▪︎စစ်ကိုင်းတိုင်းတွင်မြို့သိမ်းတိုက်ပွဲ ပထမဆုံးအောင်မြင်သောမြို့ဖြစ်လာ
ခရိုင်မြို့ကြီးဖြစ်သော ကောလင်းမြို့တမြို့လုံးကို ပြည်သူ့ကာကွယ်ရေးတပ်မတော် (PDF )နှင့် မဟာမိတ်များက သိမ်းပိုက်လိုက်နိုင်ပြီဖြစ်ကြောင်း PDFများနှင့် စစ်ရေးသတင်းရင်းမြစ်များကပြောသည်။
နိုဝင်ဘာ ၃ ရက်မနက်မှ စတင်ခဲ့သော ကောလင်းမြို့သိမ်းတိုက်ပွဲမှာ ၃ ရက်ဆက်အပြင်းအထန်ဖြစ်ခဲ့ပြီး မြို့တွင်းကျန်ရှိနေသော စစ်သားများကို စစ်ကောင်စီကလေကြောင်းမှ အပြင်းအထန်စစ်ကူပေးခဲ့သော်လည်း ယနေ့နံနက်တွင်နောက်ဆုံးကျန်ရှိသောထွေအုပ်ရုံးကိုသိမ်းပိုက်နိုင်ခဲ့ကြောင်းသိရသည်။
“တမြို့လုံးကို ထိန်းနိုင်ပါပြီ။ ပုဒ်မမျိုးစုံတပ်ပြီး ဖမ်းထားတဲ့ ကျတော်တို့ မြို့က နိုင်ကျဉ်းတွေ၊ အကျဉ်းသားတွေ အကုန်ကယ်ထုတ်နိုင်ပါပြီ” ဟု ပြည်သူ့ကာကွယ်ရေးထောက်ပို့ ရဲဘော်တစ်ဦးကပြောသည်။
နိုဝင်ဘာ ၃ ရက်ညနေတွင်ကောလင်းမြို့ရဲစခန်းအချုပ်မှ နိုင်ငံရေးအကျဉ်းသားများအပါအဝင် အကျဉ်းသားအားလုံးကို ကယ်ထုတ်နိုင်ခဲ့ခြင်းဖြစ်ကြောင်းသိရသည်။
စစ်ကောင်စီတပ်ဖွဲ့ဝင်များနောက်ဆုံးကျန်ရှိသော ကောလင်းမြို့ထွေအုပ်ရုံးရှိ စစ်ကောင်စီတပ်ဖွဲ့ဝင်များက ယနေ့နံနက်တွင် လက်နက်ချခဲ့ပြီးနောက်မြို့ကိုထိန်းချုပ်နိုင်ခဲ့ခြင်းဖြစ်ကြောင်း ဒေသတွင်းသတင်းရင်းမြစ်များကပြောသည်။
Public Service Announcement
သို့သော် ထောက်ပို့PDF တစ်ဦးကမူ ထွေအုပ်ရုံးမှ စစ်သား ၆ ဦးလက်နက်ချခဲ့ခြင်းဖြစ်ပြီး စစ်ကောင်စီတပ်သားအချို့ကျန်သေးကြောင်းပြောသည်။ သို့သော် အဆိုပါအချက်ကို People’s Spring ကသီးခြားအတည်မပြုနိုင်သေးပါ။
စစ်ရေးသတင်းရင်းမြစ်တစ်ဦးကမူ ကောလင်းမြို့မှနောက်ဆုံးကျန်သောစစ်ကောင်စီတပ်သားများမှ လက်နက်ချခြင်းရှိ၊မရှိကို အသေးစိပ်မသိသော်လည်း နေ့နံနက်တွင် မြို့ကို သိမ်း နိုင်ပြီဆိုသည်မှာ မှန်ကန်ကြောင်းပြောသည်။
“စစ်ကိုင်းတိုင်း၊ ခရိုင်မြို့ကြီးဖြစ်တဲ့ ကောလင်းကို စစ်ဒေသ ၁ PDF နဲ့ မဟာမိတ်များ သိမ်းပိုက်ရရှိ။တလှိုင်းပြီး တလှိုင်း လာမယ်” ဟု သပိတ်ခေါင်းဆောင် ဒေါက်တာတေဇာဆန်း က၎င်း၏ ဖေစ်ဘွခ်တွင်ရေးသားထားသည်။
ကောလင်းခရိုင် တွင်ပင်လယ်ဘူးမြို့ ၊ဝန်းသို ၊ကောလင်းမြို့သုံးမြို့ပါဝင်သည်။ ကောလင်းမြို့မှာ လူဦးရေ နှစ်သောင်းခွဲကျော်နေထိုင်သောမြို့ဖြစ်သည်။ထိုကြောင့် စစ်ကိုင်းတိုင်းတွင် တော်လှန်ရေးအဖွဲ့များက မြို့ သိမ်းတိုက်ပွဲအောင်မြင်စွာဆင်နွှဲနိုင်သည်မှာ ကောလင်းမြို့မှာ ပထမဆုံးဖြစ်လာသည်။
ကောလင်းမြို့ရဲစခန်းကို နိုဝင်ဘာ ၅ ရက်က အပြီးသတ်တိုက်ခိုက်သိမ်းပိုက်ရာတွင် သေနတ် ၄ဝ ကျော် သိမ်းနိုင်ခဲ့ကြောင်း PDF တစ်ဦးက ပြောသည်။ နိုင်ငံရေးအကျဉ်းသားများအပါအဝင် အချုပ်သားများအားလုံးကို ဘေးလွတ်ရာသို့ပို့ဆောင်ပြီးဖြစ်ကြောင်းလည်းဒေသခံများကပြောသည်။
စစ်ကောင်စီတပ်က လေကြောင်းမှ တိုက်ခိုက်မှုများဆက်တိုက်ပြုလုပ်ခဲ့သောကြောင့် တော်လှန်ရေးအဖွဲ့များက မြို့ခံများကို ဆက်တိုက်ရွေ့ပြောင်းပေးခဲ့သည်။စစ်တပ်ကလေကြောင်းမှ တိုက်ခိုက်မှု နှင့် တွေသမျှ ပစ်ခတ်မှုတို့ကြောင့် အနည်းဆုံးဒေသခံပြည်သူ ၂၀ ကျော်သေဆုံးခဲ့ကြောင်းဒေသခံအချို့ကပြောသည်။
“ဒီမနက် လေယာဉ်ဝဲနေတယ်။ Air Strike တော့ မလုပ်သေးဘူး။ ဝန်းသိုဘက်ကနေ အင်အား ၇ဝ နဲ့ ခြေလျင်တက်လာတယ်လို့ သတင်းရတယ်” ဟု ထောက်ပို့ရဲဘော်ကပြောသည်။
လက်ရှိတွင် ကောလင်းမြို့ပေါ်၌ စစ်ကောင်စီတပ်စွဲထားသည့်နေရာတခုမှမရှိတော့ဘဲ ပြည်သူ့ကာကွယ်ရေးတပ်ဖွဲ့များကထိန်းချုပ်ထားသည်ဟု တော်လှန်ရေးအင်အားစုများကပြောသည်။
