ကိုးကန့်တိုက်ပွဲများအတွင်း စစ်ကောင်စီတပ်ထံမှ သံချပ်ကာနှင့်တင့်ကားယာဉ် ၅စီးကိုသိမ်းဆည်းထားနိုင်ကြောင်း ကိုးကန့်တပ်မတော်(MNDAA) ပြောရေးဆိုခွင့်ရှိသူ လီကျာဝင်းက လူထုနွေဦးသို့ အတည်ပြုပြောကြားသည်။
၁၀၂၇ စစ်ဆင်ရေးကာလအတွင်း စစ်ကောင်စီ၏ သံချပ်ကာနှင့်တင့်ကားယာဉ် ၆စီး သိမ်းဆည်းထားနိုင်ပြီဖြစ်ကြောင်း စစ်ရေးသတင်းရင်းမြစ်၏ ပြောကြားခဲ့ခြင်းနှင့်ပတ်သက်ပြီး မေးမြန်းရာ ၎င်းသိရှိထားသည်မှာ ၅စီးဟု ပြောသည်။
“ဖောင်းဆိုင်ဘက်မှာ ၃စီးပါ။ ၂စီးကတော့ ဖြိုခွဲဖျက်ဆီးနိုင်ခဲ့တယ်။တစ်စီးကိုတော့သိမ်းဆည်းရရှိတယ်ပေါ့။ အားလုံးစုစုပေါင်းတော့ ၅စီးပေါ့”ဟု MNDAA ပြောရေးဆိုခွင့်ရှိသူက ပြောသည်။
ချင်းရွှေဟောဒေသရှိ စစ်ကောင်စီ၏ အခိုင်အမာတပ်စခန်းဖြစ်သည့် မာကြာတစ်ပေါက်ပေါက်တောင်ကုန်း တပ်စခန်းကို တိုက်ခိုက်သိမ်းပိုက်ခဲ့ရာ ယင်းစခန်းမှ သံချပ်ကာ စစ်ကား၂စီးကို ဖျက်ဆီးနိုင်ခဲ့ကြောင်း အောက်တိုဘာ ၂၈ရက် တိုက်ပွဲသတင်းဖော်ပြရာ၌ MNDAAက အသိပေးထာသည်။
၁၀၂၇ စစ်ဆင်ရေးအတွင်း စစ်ကောင်စီတပ်စခန်း ၇၀ကျော်ကိုသိမ်းပိုက်ထားနိုင်ပြီးဖြစ်ကြောင်း MNDAA တာဝန်ရှိသူကယမန်နေ့တွင်ပြောကြားသည်။ယနေ့တွင်လည်း စစ်ကောင်စီတပ်စခန်း ၅ခုခန့်ကိုမဟာမိတ်တပ်များကတိုက်ပိုက်သိမ်းပိုက်ထားနိုင်ခဲ့သည်။ တိုက်ပွဲများအတွင်းမှလည်း စစ်လက်နက်ခဲယမ်းများစွာကိုသိမ်းပိုက်ရရှိထားသည်။
Public Service Announcement
