ရွေးကောက်ပွဲသင်တန်းတက်မည့် စစ်​ကောင်စီပညာရေးဝန်ထမ်း ၄ဦးဖမ်းဆီးပြီး ခံဝန်ထိုးပြန်လွှတ်ပေးခဲ့ဟု မွန်တပ် ပြော

ဩဂုတ် ၁၅၊ ၂၀၂၅။ ထားမြတ်/People’s Spring

မွန်ပြည်နယ်၊ သံဖြူဇရပ် – ရေး အမှတ် – (၈)အမြန်လမ်းပိုင်း၌ စစ်ဆေးမှုများပြုလုပ်စဉ် စစ်ကောင်စီ ကြိုးပမ်းနေသည့် ရွေးကောက်ပွဲအတွက် သင်တန်းတက်မည့် Non -CDM ပညာရေးဝန်ထမ်း၄ဦးကို ဖမ်းမိခဲ့ကြောင်း မွန်ပြည်တော်လှန်ရေးတပ်(MSRF)က သတင်းထုတ်ပြန်သည်။

မွန်ပြည်ဖက်ဒရယ်ကောင်စီ (MSFC) ကာကွယ်ရေးဌာနအောက်ရှိ တပ်များဖြစ်သော မွန်ပြည်တော်လှန်ရေးတပ် (MSRF)နှင့် ရေးပြည်သူ့ကာကွယ်ရေးတပ် (YPDF) တပ်ဖွဲ့တို့မှ ခရီးသွားပြည်သူများ၏ လုံခြုံရေးအတွက် စစ်ဆေးမှုများ ဆောင်ရွက်လျက်ရှိရာ ရွေးကောက်ပွဲ သင်တန်းတက်မည့် စစ်ကောင်စီလက်အောက်ခံ ဝန်ထမ်းများကို ဩဂုတ် ၁၄ရက်တွင် ဖမ်းမိခဲ့ခြင်းဖြစ်သည်ဟု ဆိုသည်။

ဖမ်းဆီးရမိသည့် Non-CDM ပညာရေးဝန်ထမ်း ၄ဦးအား မွန်ပြည်တော်လှန်ရေးတပ် (MSRF) နှင့် ရေးပြည်သူ့ကာကွယ်ရေးတပ် (YPDF) တပ်ဖွဲတာဝန်ရှိသူများမှ (၂၄)နာရီခန့် စစ်ဆေးရန် ထိန်းသိမ်းထားခဲဲပြီး ဩဂုတ် ၁၅ရက်တွင် ၎င်းတို့၏ မိသားစုဝင်များထံ ပြန်လည်အပ်နှံခဲ့ကြောင်း၊ စစ်ကောင်စီမှ ကျင်းပမည့်ရွေးကောက်ပွဲတွင် ဆက်လက်ပါဝင်ပတ်သက်ခြင်း မပြုရန်ခံဝန်ကတိ လက်မှတ်ထိုးစေခဲ့ပြီး ပြန်လည်လွှတ်ပေးလိုက်ကြောင်း ထုတ်ပြန်သည်။

Public Service Announcement

“ကျမတို့အနေနဲ့က ဒီရွေးကောက်ပွဲ နဲ့ပတ်သက်ပြီးတော့ ပါဝင်ပတ်သက်ပြီးတော့ ပါဝင်ပတ်သက်ခြင်းမပြုဖို့သတိပေးထားပြီးဖြစ်တယ်။ဒီသတိပေးချက်အပေါ် အခြေခံပြီးဆက်လက်ပြီး အရေးယူဆောင်ရွက်ရခြင်းဖြစ်ပါတယ်” ဟု MSRF ပြောရေးဆိုခွင့်ရှိသူ မိတလဉာဏ်က ပြောသည်။

မွန်ပြည်နယ် ရေးမြိုနယ်အတွက် ရွေးကောက်ပွဲတွင် ပါဝင်ဆောင်ရွက်ကြမည့် Non – CDMဝန်ထမ်းများ၏ စာရင်းများကိုတော်လှန်ရေးအဖွဲများမှ ရရှိထားပြီးဖြစ်ကြောင်းလည်း သတိပေးသည်။

စစ်ကောင်စီ၏ ရွေးကောက်ပွဲဆိုင်ရာ အာဏာပိုင်များနှင့် ပူးပေါင်းဆောင်ရွက်မှု မပြုလုပ်ရန် သတိပေးချက်ကို MSRF၊ YPDFနှင့် PDFဒေါနတပ်ရင်း(၂)တို့က ဇူလိုင် ၂၀ရက်တွင် ပူးတွဲကြေညာချက် ထုတ်ပြန်ပြီး သတိပေးထားသည်။

စစ်ကောင်စီသည် အာဏာကို ဆက်လက်ထိန်းသိမ်းရေးအတွက် ရွေးကောက်ပွဲပြင်ဆင်ရာတွင် အီလက်ထရောနစ် မဲပေးစက်ကိုင်သင်တန်းကို ရေးခရိုင်တွင် ပေးမည်ဟု သိရှိရကြောင်း၊ စစ်ကောင်စီ၏ ရွေးကောက်ပွဲဆိုင်ရာ အာဏာပိုင်များနှင့် သွားလာလှုပ်ရှားမှုများကိုတော်လှန်ရေးအဖွဲ အစည်းများမှ သတင်းအချက်အလက်များ ရရှိနေပြီး ရွေးကောက်ပွဲ မလုပ်နိုင်စေရေးအတွက် တားဆီးသွားမည်ဖြစ်ကြောင်း ဖော်ပြသည်။

ထို့ကြောင့် အုပ်ချုပ်ရေးမှူးများ၊ Non-CDM ဝန်ထမ်းများအနေဖြင့် စစ်ကောင်စီ ရွေးကောက်ပွဲဆိုင်ရာ အာဏာပိုင် များနှင့် အတူတကွ သွားလာခြင်း၊ သင်တန်းတက်ခြင်း၊ လုပ်ငန်းအကောင်အထည်ဖော်ခြင်းများ မပြုလုပ်ရန် သတိပေးထားသည်။

တဖက်တွင်လည်း MSRFနှင့် တော်လှန်ရေး ပူးပေါင်းတပ်များသည် စစ်ကောင်စီ ကျင်းပမည့် ရွေးကောက်ပွဲကို စစ်ရေးနည်းဖြင့် ဖိအားပေးသည့် စစ်ကောင်စီကို တိုက်ခိုက်သည့် စစ်ဆင်ရေးများ ဖော်ဆောင်လျက်ရှိသည်။