ယမန်နေ့ (မေ ၈) ညနေပိုင်းက ချင်းပြည်နယ်၊ ဟားခါးမြို့နယ်ရှိ နေရာနှစ်ခုကို စစ်ကောင်စီ လေတပ်က တိုက်ခိုက်ရာ ချင်းဒေသကာကွယ်ရေးအဖွဲ့ (CDF) အဖွဲ့ဝင် ၂ ဦး သေဆုံးပြီး ၃ ဦး ဒဏ်ရာရသွားသည်။
စစ်ရဟတ်ယာဉ်က မြို့တောင်ဘက် ၃၅ မိုင်ခန့်အကွာ ခွာပီးရွာကိုလည်းကောင်း၊ ထိုရွာနှင့် ၁၀ မိုင်ခန့်အကွာရှိ CDF (စန်ထန်း) ဗဟိုအလုပ်အမှုဆောင် ကောင်စီရုံးအနီးကိုလည်းကောင်း ဗုံးကြဲတိုက်ခိုက်ခဲ့သည်ဟု ထိုအဖွဲ့ထံမှ သိရသည်။
အသက် ၂၄ နှစ်အရွယ် လက်ထောက်အထွေထွေအတွင်းရေးမှူး Salai Siang Cung Hnin ပွဲချင်းပြီး သေဆုံးသည်၊ ၂၃ နှစ်အရွယ် တပ်ခွဲမှူး Sali Duh Lian Hmung မှာ ပြင်းထန်ဒဏ်ရာဖြင့် ယနေ့ (မေ ၉ ) နံနက် ၂ နာရီဝန်းကျင်တွင် သေဆုံးသည်ဟု CDF (စန်ထန်း) ၏ သတင်းနှင့်ပြန်ကြားရေးတာဝန်ခံက ပြောသည်။
“CDF စန်ထန်ရုံးကတော့ တစ်ကြိမ်ဆိုပေမဲ့လည်း အသေဆုံးရှိသွားတာပေါ့။ ရုံးကို တည့်တည့်ကြီး မဟုတ်ဘူး။ မီတာ ၅၀ လောက်မှာပေါ့။ ရုံးက ထိခိုက်ပျက်စီးတာတော့ မရှိဘူး။ ဗုံးက ရုံးကို လွဲပြီးတော့ ဒဏ်ရာရတဲ့သူတွေ၊ ကျဆုံးတဲ့သူတွေရှိတဲ့ဘက်ကို ထိသွားတာပေါ့” ဟု သူက ဆိုသည်။
ဟားခါးတက္ကသိုလ် ပထဝီဝင်အထူးပြု ဂုဏ်ထူးတန်းကျောင်းသား Salai Siang Cung Hnin သည် စန်ထန်းတက္ကသိုလ်ကျောင်းသားသမဂ္ဂ ဒုဥက္ကဋ္ဌလည်းဖြစ်ပြီး၂၀၂၁ ခုနှစ် ဧပြီမှ စတင်၍ လက်နက်ကိုင်တော်လှန်ရေးတွင် ပါဝင်ခဲ့သူဖြစ်ကြောင်း သိရသည်။
တပ်ခွဲမှူး Sali Duh Lian Hmung သည်လည်း ၂၀၂၁ ခုနှစ် မေလကတည်းက တော်လှန်ရေးတွင် ပါဝင်လာသူဖြစ်ပြီး တက္ကသိုလ်ဝင်တန်းဖြေဆိုထားသူဖြစ်သည်။
လေကြောင်းတိုက်ခိုက်မှုကြောင့် သေဆုံးခဲ့သည့် CDF အဖွဲ့ဝင် ၂ ဦးကို တောတွင်းတစ်နေရာတွင် သင်္ဂြိုဟ်ပြီးစီးပြီးဖြစ်ကြောင်း သိရသည်။
CDF အဖွဲ့ဝင် ၃ ဦး ဒဏ်ရာရပြီး ထိခိုက်မှုအခြေအနေအသေးစိတ် မသိရသေးပေ။
အာဏာသိမ်းမှုဆန့်ကျင်သူတို့ကို စစ်တပ်က လမ်းပေါ်တွင် ပစ်သတ်ရာမှ နိုင်ငံအနှံ့တွင် လက်နက်ကိုင် ခုခံမှု ပေါ်ပေါက်လာရာ ချင်းတောင်တန်းဒေသတွင်လည်း အမဲလိုက်သေနတ်များ ကိုင်ဆောင်ပြီး စစ်ကောင်စီလက်နက်ကိုင်တို့ကို ရင်ဆိုင်ခဲ့ကြသည်။
ဟားခါးမြို့နယ်အတွင်းရှိ ကျေးရွာ ၃၃ ရွာနှင့် နယ်မြေအစပ် ယောဒေသ မကွေးတိုင်း ဂန့်ဂေါမြို့နယ်အတွင်း ကျေးရွာများ၌ ပြန့်ကျဲနေထိုင်သည့် လူဦးရေ သုံးသောင်းခန့်ရှိသည်။ အဆိုပါ စန်ထန်းနယ်မြေများကို အခြေခံပြီး CDF (စန်ထန်း) ကို ၂၀၂၁ စက်တင်ဘာလကုန်တွင် စတင်ဖွဲ့စည်းထားခြင်း ဖြစ်သည်။
ယမန်နေ့ မွန်းလွဲ ၂ နာရီကတည်းက ခွာပီးရွာအနီးတစ်ဝိုက်တွင် စစ်ကောင်စီက လေကြောင်းမှ ကင်းထောက်နေကြောင်း၊ ဒေသခံများကို ဘေးလွတ်ရာသို့ ကြိုတင်ပြောင်းရွှေ့ထားသဖြင့် အရပ်သားထိခိုက်မှု မရှိကြောင်း CDF (စန်ထန်း) ထံမှ သိရသည်။
“ဗုံးတွေက ရွာကို ၂ ကြိမ် ကြဲတယ်။ တစ်ခုကံကောင်းတာက ဗုံးကြဲတဲ့နေရာက အထိခိုက်မရှိသလောက် ဖြစ်သွားတယ်။ ဗုံးမကြဲခင်မှာ လုံခြုံတဲ့နေရာကို တိမ်းရှောင်ပြီးသားဖြစ်သွားတယ်။ ဗုံးကျတဲ့နေရာက ပျက်စီးလောက်တဲ့အနေအထား မဟုတ်ဘဲနဲ့ လွဲသွားတာပေါ့” ဟု CDF (စန်ထန်း) အဖွဲ့ သတင်းနှင့်ပြန်ကြားရေးတာဝန်ခံက ပြောသည်။
ပြည်နယ်တစ်ခုလုံးနီးပါး စစ်အုပ်ချုပ်ရေးကြေညာခံထားရသည့် ချင်းပြည်နယ်တွင် ပြီးခဲ့သည့်လများမှ စတင်၍ တိုက်ပွဲများ ပြင်းထန်နေပြီး စစ်ကောင်စီက လေကြောင်းတိုက်ခိုက်မှုများ ဆက်တိုက် ပြုလုပ်နေသည်။
ချင်းဒေသတွင် ယခုနှစ် မတ်လနှင့် ဧပြီလတွင် စစ်တပ်က လေကြောင်းတိုက်ခိုက်မှု ၈၇ ကြိမ် ပြုလုပ်ခဲ့ပြီး ဗုံး ၁၂၁ လုံး ကြဲချတိုက်ခိုက်ခဲ့ကြောင်း ချင်းအမျိုးသားတပ်မတော် (CNA) က ယမန်နေ့တွင် ထုတ်ပြန်သည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီ လိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
