ရှမ်းပြည်နယ်မြောက်ပိုင်း နမ့်ခမ်းမြို့ ရဲစခန်းကို တအာင်းတပ်မတော်(TNLA)က ယမန်နေ့တွင် တိုက်ခိုက်သိမ်းပိုက်ခဲ့ရာ စခန်းသိမ်းအပြီး မှတ်တမ်းဓာတ်ပုံများကို TNLAက ယနေ့ ထပ်မံ ထုတ်ပြန်သည်။
၁၀၂၇ စစ်ဆင်ရေး ၁၀ရက်မြောက်နေ့ဖြစ်သည့် နိုဝင်ဘာ ၅ရက်တွင် နမ့်ခမ်းရဲစခန်းအပါအဝင် နမ့်ခမ်းမြို့နယ်အတွင်းရှိ စစ်ကောင်စီတပ်စခန်း ၃ခု၊ နမ္မတူမြို့နယ်နှင့် မန်တုံမြို့နယ်ရှိ တပ်စခန်း ၂ခု စုစုပေါင်း တပ်စခန်း ၅ခုကို TNLAက သိမ်းပိုက်နိုင်ခဲ့ခြင်းဖြစ်သည်။
![(ဓါတ်ပုံ-TNLA)](https://i0.wp.com/www.ludunwayoo.com/wp-content/uploads/2023/11/399092455_674454918086637_1206518253705573951_n.jpg?resize=880%2C660&ssl=1)
ယနေ့ ဖော်ပြခဲ့သည့် နမ့်ခမ်းရဲစခန်း သိမ်းပိုက်မှု မှတ်တမ်းဓာတ်ပုံများတွင် လုံခြုံရေးကင်းဘန်ကာများ အခိုင်အမာ တည်ဆောက်ထားသည့် နမ့်ခမ်းမြို့မရဲစခန်းရှေ့နှင့် ရဲစခန်းအတွင်း အလံတိုင်ရှေ့၌ TNLA ရဲဘော်များ စုစည်း၍ ဓာတ်ပုံရိုက်နေသည့် မြင်ကွင်းနှင့် မြို့တွင်း၌ လုံခြုံရေးယူထားသည့် အခြေအနေတို့ကို ဖော်ပြခဲ့သည်။
TNLAသည် ၁၀၂၇ စစ်ဆင်ရေးကာလအတွင်း စစ်ကောင်စီတပ်စခန်း ၊ ရဲစခန်းနှင့် ပြည်သူ့စစ်စခန်း စုစုပေါင်း၃၀ကျော်ကို တိုက်ခိုက်သိမ်းပိုက်ထားပြီးဖြစ်သည်။ သိမ်းပိုက်သည့် စခန်းများတွင် စစ်ရေးအတွက် အရေးပါလှသော စစ်စခန်းကြီးများ ပါဝင်သည်။
![(ဓါတ်ပုံ-TNLA)](https://i0.wp.com/www.ludunwayoo.com/wp-content/uploads/2023/11/399105075_674454934753302_7357769162785246429_n.jpg?resize=880%2C495&ssl=1)
ထို့အပြင် ရှမ်းမြောက်သို့စစ်ကူလာရန် ကြိုးပမ်းနေသည့် စစ်ကောင်စီတပ်များကိုလည်း ကြားဖြတ်တိုက်ခိုက်မှုများ ပြုလုပ်ခဲ့ရာ ယမန်နေ့တွင် စစ်ကောင်စီ ကား ၄စီးနှင့် လက်နက်အချို့ကို သိမ်းပိုက်ရရှိခဲ့သည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
Public Service Announcement
![](https://i1.wp.com/ludunwayoo.com/wp-content/uploads/2021/08/banner-logo1-50px.png)