ကလေးမြို့တောင်ပိုင်းရှိ စက္ကန့်ကျေးရွာတွင် နေမကောင်း၍ ဆေးခန်းလာပြသည့် သားအမိနှစ်ဦးကို စစ်ကောင်စီတပ်က သတ်ဖြတ်မီးရှို့သွားကြောင်း ဒေသခံများက ပြောသည်။
အသက်(၅၀)အရွယ် ဒေါ်ဟွေးအီယာန်နှင့်(၃၀)အရွယ် သားဖြစ်သူ ကိုစမြူအဲလ်တို့ကို ဩဂုတ် ၁၂ ရက်တွင် စစ်ကောင်စီတပ်က သတ်ဖြတ်မီးရှို့သွားကြောင်း မျက်မြင်သက်သေများကပြောသည်။
![(စစ်ကောင်စီတပ် သတ်ဖြတ်ခဲ့သော သားအမိနှစ်ဦးအား တွေ့ရစဥ်)](https://i0.wp.com/www.ludunwayoo.com/wp-content/uploads/2023/08/366836567_630223892509740_5274073808034719339_n.jpg?resize=599%2C940&ssl=1)
“သူ့အမေနေမကောင်းလို့ သားဖြစ်သူက ကလေးမြို့ကို ဆေးခန်းပြဖို့သွားပို့တာ။ လမ်းမှ စစ်ကောင်စီတပ်နဲ့ တိုးပြီး သတ်ခံလိုက်ရတာ”ဟု ဒေသခံတစ်ဦးက ပြောသည်။
သေဆုံးသူနှစ်ဦး၏ ရုပ်အလောင်းများကို ဒေသခံများက ဩဂုတ် ၁၂ ရက် ညနေပိုင်းတွင်တွေ့ရှိခဲ့ခြင်းဖြစ်သည်။
စစ်ကောင်စီသတ်ဖြတ်ခဲ့သူများမှာ ကလေးမြို့တောင်ပိုင်းရှိ ကျွန်းချောင်းကျေးရွာမှ ဖြစ်သည်ဟု ၎င်းဆွေမျိုးကအတည်ပြုကြောင်း ဒေသခံတစ်ဦးက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
ကလေးမြို့တောင်ပိုင်းကို စစ်ကြောင်းထိုးရန်လာသည့် စစ်ကောင်စီတပ်ကို ကလေးမြို့လှရပ်ကွက်နှင့် စက္ကန့်ကျေးရွာကြားတွင် ဒေသခံကာကွယ်ရေးတပ်များက ဩဂုတ် ၁၁ရက်တွင် ဝင်ရောက်ခိုက်ခဲ့ခြင်းဖြစ်သည်။
တိုက်ပွဲတွင် စစ်ကောင်စီတပ်သား ခုနစ်ဦးသေဆုံးပြီး ဒေသခံကာကွယ်ရေးတပ်များဘက်က တစ်ဦးကျဆုံးခဲ့သည်။
တိုက်ခိုက်မှုအပြီး စစ်ကောင်စီတပ်က ကျေးရွာဒေသခံ ၁၅ ဦးခန့်ကို ဓားစာခံအဖြစ် ဖမ်းဆီးထားပြီးနောက် အထက်ပါသားမိနှစ်ဦးကို စက္ကန့်ရွာအဝင်တွင် သတ်ဖြတ်ခဲ့ခြင်းဖြစ်သည်။
စစ်ကောင်စီတပ်က စက္ကန့်ရွာကိုလည်း ဩဂုတ် ၁၂ ရက်က မီးရှို့ဖျက်ဆီးသွားကြောင်းလည်း ဒေသခံများက ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)