အခေါက်ရွှေတစ်ကျပ်သားလျှင် ကျပ် သိန်း ၄၀ ခန့်နှင့် တစ်ဒေါ်လာကို ကျပ် ၄၀၀၀ အထိ မြင့်တက်လာပြီးနောက် ရွှေနှင့်ငွေလဲလုပ်ငန်းရှင်များကို စစ်ကောင်စီက လိုက်လံဖမ်းဆီးနေကြောင်း လုပ်ငန်းရှင်အသိုင်းအဝိုင်းကသိရသည်။
ယခုရက်ပိုင်းရွှေနှင့်ဒေါ်လာဈေး တရှိန်ထိုးမြင့်တက်လာပြီးနောက်ယနေ့ ( ဩဂုတ် ၁၉ ရက် )တွင် စစ်ကောင်စီ ထောက်လှမ်းရေးက လိုက်လံဖမ်းဆီးနေသောကြောင့်ဈေးကွက်မဖွင့်နိုင်ဘဲ၊ ရွှေနှင့်ငွေလဲလုပ်ငန်းဆောင်ရွက်သူအချို့ကို ဖမ်းဆီးခံခဲ့ရကြောင်း လုပ်ငန်းရှင်အချို့ကပြောသည်။
ယနေ့ရွှေဈေးကွက်တွင် အခေါက်ရွှေတစ်ကျပ်သားကို ကျပ် ၃,၉၈၅,၀၀၀မှ ကျပ် သိန်း ၄၀ အထိ မြင့်တက်လာပြီး အမေရိကန် တစ်ဒေါ်လာကို ကျပ် ၃၉၀၀မှ ကျပ် ၄၀၀၀ ကြား ပေါက်ဈေးရှိနေသည်ဟု ဈေးကွက်အတွင်းမှ သိရသည်။
“ဈေးကွက်ထဲမှာတော့ ပေါက်ဈေးက မျိုးစုံပြောနေကြတယ်။ဒီနေ့ဆို အဖမ်းအဆီးများလို့ ဈေးကွက်ကိုမဖွင့်နိုင်ဘူး။ ပါးစပ်ဈေးပဲရှိတယ်”ဟု ငွေလဲလုပ်ငန်းဆောင်ရွက်နေသူတစ်ဦးကပြောသည်။
ဈေးကွက်အတွင်း ဒေါ်လာဈေးနှင့် ငွေလဲဈေးနှုန်းကို လူမှုကွန်ယက်များပေါ်တွင် တင်ပေးသူများကို စစ်ကောင်စီက ပစ်မှတ်ထားဖမ်းဆီးနေခြင်းဖြစ်သည်ဟု ရွှေလုပ်ငန်းရှင်တစ်ဦးကပြောသည်။ စစ်ကောင်စီကဖမ်းဆီးသူများသည် ရွှေဈေးနှင့်ဒေါ်လာဈေးတင်သူအများစုဖြစ်သည်ဟုလည်း ၎င်းကဆက်ပြောသည်။
“ဈေးတွေတက်တာ အွန်လိုင်းမှ ဈေးနှုန်းတွေတင်လို့ ဒီကောလဟာလတွေကြောင့်ဈေးတက်တယ်လို့ သူတို့ (စစ်ကောင်စီ)က ထင်နေတယ်”ဟု ၎င်းကဆက်ပြောသည်။
လက်ရှိရွှေဈေး၊ ဒေါ်လာဈေးမြင့်တက်လာရခြင်းမှာ စစ်ကောင်စီ၏ ကျပ်ငွေနှစ်သောင်းတန် အသစ်ထုတ်ဝေခြင်းနှင့် နိုင်ငံတကာက ပိတ်ဆို့အရေးယူမှုများကြောင့်ဖြစ်သည်ဟု ရန်ုကုန်မြို့အခြေစိုက် စီးပွားရေးလုပ်ငန်းရှငတစ်ဦးကပြောသည်။
