ရှမ်းပြည်နယ်မြောက်ပိုင်း နမ့်ခမ်းမြို့နယ် မိုင်းဝီး ဒေသ၌ တအာင်းတပ်မတော်(TNLA)က မိုင်းခွဲတိုက်ခိုက်၍ ကချင်လွတ်လပ်ရေးအဖွဲ့(KIO/KIA) အရပ်ဘက်၊ စစ်ဘက်ဝန်ထမ်း နှစ်ဦးကျဆုံးခဲ့ရခြင်းဖြစ်ရပ်နှင့်ပတ်သက်ပြီး မေးမြန်းမှုများ လက်ခံရရှိပြီး ဖြစ်စဉ်ကို စုံစမ်းနေကြောင်း TNLA သတင်းပြန်ကြားရေး အရာရှိက ပြောသည်။
ဒီဇင်ဘာ ၅ရက်တွင် မိုင်းခွဲမှုကြောင့် KIO တိုက်နယ်အဆင့် အုပ်ချုပ်ရေးတာဝန်ခံနှင့် ဒုတပ်ကြပ်တစ်ဦး သေဆုံးခဲ့ရကြောင်း ကချင်သတင်းဌာန KNGက ဖော်ပြထားသည်။ အဆိုပါ ဖြစ်စဉ် သတင်းပေးပို့ချက် ရရှိပြီး အသေးစိတ် အခြေအနေ စုံစမ်းနေဆဲဖြစ်ကြောင်း KIO/KIA သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူကလည်း KNGသို့ ဖြေကြားထားသည်။
တော်လှန်ရေးလုပ်ငန်းများအတွက် TNLA ထံသို့သတင်းပို့ရန် သွားစဥ် မိုင်းခွဲတိုက်ခိုက်မှုကြောင့် KIO မှ အရပ်ဘက် စစ်ဘက် ဝန်ထမ်း ၂ ဦးကျဆုံးခဲ့ကြောင်း KIO/KIA ၏ ရုံးစာတစ်စောင့်တွင်လည်း အတည်ပြုဖော်ပြထားသည်ကိုတွေ့ရသည်။
ယင်းဖြစ်စဉ်အပေါ် TNLA ဘက်သို့ မေးမြန်းရာ ဖြစ်စဉ်နှင့်ပတ်သက်၍ မေးမြန်းမှုများရှိသော်လည်း အသေးစိတ် အချက်အလက်များ တက်မလာသေးဟု ပြောပြသည်။
“သူတို့ကို စုံစမ်းခိုင်းထားတယ်။ အချက်အလက် တော့ မပို့လာသေးဘူး”ဟု TNLA အရာရှိ တစ်ဦးက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2024/01/PSA_Inside_Story_Nutrition-First-1000-Days-scaled.jpg?resize=880%2C215&ssl=1)
Public Service Announcement
KIAနှင့်TNLA တို့သည် မဟာမိတ်ဆက်ဆံရေးရှိထားပြီးဖြစ်သည့် အဖွဲ့များဖြစ်ပြီး ၁၀၂၇ စစ်ဆင်ရေး မစတင်မီကပင် နှစ်ဖက်ခေါင်းဆောင်များ တွေ့ဆုံဆွေးနွေးမှု ပြုလုပ်ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)