဲ။ အခုလည်း ကသိုဏ်းတောင် ကုန်းကိုပဲကြဲသွားတာ။ အထိအခိုက်ကတော့ အတိအကျမသိသေးဘူး”ဟု ဖားကန့်ဒေသခံက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
ယမန်နေ့ စခန်းသိမ်းတိုက်ပွဲအပြီးတွင် ကသိုဏ်းတောင် တပ်စခန်းကို KIAက တပ်စွဲနေရာယူထားသည်ဟု ဒေသခံက ပြောသည်။
ဖားကန့် ဒေသခံအချို့က ယနေ့ မွန်းလွဲပိုင်းတွင် ပစ်ခတ်သံများ ကြားရသည်ဟု ပြောသည်။
“ဒုန်းဒုန်းဒိုင်းဒိုင်းနဲ့ ပစ်တာတော့ကြားတယ်။ ဘယ်နားပစ်လဲတော့ မသိဘူး။ အသံပဲကြားရတာ”ဟု ဖားကန့်မြို့ခံက ပြောသည်။
ယမန်နေ့က ကသိုဏ်းတောင် စခန်းသိမ်းတိုက်ပွဲတွင် စစ်ကောင်စီတပ်မှ သေဆုံးထိခိုက်ရှိပြီး အရှင်ဖမ်းမိသူများလည်းရှိသည်ဟု ကချင်ဒေသ စစ်ရေးသတင်းရင်းမြစ်က ပြောသည်။ ထို့ပြင် စစ်ကောင်စီတပ်၏ လက်နက်ငယ် ခုနစ်လက် သိမ်းဆည်းရရှိပြီး ခဲယမ်း၊ ကျည်အများအပြားကိုလည်း သိမ်းဆည်းရရှိသည်ဟု ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)