တရုတ် ဂျက်တိုက်လေယာဉ်တွေက ဂျပန် စစ်လေယာဉ်တွေကို ပစ်မှတ်ရှာ ရေဒါနဲ့ ချိန်ရွယ်တာမျိုးတွေ လုပ်ခဲ့ကြောင်း ဂျပန်က စွပ်စွဲခဲ့ပါတယ်။
ဂျပန်နဲ့ တရုတ်တို့ကြား ပိုင်ဆိုင်မှု အငြင်းပွားနေရာ အိုကီနာဝါ ကျွန်းစုနားမှာ ဂျပန်ရဲ့ F-15 တိုက်လေယာဉ်တွေကို တရုတ်ရဲ့ J-15 တိုက်လေယာဉ်တွေက ပစ်မှတ်အဖြစ် သတ်မှတ်ဖို့ ရေဒါနဲ့ လှမ်းပြီး ချိန်ရွယ်တဲ့ ဖြစ်စဉ်နှစ်ခု ပေါ်ပေါက်ခဲ့ကြောင်း ဂျပန် ကာကွယ်ရေး ဝန်ကြီးဌာနက ဒီဇင်ဘာ ၇ ရက်နေ့မှာ ထုတ်ပြန်ခဲ့ပါတယ်။
အဲဒီကိစ္စဟာ အရမ်း အန္တရာယ်များတဲ့ လုပ်ရပ်မျိုးလို့လည်း ဂျပန်က ဝေဖန်ပါတယ်။ J-15 တိုက်လေယာဉ်တွေဟာ တရုတ်ရဲ့ လျောင်နင်း လေယာဉ်တင် သင်္ဘောကြီးပေါ်ကနေ ပျံတက်လာတာ ဖြစ်တယ်လို့ ဆိုပါတယ်။
ဒီဇင်ဘာ ၆ ရက်နေ့တုန်းက လျောင်နင်း ဦးဆောင်ပြီး ဒုံးကျည်တပ် ဖျက်သင်္ဘော သုံးစီး ခြံရံလိုက်ပါလာတဲ့ တိုက်ရေယာဉ်အုပ်က အိုကီနာဝါကျွန်းစု တောင်ပိုင်းကနေ ဖြတ်သန်း ခုတ်မောင်းခဲ့တာကို ဂျပန်က F-15တွေ စေလွှတ်ပြီး စောင့်ကြည့်စေခဲ့ရာမှာ အခုလိုမျိုး J-15တွေနဲ့ ငြိခဲ့ကြတာ ဖြစ်ပါတယ်။
Public Service Announcement
တိုက်လေယာဉ် အချင်းချင်း ပစ်မှတ်ရှာ ရေဒါတွေနဲ့ ချိန်ရွယ်တဲ့ အခု လုပ်ရပ်မျိုးဟာ အင်မတန် အန္တရာယ်များပြီး ပျံသန်းမှုဆိုင်ရာ လုံခြုံရေး အခြေအနေတွေကို ဆိုးဆိုးရွားရွား ထိခိုက်စေနိုင်တယ်လို့ ဂျပန် ဝန်ကြီးချုပ် စာနအဲ တကအိချိက သတင်းထောက်တွေကို ပြောကြားခဲ့ပါတယ်။ သူက ဒီဖြစ်ရပ်အတွက် အရမ်း စိတ်အနှောင့်အယှက် ဖြစ်တဲ့အကြောင်း ဂျပန်က တရုတ်ဆီ ကန့်ကွက် အသိပေးထားပြီး ဖြစ်တယ်လို့ ဆိုပါတယ်။
ဂျပန် ကာကွယ်ရေးဝန်ကြီး ရှင်ဂျီရို ကွိုင်ဇူမီကလည်း တရုတ်ရဲ့ လုပ်ရပ်နဲ့ ပတ်သက်လို့ ဂျပန်က ခေါင်းအေးအေးနဲ့ ခိုင်ခိုင်မာမာ တုံ့ပြန် ကိုင်တွယ်ဖို့ ရှိနေပေမယ့် ဒေသတွင်း ငြိမ်းချမ်းရေးနဲ့ တည်ငြိမ်ရေးကို မထိပါးအောင်လည်း အလေးထား စဉ်းစားမှာဖြစ်ကြောင်း ပြောကြားခဲ့ပါတယ်။
နိုဝင်ဘာ လဆန်းတုန်းက ဂျပန်ဝန်ကြီးချုပ် တကအိချိက တကယ်လို့ တရုတ်သာ ထိုင်ဝမ်ကို ကျူးကျော် စစ်ပြုရင် ဂျပန်က ထိုင်ဝမ်ကိုကူဖို့ တပ်တွေ စေလွှတ်မယ်လို့ ပြောကြားခဲ့ပြီး အဲဒီစကားကြောင့် တရုတ်-ဂျပန် ဆက်ဆံရေးဟာ အရမ်းအေးခဲ တင်းမာနေပါတယ်။
တရုတ်နဲ့ ဂျပန် တိုက်လေယာဉ်တွေကြား ပစ်မှတ်ရှာ ရေဒါနဲ့ ချိန်ရွယ်တဲ့ ဖြစ်ရပ်မျိုးဟာ ပထမဆုံး အကြိမ်လို့ ယုံကြည်ရပါတယ်။ ၂၀၁၃ ခုနှစ်တုန်းကတော့ တရုတ် စစ်သင်္ဘော တစ်စီးဟာ အရှေ့တရုတ် ပင်လယ်ထဲမှာ ဂျပန် ဖျက်သင်္ဘော တစ်စီးကို အလားတူ ရေဒါနဲ့ ချိန်ရွယ်ခဲ့ဖူးပါတယ်။
ဇွန်လတုန်းကတော့ တရုတ် တိုက်လေယာဉ်တွေဟာ အိုကီနာဝါနားမှာ ဂျပန်ရဲ့ ကင်းလှည့်လေယာဉ် တစ်စီးကို အရမ်း အန္တရာယ်များတဲ့ အခြေအနေမျိုးထိ တရုတ် တိုက်လေယာဉ်တွေက ချဉ်းကပ် ပျံသန်းခဲ့ကြောင်း ဂျပန်က စွပ်စွဲဖူးပါတယ်။
ကိုးကား: Reuters
