ရိုဟင်ဂျာ ဒုက္ခသည်တွေ ဝင်ရောက်မှုကို နောက်ထပ် လက်ခံပေးတော့မှာ မဟုတ်ဘူးလို့ ဘင်္ဂလားဒေ့ရှ် အစိုးရက အတည်ပြု ပြောကြားခဲ့ပါတယ်။
ဖေဖော်ဝါရီ ၇ ရက်မှာ ဘင်္ဂလားဒေ့ရှ် သယ်ယူပို့ဆောင်ရေး ဝန်ကြီးက ရိုဟင်ဂျာ ဒုက္ခသည်တွေကို အမြောက်အမြားကို လက်ခံထားရခြင်းဟာ နိုင်ငံရဲ့ လုံခြုံရေး ကဏ္ဍကိုပါ ထိပါး ခြိမ်းခြောက်လာတဲ့အတွက် အခုလို ဆုံးဖြတ်ခဲ့တာလို့ မှတ်ချက် ပေးသွားခဲ့ပါတယ်။
၂၀၁၇ မှာ မြန်မာစစ်တပ်ရဲ့ ရက်ရက်စက် ဖြိုခွင်းမှုတွေ စတင်ခဲ့ချိန် ကတည်းက သိန်းနဲ့ချီ များပြားတဲ့ ရိုဟင်ဂျာတွေဟာ ဘင်္ဂလားဒေ့ရှ်ပိုင် ကော့စ်ဘဇားနဲ့ တခြား ဒုက္ခသည် စခန်းတွေဆီ အလုံးအရင်း လာရောက် ခိုလှုံနေပါတယ်။
ဘင်္ဂလားဒေ့ရှ်ဟာ ရိုဟင်ဂျာ တစ်သန်းနီးပါးကို လက်ခံထားပြီး ဖြစ်တာကြောင့် နောက်ထပ် အရေအတွက် တိုးမြှင့် လက်ခံဖို့ ဆိုတာ ကိုယ်တိုင်အတွက် ဝန်ထုပ်ဝန်ပိုး ဖြစ်လာလိမ့်မယ်လို့ လမ်း၊ တံတားနဲ့ သယ်ယူပို့ဆောင်ရေး ဝန်ကြီး အိုဘိုင်ဒူလ် ကွမ်ဒါက ပြောပါတယ်။
နောက်ပြီး ရိုဟင်ဂျာတွေအတွက် နိုင်ငံတကာ ထောက်ပံ့မှုတွေကပါ သိသိသာသာ လျော့ကျသွားတဲ့ အနေအထားမှာ သူတို့ကို ဘယ်လို ဆက်လက်ပြီး အကူအညီ ပေးမလဲလို့လည်း ဝန်ကြီးက မေးခွန်း ထုတ်သွားပါတယ်။
Public Service Announcement
ကော့စ်ဘဇားမှာရှိတဲ့ ဘင်္ဂလားဒေ့ရှ် ဒုက္ခသည်ရေးရာနဲ့ ပြန်လည် နေရာချထားရေး ကော်မရှင် အကြီးအကဲ မိုဟာမက် မီဇာနော် ရာမန်ကလည်း ရိုဟင်ဂျာ အရေးဟာ ဘင်္ဂလားဒေ့ရှ်အတွက် အလွန်အကျွံ ဝန်ပိတဲ့ ကိစ္စကြီး ဖြစ်လာနေတယ်လို့ ပြောပါတယ်။
ကွမ်ဒါရော ရာမန်ကပါ ကုလသမဂ္ဂ အပါအဝင် နိုင်ငံတကာ အဖွဲ့အစည်းတွေဆီကနေရိုဟင်ဂျာတွေကို ပံ့ပိုးဖို့ အထောက်အပံ့တွေ ပိုမို လိုအပ်ကြောင်း မှတ်ချက်ပေးခဲ့ပြီး ဒီကိစ္စနဲ့ ပတ်သက်လို့ ကုလသမဂ္ဂရဲ့ ဒုက္ခသည်ရေးရာ မဟာမင်းကြီးရုံး (UNHCR)က ဘာမှ မတုံ့ပြန်သေးဘူးလို့လည်း သိရပါတယ်။
ပြီးခဲ့တဲ့ ဇန်နဝါရီ လဒုတိယပါတ်က ရိုဟင်ဂျာ ဒုက္ခသည် စခန်းကို အမေရီကန် အစိုးရ ကိုယ်စားလှယ်တစ်ဖွဲ့က ဒုက္ခသည်တွေနဲ့တွေ့ဆုံစဥ်မှာ ရိုဟင်ဂျာဒုက္ခသည်ခေါင်းဆောင်တွေက သူတို့ဟာ ဘင်္ဂလားဒေ့ရှ် နိုင်ငံအတွက် ဝန်ထုပ်ဝန်ပိုးဖြစ်နေပြီး မြန်မာနိုင်ငံကို ပြန်ချင်တဲ့အကြောင်းပြောပါတယ်။တစ်ကယ်လို့ ပြန်ရမယ်ဆိုရင် ၂၀၁၇ ခုနှစ်က ရိုဟင်ဂျာတွေအပေါ် စစ်တပ်က ကျူးလွန်ထားတဲ့လူမျိုးတုန်းသတ်ဖြတ်မှုတွေအပေါ် မျှတစွာအရေးယူတာ ၊နေရပ်ပြန်ရမယ့် ရိုဟင်ဂျာတွေအတွက် ဂုဏ်သိက္ခာရှိရှိနေရပ်ပြန်နိုင်ဖို့ အတွက်သူတို့ရဲ့ အခွင့်အရေး နဲ့ လုံခြုံရေး အတွက်အာမခံချက် တွေရှိဖို့ လိုတဲ့အကြောင်းကိုပြောခဲ့ကြတယ်လို့ ဘင်္ဂလားဒေ့ရှ် သတင်းဌာန Dhaka Tribune ကလည်းဖော်ပြပါတယ်။
အမေရီကန်အဆင့်မြင့် သံတမန်အဖွဲ့ခေါင်းဆောင်ကလည်းရိုဟင်ဂျာတွေရဲ့ လုံခြုံရေး နဲ့ ဂုဏ်သက္ခာရှိရှိပြန်နိုင်ဖို့တောင်းဆိုချက်တွေကို ထောက်ခံခဲ့ပြီးတော့ မြန်မာစစ်တပ်ကို နိုင်ငံတကာ ရာဇ၀တ်ခုံရုံး(ICC)မှာ စစ်ဆေးနိုင်ဖို့နဲ့ ရိုဟင်ဂျာတွေ သူတို့နိုင်ငံကို ဂုဏ်သိက္ခာရှိရှိ ပြန်လာနိုင်အောင် အမေရိကန်က ဖိအားပေးနေတယ်လို့ပြောခဲ့ပါတယ်။
