တောင်ကိုရီးယား သမ္မတကတော်ဟောင်း ကင်မ်ကွမ်ဟီးဟာ အဂတိမှုအတွက် ထောင်ဒဏ် လပေါင်း ၂၀ ချမှတ်ခြင်း ခံခဲ့ရကြောင်း သိရပါတယ်။
ခင်ပွန်းဖြစ်သူ သမ္မတဟောင်း ယွန်ဆွတ်ခ်ယောက နိုင်ငံမှာ ဒီမိုကရေစီ အုပ်ချုပ်မှုကို ရပ်တန့်ပြီး အရေးပေါ် စစ်အုပ်ချုပ်ရေးအမိန့် ကြေညာခဲ့တဲ့ လုပ်ရပ်အတွက် ပုန်ကန်မှု စွပ်စွဲချက်အတွက် အမှုရင်ဆိုင် နေရချိန်မှာ ကင်မ်က အခုလို ထောင်ဒဏ် ချမှတ် ခံခဲ့ရတာ ဖြစ်ပါတယ်။
ကင်မ်ဟာ နိုင်ငံရေးအရ မျက်နှာသာ ရစေမယ်ဆိုတဲ့ ကတိမျိုးနဲ့အတူ ဘာသာရေး ခေါင်းဆောင် တစ်ဦးဆီကနေ စိန်လည်ဆွဲ၊ Chanel လက်ကိုင်အိတ်လို အဖိုးတန် ပစ္စည်းတွေ လာဘ်ယူခဲ့ကြောင်း ပြစ်မှုထင်ရှားတဲ့အတွက် ဇန်နဝါရီ ၂၈ ရက်နေ့မှာ ဆိုးလ်အလယ်ပိုင်းခရိုင် တရားရုံးက သူ့ကို အခုလို စီရင်ချက် ချမှတ်ခဲ့တာ ဖြစ်ပါတယ်။
သမ္မတကတော် အနေနဲ့ ခင်ပွန်းသည်ကို အနီးကပ် နားဝင်အောင် စည်းရုံးနိုင်သလို ပြည်သူတွေအတွက် ကိုယ်စားပြု ပုံရိပ်တစ်ခုလည်း ဖြစ်ခဲ့သင့်ကြောင်း၊ အဲဒီအစား ကင်မ်ဟာ သူ့ရဲ့ နေရာကို မလျော်ဩဇာနဲ့ အသုံးပြုပြီး ကိုယ်ကျိုးရှာခဲ့ကြောင်း တရားသူကြီးက ဝေဖန် ပြောကြားခဲ့ပါတယ်။
Public Service Announcement
ကင်မ်က ပြစ်ဒဏ်ကို လေးလေးစားစား ခံယူမှာဖြစ်ပြီး ထိခိုက်နစ်နာခဲ့သူ အားလုံးကို ထပ်မံ တောင်းပန်လိုပါကြောင်း ပြောကြားသွားပါတယ်။
သမ္မတဟောင်း ယွန်နဲ့ ကင်မ်တို့ဟာ လနဲ့ချီ သီးခြားခွဲပြီး ချုပ်နှောင်ခံထားကြရပါတယ်။ ယွန်းဟာ ၂၀၂၄၊ ဒီဇင်ဘာ လဆန်းပိုင်းတုန်းက သက်တမ်း ၆ နာရီကျော်သာ ခံခဲ့တဲ့ စစ်အုပ်ချုပ်ရေးအမိန့် ကြေညာခဲ့မှုကြောင့် ကြီးမားပြင်းထန်တဲ့ စွဲချက်တွေနဲ့ ရင်ဆိုင်နေရပါတယ်။ ယွန်ဟာ အဲဒီကိစ္စနဲ့ ဆက်စပ်လို့ အာဏာပိုင်တွေက ထိန်းသိမ်းဖို့ ကြိုးစားခဲ့တာကို ဖီဆန်မှုအတွက် လဆန်းပိုင်းမှာ ထောင်ဒဏ် ၅ နှစ် ချမှတ် ခံထားရပြီး ဖြစ်ပါတယ်။ ဒါပေမဲ့ ပိုပြီး ပြင်းထန်ကြီးမားတဲ့ စွပ်စွဲချက်တွေအတွက် စီရင်ချက်တွေကို ယွန်က စောင့်ဆိုင်းနေရဆဲပါ။
အစိုးရ ရှေ့နေတွေက ကင်မ်ဟာ ယွန်ရဲ့ စစ်အုပ်ချုပ်ရေး ကြေညာခဲ့တဲ့ အစီအစဉ်မှာတော့ ပါဝင်ပတ်သက်မှု မရှိခဲ့ကြောင်း ပြောပါတယ်။ အစိုးရ ရှေ့နေတွေက ကင်မ်ဟာ အာဏာအလွဲသုံးစား လုပ်ခဲ့ကြောင်း စွပ်စွဲပြီး စွဲချက် သုံးခုအတွက် ထောင်ဒဏ် ၁၅ နှစ်ထိ ချမှတ်ပေးဖို့ တောင်းဆိုခဲ့ပေမယ့် တရားရုံးကတော့ စွဲချက်နှစ်ခုကနေ တရားသေ လွှတ်ပေးပြီး အဂတိမှုအတွက်ပဲ ထောင်ဒဏ် လ ၂၀ ချမှတ်ခဲ့တာ ဖြစ်ပါတယ်။
ယွန်ကို ရာထူးက ဖြုတ်ချရေးအတွက် ဦးဆောင် တောင်းဆိုပြီး လှုပ်ရှားခဲ့တဲ့ ဒီမိုကရက်တစ် ပါတီကတော့ တရားရုံး စီရင်ချက်ကို ပြင်းပြင်းထန်ထန် ဝေဖန်ခဲ့ပြီး ကင်မ်လိုမျိုး လုပ်ပိုင်ခွင့် အလွဲသုံးစား လုပ်ခဲ့သူတွေအတွက် အလွယ်တကူ သက်သာရာ ရစေနိုင်တယ်ဆိုတဲ့ မှားယွင်းတဲ့ သတင်းစကားမျိုးကို ဖြန့်ဝေသလို ဖြစ်သွားနိုင်ကြောင်း စွပ်စွဲ ပြောဆိုထားပါတယ်။
ကိုးကား: AP
ဓာတ်ပုံ – AP
