မိုင်းလားလက်နက်ကိုင်အဖွဲ့(NDAA)ဟု ခေါ်ဆိုသည့် ရှမ်းပြည်နယ်အရှေ့ပိုင်း အထူးဒေသ(၄)က ကိုးကန့်ဒေသ တိုက်ပွဲနှင့်ပတ်သက်ပြီး ယနေ့ ကြေညာချက်ထုတ်ပြန်ခဲ့ရာ ၎င်းတို့အနေဖြင့် ဘက်မလိုက်သည့် နိုင်ငံရေးရပ်တည်ချက်အတိုင်း ရပ်တည်ကျင့်သုံးကြောင်း အသိပေးသည်။
မည်ကဲ့သို့သော လက်နက်ကိုင်ပဋိပက္ခမျိုးတွင်မဆို မည်သည့် ပုံသဏ္ဍန်မျိုးနှင့်မှ ဝင်ရောက်ပါဝင်ခြင်း စွက်ဖက်ခြင်းပြုမည်မဟုတ်ကြောင်း ဖော်ပြသည်။
NDAAအနေဖြင့် တိုင်းရင်းသား လူမျိုးစုများ၏ စည်းလုံးညီညွတ်ရေး၊ဒေသတွင်း ဖွံ့ဖြိုးတိုးတက်ရေးအတွက် အစဉ်အမြဲ ကြိုးပမ်းရင်း နယ်စပ်ဒေသရှိ တိုင်းရင်းသား လူမျိုးစုများအားလုံး အတွက်သဟဇာတဖြစ်သော ချမ်းသာကြွယ်၀သော လူမှုပတ်ဝန်းကျင်တစ်ရပ် ဖန်တီးတည်ဆောက်ပြီး နယ်စပ်ဒေသ တည်ငြိမ်အေးချမ်းရေးအတွက် ဆက်လက် ထိန်းသိမ်းစောင့်ရှောက်မည်ဟု ထုတ်ပြန်သည်။
မြန်မာ-တရုတ် နယ်စပ်တစ်လျှောက် စစ်ရေးပဋိပက္ခများ ဖြစ်ပွားနေပြီးပြည်သူများ အသက်အိုးအိမ် စည်းစိမ်ဆုံးရှုံးမှုနှင့် စစ်ဘေးရှောင် ဖြစ်နေရမှုအပေါ် လွန်စွာ စိတ်မကောင်းဖြစ်ရကြောင်း ထုတ်ပြန်ခဲ့ပြီး လက်ရှိ အခင်းအကျင်းနှင့်ပတ်သက်ပြီး အထက်ပါအတိုင်း ထုတ်ပြန်ကြေညာခဲ့ခြင်းဖြစ်သည်။
၀လက်နက်ကိုင်တပ်(UWSA)ကလည်း ယနေ့တွင် ကြေညာချက် ထုတ်ပြန်ပြီး ကိုးကန့်တိုက်ပွဲ၌ ဘက်မလိုက်ရေးမူကို ကျင့်သုံးကြောင်း ဖော်ပြထားပြီး အကယ်၍ ၀နယ်အတွင်း လေကြောင်းကြည်းကြောင်းမှ စစ်ရေးဆိုင်ရာ နယ်မြေကျူးကျော်မှုများရှိလာပါက တုံ့ပြန်တိုက်ထုတ်သွားမည်ဖြစ်ကြောင်း အသိပေးထားသည်။
Public Service Announcement
ယခု စစ်ကောင်စီတပ်ကို တိုက်ခိုက်နေသည့် ကိုးကန့်(MNDAA)၊ တအာင်း(TNLA)၊ ရခိုင်(AA) တပ်များသည် ၀နှင့် မိုင်းလား တပ်ဖွဲ့များနှင့်အတူ ပြည်ထောင်စုနိုင်ငံရေးဆွေးနွေးညှိနှိုင်းရေးကော်မတီ(FPNCC) အဖွဲ့ဝင်များဖြစ်သည်။ ထို့ပြင် မိုင်းလားခေါင်းဆောင်သည် ကွယ်လွန်သွားပြီဖြစ်သည့် MNDAA ခေါင်းဆောင် ဦးဖုန်ကြားရှင်၏ သားမက်ဖြစ်သည်။
