ရှမ်းပြည်နယ်မြောက်ပိုင်း ကျောက်မဲမြို့အဝင် တိုးဂိတ်ကို စစ်ကောင်စီက လေကြောင်းမှ တိုက်ခိုက်ရာ ပြည်သူများ၏ ကုန်တင်ယာဥ်များ မီးလောင်ပျက်စီးခဲ့ရကြောင်း ဒေသခံများက ပြောသည်။
” စစ်တပ်က လေကြောင်းကနေ ပစ်သွားတာပါ။ လေကြောင်းပစ်ပြီးတဲ့နောက် စခ(စစ်ကောင်စီတပ်သား)တွေက မြိုထဲလမ်းမှာ အော်ဟစ်ဆဲဆိုသွားတယ်”ဟု ကျောက်မဲမြို့ခံတစ်ဦးက ပြောသည်။
ယခု ပစ်ခတ်ဖျက်ဆီးခံရသော တိုးဂိတ်သည် လားရှိုးမြို့ဘက်သို့သွားသည့် ပြည်ထောင်စုလမ်းမ၌ ရှိသည်။
ယမန်နေ့က ကျောက်မဲမြို့နယ်၊ ကောင်းမူးလိန်ကျေးရွာအနီးတွင် အင်အား ၁၀၀ခန့်ရှိ စစ်ကောင်စီစစ်ကြောင်းကို တအာင်းအမျိုးသားလွတ်မြောက်ရေးတပ်မတော် (TNLA) က တိုက်ခိုက်ခဲ့ရာ စစ်ကောင်စီတပ် အထိနာခဲ့သည်။
ထို့နောက် ညဘက်တွင် မြို့အဝင် တိုးဂိတ်အား လေကြောင်းမှ ဗုံးကြဲတိုက်ခိုက်ခြင်းဟု ဒေသခံများက ပြောသည်။ ယင်းသို့ အင်အားသုံးတိုက်ခိုက်မှုအတွက် ကျေနပ်ကြောင်း စစ်ကောင်စီ၏ ဝါဒဖြန့် အကောင့်အချို့က ရေးသားနေသည်။
Public Service Announcement
ယခု ကျောက်မဲမြို့အဝင် တိုးဂိတ်တိုက်ခိုက်ခံရမှု၌ အရပ်သားထိခိုက်မှုရှိ၊မရှိ မသိရသေးပေ။ ပြည်သူများ၏ ကုန်တင်ယာဥ် သုံးစီး မီးလောင်ပျက်စီးခဲ့သည်။
စစ်ကောင်စီသည် နိုဝင်ဘာ ၂၆ရက်နှင့် ၂၇ရက်က မူဆယ်(၁၀၅)မိုင် ကုန်သွယ်ရေးဇုံနှင့် ပတ်ဝန်းကျင်ကို လေကြောင်းနှင့် လက်နက်ကြီး အသုံးပြုတိုက်ခိုက်မှတိုက်ခိုက်ခဲ့ရာ (၇)နှစ်အရွယ်ကလေးငယ်တစ်ဦးအပါအဝင် ငါးဦးသေဆုံးခဲ့သည်။
ပြည်သူလူထုအား လက်နက်ကြီးများဖြင့် ပစ်ခတ်သတ်ဖြတ်နေသောစခန်းများကို တစ်ခုပြီး တစ်ခု ဆက်လက်တိုက်ခိုက်သွားမည်ဖြစ်ကြောင်း မြောက်ပိုင်းမှာမိတ်သုံးဖွဲ့က သတင်းထုတ်ပြန်ထားသည်။
