ဌာနဆိုင်ရာရုံးများအားလုံးလည်း ဆိုင်းဘုတ်ဖြုတ်ချထား
ရှမ်းပြည်နယ်မြောက်ပိုင်း ကျောက်မဲမြို့နယ်မှ ဌာနဆိုင်ရာရုံးများအားလုံး ဆိုင်းဘုတ်ဖြုတ်ချလိုက်ပြီး ဝန်ထမ်းများ မနေကြတော့သလို မြို့မရဲစခန်းကလည်း တိုက်ခိုက်မခံရစေရန် သာသနာ့အလံစိုက်ထူပြီး ရဲအားလုံး စွန့်ခွာသွားကြောင်း သတင်းရရှိသည်။
ကျောက်မဲမြို့မရဲစခန်းအဝင်ဝ၌ သာသနာ့အလံစိုက်ထူထားသည်ကို ဒေသခံများက ယနေ့ (နိုဝင်ဘာ ၁ရက်) စတင်တွေ့ရှိခြင်းဖြစ်သည်။
” ရဲစခန်းကအချုပ်သားတွေကို စစ်တပ်ထဲ ခေါ်ထတယ်။ ရဲတွေအကုန်လုံးလည်း စကခ(၁)ထဲ သွားနေတယ်။သာသနာ့အလံက အန္တရာယ်ကင်းအောင်ထောင်ထားတာတဲ့။ သောက်ပိန်းတွေပါ”ဟု ကျောက်မဲမြို့ခံတစ်ဦးက ပြောသည်။
ကျောက်မဲမြို့နယ် အထွေထွေအုပ်ချုပ်ရေးမှူးရုံးအပါအဝင် ဌာနဆိုင်ရာရုံးများအားလုံးလည်း ၀ဆိုင်းဘုတ်များဖြုတ်ချလိုက်ပြီး ဝန်ထမ်းများအားလုံးမှာ ကျောက်မဲမြို့အခြေစိုက် အမှတ်(၁) စစ်ဆင်ရေးကွပ်ကဲမှုဌာနချုပ် -စကခ(၁) အတွင်း တိမ်းရှောင်နေကြသည်။
“ရုံးတွေရော စခန်းတွေမှာပါ အစောင့်တွေပဲချန်ထားပြီး ညဆိုမီးပိတ်ထားတယ်။ ဘာရုံးလုပ်ငန်းမှ မလုပ်နိုင်တော့ဘူး”ဟု ဒေသခံတစ်ဦးက ပြောသည်။
Public Service Announcement
ကျောက်မဲမြို့သည် မြောက်ပိုင်းမဟာမိတ်တပ်ဖွဲ့ ထိန်းချုပ်ထားသည့် နောင်ချိုမြို့နှင့် တဆက်တည်းရှိနေသော မြို့ဖြစ်သည်။ ကျောက်မဲမြို့တွင် လက်ရှိအချိန်အထိ တိုက်ပွဲဖြစ်ပွားခြင်းမရှိသေးသော်လည်း မြို့နယ်ပတ်ဝန်းကျင်၌ စစ်ရေးလှုပ်ရှားမှုများရှိနေသည်။
ယနေ့ နံနက်ပိုင်းတွင် စစ်ကောင်စီက ကျောက်မဲမြို့ပြင်ဘက်သို့ လက်နက်ကြီးများဖြင့် ပစ်ခတ်ခဲ့သည်။
