စက်တင်ဘာ-၂၉၊၂၀၂၅။People’s Spring
အမျိုးသားညီညွတ်ရေးအစိုးရ (NUG)၊ယာယီသမ္မတ ဒူဝါလရှီးလ နဲ့ ကရင်နီအမျိုးသားတိုးတက်ရေးပါတီ (KNPP)ဥက္ကဋ္ဌ ခူဦးရယ်တို့ တော်လှန်ရေးဆိုင်ရာစိန်ခေါ်မှုတွေကျော်လွှားနိုင်ဖို့နဲ့ အနာဂတ် ဖက်ဒရယ် ဒီမိုကရေစီ တိုင်းပြည် တည်ဆောက်ရေးအတွက်တွေ့ဆုံ ဆွေးနွေးခဲ့တယ်လို့ ယနေ့ညမှာ NUG ကထုတ်ပြန်ပါတယ်။
စက်တင်ဘာ ၂၅ ရက်နေ့ကလည်းNUG ယာယီသမ္မတ ဒူဝါလရှီးလဟာ ကရင်အမျိုးသားအစည်းအရုံး (KNU) ဥက္ကဋ္ဌ ဖဒိုကွယ်ထူးဝင်းတို့ တွေ့ဆုံ ဆွေးနွေးခဲ့ကြောင်း သတင်းထုတ်ပြန်ပြီး ၄ ရက်အကြာမှာ KNPP ဥက္ကဋ္ဌနဲ့ပါ တွေ့ဆုံဆွေးနွေးခဲ့တယ်လို့ထုတ်ပြန်လာတာပါ ။
NUG နဲ့ KNPP ခေါင်းဆောင်နှစ်ဦးဟာ လက်ရှိ နိုင်ငံတွင်းဖြစ်ပေါ်နေတဲ့ တော်လှန်ရေးအခြေအနေတွေ၊ လက်ရှိကြုံတွေ့နေရတဲ့တော်လှန်ရေးဆိုင်ရာ စိန်ခေါ်မှုတွေ အတူ ရင်ဆိုင် ကျော်လွှားနိုင်ဖို့ ၊အနာဂတ် ဖက်ဒရယ် ဒီမိုကရေစီ တိုင်းပြည် တည်ဆောက်ရေး လုပ်ငန်းစဉ်တွေကို ဆွေးနွေးခဲ့ကြတယ်လို့ ဖော်ပြထားပါတယ် ။
Public Service Announcement
ဒါအပြင် တိုင်းပြည်အနှံ့စစ်တပ်ရဲ့ဗုံးကြဲတိုက်ခိုက်မှုတွေကြောင့် ထိခိုက်သေဆုံးခဲ့ရတဲ့ မိသားစုတွေ၊ ထိခိုက်ဒဏ်ရာရသူတွေ ၊အသက်အိုးအိမ်စည်းစိမ်တွေ စွန့်လွှတ် ထွက်ပြေးတိမ်းရှောင်နေကြရတဲ့ စစ်ဘေးရှောင်ပြည်သူတွေအတွက် လူသားစာနာကူညီရေး ဆိုင်ရာတွေကိုလည်း ဆွေးနွေးခဲ့ကြတယ်လို့အသိပေးထားပါတယ်။
စစ်တပ်အာဏာသိမ်းကတည်းက KNPP/KA ဟာပြည်သူနဲ့အတူရပ်တည်ပြီး စစ်တပ်ကိုတော်လှန်နေတဲ့ တိုင်းရင်းသားလက်နက်ကိုင်အဖွဲ့ဖြစ်ပါတယ်။ KNDF တည်ထောင်ရာမှာလည်း KA ကစစ်ဘက်ထိပ်တန်းတာဝန်ရှိသူတွေကဦးဆောင်မှုပေးခဲ့ပါတယ်။ KA ဟာ KNDF အပါအဝင် ကရင်နီတပ်ပေါင်းစုနဲ့အတူ စစ်တပ်ကို ဆက်တုက်ခုခံတိုက်ခိုက်နေတာဖြစ်ပါတယ် ။
KNU နဲ့NUG ခေါင်းဆောင်တွေ စက်တင်ဘာ ၂၅ ရက်ကတွေ့ဆုံဆွေးနွေးရာမှာလည်း နွေဦးတော်လှန်ရေး အမြန်ဆုံး အောင်မြင်စေဖို့ တော်လှန်ရးအင်အားစုတွေကြား ပူးပေါင်းလက်တွဲဆောင်ရွက်သွားမယ် ကဏ္ဍတွေကိုအကျယ်တဝံ့ ဆွေးနွေးခဲ့တယ်လို့ထုတ်ပြန်ခဲ့ပါတယ် ။
“ အဓိကကတော့ အကြမ်းဖက်စစ်အုပ်စုဘက်ကနေပြီးတော့ တရားမဝင်အတုအယောင်ရွေးကောက်ပွဲကို ပြုလုပ်ပြီးတော့ နိုင်ငံရေးအရ ထွက်ပေါက်ရှာဖို့ ကြိုးစားနေတဲ့အချိန်မှာ တော်လှန်ရေး အင်အားစုတွေဘက်မှာလည်း ကျွန်တော်တို့ ရှိပြီးသား ညီညွှတ်မှုတွေကို ပိုပြီးတော့ ခိုင်ခိုင်မာမာ တည်ဆောက်ထားနိုင်ဖို့ကိစ္စတွေပေါ့ ၊ ဒီကိစ္စတွေ အရေးကြီးတာဖြစ်တဲ့ အတွက်ကြောင့်မိုလို့ သမ္မတကြီးအနေနဲ့ တွေ့ဆုံတဲ့ ဆွေးနွေးတဲ့ ကိစ္စတွေ တောက်လျှောက်ဆောင်ရွက်နေတာဖြစ်ပါတယ်။အဲဒီတော့ ဒီမှာလည်း ရှေ့လျှောက် ညီညီညွှတ်ညွတ်သွားကြဖို့နဲ့ တရားမဝင် အတုအယောင်ရွေးကောက်ပွဲကိုလည်း အတူတကွ တုန့်ပြန်ဆောင်ရွက်ကြဖို့ ၊ ဒီကိစ္စတွေ လည်း ဆွေးနွေးဖြစ်ကြတယ်လို့တော့သိရပါတယ်။” လို့ NUG ဝန်ကြီးချုပ်ရုံးပြောရေးဆိုခွင့်ရှိသူ ဦးနေဘုန်းလတ်က ပြောပါတယ်။
