ရွှေဝါ​ရောင်​တော်လှန်​ရေးမှာ သံဃာတော်တွေဖမ်းဆီးနှိပ်စက်၊သတ်ဖြတ်ခံရတာ​တွေဟာ ဗိုလ်ချုပ်​ဟောင်းမြင့်​ဆွေအဓိက​နေရာကပါဝင်ခဲ့တယ်လို့ ​သံဃာ​တော်​တွေမိန့်

သြဂုတ် ၈၊၂၀၂၅။သတိုး/People’s Spring

၂၀၀၇ ရွှေဝါရောင်‌တော်လှန်ရေးမှာ သံဃာတော်တွေ ညှင်းပမ်းနှိပ်စက်ခံရတာ၊ သေကြေပျက်စီးခဲ့ရတာနဲ့ သာသနာတော်နစ်နာခဲ့ရတာတွေဟာ သေဆုံးသွားတဲ့ ယာယီသမ္မတဦးမြင့်ဆွေရဲ့ လက်ချက်မကင်းဘူးလို့ ငွေကြာရံပရိယတ္တိစာသင်တိုက်မှရွှေဝါရောင်ဆရာတော်ဦးအဂ္ဂဓမ္မကမိန့်ကြားပါတယ်။

“ဦးဇင်းတို့ အသီးသီးပေါ့ နော်၊၂၀၀၇ရွှေဝါရောင်တော်လှန်‌ရေးနဲ့ ပတ်သက်ပြီး ထောင်တွေထဲကိုရောက်သွားတဲ့ အချိန်မှာလည်း စစ်ကြောရေးမှာ ညှင်းပမ်းနှိပ်စက်ခံရတာတွေ ၊ ဦးဇင်းဆို သွားတောင်မရှိတော့ပါဘူး။ စစ်ကြောရေးမှာ ရိုက်ပုတ်ခံရတာတွေသွားကျွတ်တဲ့အထိပါပဲ။ဒီလိုမျိုး ထောင်နှစ်ရှည်အသီးသီးကျခဲ့တာတွေ အားလုံးဟာ ဦးမြင့်ဆွေရဲ့ ပယောဂတွေ မကင်းဘူး။ ဦးမြင့်ဆွေရဲ့ လုပ်ရပ်တွေပါတယ်လို့ပြောရမှာ ဖြစ်တယ်ပေါ့ဗျာ”လို့ ရွှေဝါရောင်ဆရာတော် ဦးအဂ္ဂဓမ္မက မိန့်ကြားပါတယ်။

ဩဂုတ် ၇ရက်က စစ်ကောင်စီရဲ့ယာယီသမ္မတဦးမြင့်ဆွေ သေဆုံးမှုအပေါ် ရွှေဝါရောင်ဆရာတော် ဦးအဂ္ဂဓမ္မထံ မေးမြန်းလျှောက်ထားရာ ဆရာတော်က အထက်ပါအတိုင်း မိန့်ကြားခြင်းဖြစ်သည်။

Public Service Announcement

သေဆုံးသွားတဲ့ ဗိုလ်ချုပ်​ဟောင်းမြင့်ဆွေဟာ စစ်အစိုးရလက်ထက် ၂၀၀၇ ရွှေဝါရောင်တောလှန်ရေးကာလမှာ ရန်ကုန်တိုင်းစစ်ဌာန စစ်တိုင်းမှူးအဖြစ် တာဝန်ထမ်းဆောင်နေသူဖြစ်ပါတယ်။ ငြိမ်းချမ်းစွာဆန္ဒပြနေတဲ့ သံဃာထုအပေါ် အကြမ်းဖက်ဖြိုခွင်းရာမှာ စစ်တိုင်းမှူးအဖြစ်တာဝန်ယူထားတဲ့ မြင့်ဆွေဟာ အဓိကတာဝန်ရှိသူ​တွေထဲကတစ်ဦးဖြစ်ပါတယ်။

“သူတိုင်းမှူးလက်ထက်မှာ၂၀၀၇ ရွှေဝါရောင်တော်လှန်ရေးရဲ့ သံဃာတော်တွေကို ဖြိုခွင်းခဲ့တာပေါ့။ ဘယ်လောက်ထိအောင် ဖြိုခွင်းခဲ့လဲဆိုရင် ဦးဇင်းတို့ရဲ့စာသင်တိုက်တွေမှာ‌ဆိုရင် ညအချိန်မတော်ကြီးကို တံခါးပေါက်တွေကို ကားနဲ့တိုက်ပြီး ဖွင့် ၊ စစ်ကားနဲ့ ဖွင့် ၊ အတင်းအဓမ္မ သံဃာတော်တွေကိုရိုက်ပုတ်၊ မိတဲ့သံဃာ‌တော် တွေဆိုရင် လက်ပြန်ကြိုးတုပ်ပြီးတော့ ကတ္တရာလမ်းပေါ်မှာ ဒူးတုပ်ပြီးသွားခိုင်း ၊ နောက်က စစ်ဖိနပ်နဲ့ကန် ၊ အဲဒီလိုမျိုးထိ အောင်လုပ်ခဲ့သလို မေတ္တာသုတ်ရွတ်ဆိုတဲ့ သံဃာတော်တွေကိုလည်းပဲ သတ်ဖြတ်ပြီးတော့ ကျည်အစစ်တွေနဲ့ သတ်ဖြတ်ပြီးတော့ ဖြိုခွင်းခဲ့တာလည်း သူလို့ပဲပြောရမှာဖြစ်တယ်”လို့ ဆရာတော် ဦးအဂ္ဂဓမ္မက မိန့်ကြားပါတယ်။

ရွှေဝါရောင်တော်လှန်ရေးမှာ မေတ္တာသုတ်ရွတ်နေတဲ့သံဃာတော်တွေရဲ့ ကျောင်းတိုက်တွေကို အတင်းအဓမ္မဝင်စီး ၊သတ်ဖြတ် ၊ရိုက်ပုတ်ပြီး ထောင်ဒဏ်တွေကို နှစ်ရှည်အသီးသီးချခဲ့တဲ့ မြင့်ဆွေရဲ့ ယုတ်မာမှုက ကမ်းကုန်တယ်လို့ ဆရာတော်က ဆက်မိန့်ပါတယ်။

“ဘယ်လောက်အထိဆိုးဆိုးရွားရွားလုပ်ခဲ့လဲဆိုရင် ၂၀၀၇ ရွှေဝါရောင်တော်လှန်ရေးမှာ သံဃာတော်တွေက ထီးမပါ ဖိနပ်မပါပဲနဲ့ ငြိမ်းချမ်းစွာဖြင့် မေတ္တာသုတ်ရွတ်ဆိုတဲ့ သံဃာတော်တွေ ၊တစ်တိုင်းတစ်ပြည်လုံး ငြိမ်းချမ်းသာယာအောင်ရွတ်‌ဆိုတဲ့ သံဃာတော်တွေကို သူတို့ ရက်ရက်စက်စက်ခြေမှုန်းခဲ့တယ်။ရက်ရက်စက်စက် သတ်ဖြတ်ခဲ့တယ်။နောက်တစ်ခုက စွမ်းအားရှင်တွေမွေးပြီးတော့ သံဃာတော်တွေကို ရိုက်ပုတ်ခဲ့သလို သံဃာတော်တွေ ရွတ်ဖတ်သရဇ္ဈယ်တဲ့ ပရိတ်တရားကိုလိုက်ပြီးတော့ နာယူတဲ့ ပြည်သူတွေကိုပါ သူတို့ ပစ်ခတ်သတ်ဖြတ်ခဲ့တယ်။ အဲဒီလောက်ထိအောင် သူတို့လုပ်ခဲ့တာဆိုမှတော့ ဘယ်လောက်ထိတောင် ယုတ်မာသလဲဆိုတာ ပြောပြလို့တောင် မရနိုင်လောက်တဲ့ အနေအထားရှိတယ်”လို့ ဆရာတော် ဦးအဂ္ဂဓမ္မက မိန့်ကြားပါတယ်။

ရွှေဝါရောင်ဆရာတော် မင်းသုည(ဗုဒ္ဓတက္ကသိုလ်)ကလည်း​ရွှေဝါ​ရောင်​တော်လှန်​ရေးကာလတွင် စစ်တိုင်းမှူး ဗိုလ်ချုပ်မြင့်​ဆွေအပါအဝင် စစ်​ခေါင်း​ဆောင်များအမိန့်ဖြင့် ​”ကျောင်းတိုက်တွေကိုသူပုန်စခန်းစီးသလို ဝင်စီး ၊သတ်ဖြတ်ပေါ့။ အဲဒီတုန်းက သံဃာတစ်တောင်ကျော်အထိ အဖမ်းခံရတယ်။ နောက်တော့ သူတို့ ဖမ်းဆီး စစ်ဆေး နှိပ်စက်ပြီးတော့ ပြန်လွှတ်တာတွေလည်းရှိတာပေါ့။ စဖမ်းတုန်းက တစ်ထောင်ကျော်တယ်။အားလုံးပေါင်း ကျောင်းတိုက်တွေ သူပုန်စခန်းစီးသလိုဝင်စီးပြီးတော့ ချိပ်ပိတ်ပစ်တာတော့ (၆၁) ကျောင်းရှိတယ်”လို့ဦးအဂ္ဂဓမ္မကမိန့်ကြားပါတယ် ။

စစ်ကောင်စီရဲ့ ယာယီသမ္မတဦးမြင့်ဆွေ သေဆုံးခဲ့ရတာဟာ တစ်နိုင်ငံလုံးရဲ့ ပြည်သူလူထု အပေါ်မှာ ယုတ်မာမှုရဲ့ ဒဏ်ကိုတန်ပြန်ခံစားခဲ့ရတာလို့လည်း ဆရာတော်က မိန့်ပါတယ်။

“သူတို့ရဲ့ အတိတ်ကံက ကောင်းကျိုးလေးတွေ ပေးနေတဲ့အချိန်မှာ ဟုတ်လှချည်းလို့ မထင်ကြပါနဲ့ပေါ့နော်။ မကောင်းကျိုးပေးလာတဲ့ အချိန်မှာ သူတို့အတွက် တကယ့်ကို ကြီးကြီးမားမား ခံစားရပါလိမ့်မယ်လို့ ဒါလေးကို ပြောချင်တာပါ”လို့ ဆရာတော် ဦးအဂ္ဂဓမ္မက မိန့်ကြားပါတယ်။

၂၀၂၁ စစ်အာဏာသိမ်းမှုမှာ အဓိကပါဝင်ပတ်သက်သူ စစ်ဗိုလ်ချုပ်ဟောင်းမြင့်ဆွေဟာ သြဂုတ် ၇ရက်မနက် ၈နာရီ ၂၈ မိနစ်မှာ နေပြည်တော်ရှိ အမှတ်(၂)တပ်မတော်ဆေးရုံမှာ သေဆုံးသွားခဲ့ပါတယ်။

NLD အရပ်သားအစိုးရလက်ထက်မှာဒုတိယသမ္မတ(၁)တာဝန်ထမ်းဆောင်ခဲ့သူ ဦးမြင့်ဆွေဟာ သေဆုံးချိန်မှာ (၇၄)နှစ်အရွယ်ရှိပြီး ၂၀၂၃ နှစ်ဆန်းပိုင်းကတည်းက အာရုံကြောတွေ နှေးကွေးတုန့်ဆိုင်းတဲ့ရောဂါ(Parkinson’s Disease)နဲ့ ဆက်စပ်အာရုံကြောအားနည်းရောဂါတွေ ခံစားနေခဲ့ရတာလို့ အာဏာသိမ်း စစ်ကောင်စီက သတင်းထုတ်ပြန်ထားပါတယ်။

ဦးမြင့်​ဆွေ​သေဆုံးမှုအ​ပေါ် ပြည်သူ​အများစုဝမ်း​မြောက်ဝမ်း​သာဖြစ်​နေတာနဲ့ပတ်သက်ပြီး​တော့ရွှေဝါရောင်ဆရာတော် မင်းသုည(ဗုဒ္ဓတက္ကသိုလ်)က “အသေဆိုးနဲ့သေတယ်‌ ဟေ့ဆိုတာ အဲဒါပြောတာ။ လူအဖြစ်နဲ့ မသေဘူးပေါ့ဗျာ။ လူဆိုတာက သေသွားရင် ပြည်သူတွေ ဘေးပတ်ဝန်းကျင်က ဝမ်းနည်းကြမယ်။ ပူဆွေးကြမယ်။ သတိရကြမယ်။ အခုဟာကသေတာကြီးကို ပျော်တယ်ဆိုတာ ခုနကပြောသလို ခွေးသေ ဝက်သေတဲ့ ဆိုးတာပေါ့ ။ အသေဆိုးအစစ်ဆိုတာ အဲဒါမျိုးကိုခေါ်တာပဲ။” လို့ဆက်လက်မိန့်ကြားပါတယ်။