စစ်ကိုင်းတိုင်း၊ မူးမြစ်အနောက်ဘက်ကမ်း ရေဦးမြို့နယ်၊ ထန်းတောကျေးရွာတွင် အမျိုးသားညီညွတ်ရေးအစိုးရ (NUG) ဖွင့်လှစ်ထားသည့် အထက်တန်းစာသင်ကျောင်းကို စစ်ကောင်စီလေယာဉ်က ယနေ့ (မေ ၉ ) မွန်းလွဲပိုင်းတွင် ပစ်ခတ်တိုက်ခိုက်ခဲ့ကြောင်း သိရသည်။
အာဏာဖီဆန်ရေးလှုပ်ရှားမှု (CDM) တွင် ပါဝင်ထားသော ဆရာ၊ ဆရာမများ သင်ကြားပို့ချနေသည့် အဆိုပါကျောင်း၌ ကျောင်းသား ၃၀၀ ခန့် တက်ရောက်နေရာ လေကြောင်းမှ မတိုက်ခိုက်မီ နာရီဝက်ခန့်တွင် ကျောင်းဆင်းသွားသဖြင့် ကလေးများ ထိခိုက်မှုမရှိခဲ့ကြောင်း ဒေသခံများက ပြောသည်။
မန္တလေးတိုင်း၊ တံတားဦးလေဆိပ်မှ တက်လာသည့် စစ်လေယာဉ်တစ်စီးက မွန်းလွဲ ၂ နာရီခန့်တွင် အဆိုပါကျောင်းကို ၃ ကြိမ် ပတ်ကာ အချက်ပေါင်းများစွာ ပစ်ခတ်ခဲ့သည်ဟု ဒေသခံ သတင်းရင်းမြစ် စုစုပေါင်း လေးဦးက Myanmar Now ကို ယနေ့ မွန်းလွဲတွင် အတည်ပြုသည်။
ကျောင်းအုတ်တံတိုင်းနှင့် စာသင်ကျောင်းမုခ်ဦး ဗုံးသီးကျည်ဆန် တိုက်ရိုက် ထိမှန်သည်၊ ကျောင်းနံရံများလည်း ထိခိုက်ပျက်စီးသွားသည်ဟု ကိုယ်တိုင်သွားရောက်ကြည့်ရှုခဲ့သည့် ဒေသခံကာကွယ်ရေးအဖွဲ့ဝင်တစ်ဦးက ပြောသည်။
“စာသင်ကျောင်းအဝင်မှာ (ဗုံးဆန်) နှစ်လုံး အုတ်တံတိုင်း ထိတယ်။ စိန်ပန်းပင် ပြတ်ကျသွားတာ။ ကျောင်းဆောင်ကတော့ အစတွေမှန်လို့၊ နံကပ် (နံရံ) ပေါက်ထွက်သွားတာတွေ ရှိတယ်။ (ကျောင်း) ဘေးနားက နေအိမ်က ကောက်ရိုးပုံလည်း မီးလောင်သွားတယ်” ဟု သူက ဆိုသည်။
အဆိုပါကျောင်းသည် ယခင်က အစိုးရစာသင်ကျောင်းဖြစ်ပြီး လက်ရှိတွင် NUG က စီမံခန့်ခွဲနေသည်၊ ရေဦးမြို့အနောက်ဘက် ၁၂ မိုင်အကွာရှိ တင်းတိမ်ရံရွာနှင့် ကပ်လျက် ထန်းတောကျေးရွာတွင် တည်ရှိကာ အနီးအနား ရွာချင်းဆက်လျက်ဖြစ်သော တင်းတိမ်ရံ (စံပြ) ရွာ၊ မြို့ကြီးရွာများမှ ကလေးများ လာရောက် ပညာသင်ကြားနေကြခြင်း ဖြစ်သည်။
“ဒီဘက်နယ်မှာ အားထားရတဲ့ အထက်တန်းကျောင်းပေါ့ဗျာ။ တင်းတိမ်ရံကလည်း အဲဒီမှာပဲ တက်ရတာဗျ။ ကျောင်းဆင်းသွားတော့ ကျောင်းသူကျောင်းသားတွေက ဘေးကင်းတယ်ဗျ။ နေတွေ ပူလို့ ကျောင်းက မနက်ခင်းကို ပြောင်းထားတာ” ဟု တင်းတိမ်ရံ ရွာသားတစ်ဦးက ပြောသည်။
ကျောင်းအဆောက်အအုံနှင့် မုခ်ဦး ပျက်စီးသွားပြီး မီးလောင်နေကြောင်း ရေဦးမြို့နယ်ပြည်သူ့ကာကွယ်ရေးအဖွဲ့ (ပကဖ) သတင်းပြန်ကြားရေးတာဝန်ရှိသူတစ်ဦးကလည်း ဆိုသည်။
“စာသင်ကျောင်းကို အသွားအပြန် ဗုံးကြဲသွားတယ်။ ကလေးတွေ စာသင်တဲ့အချိန် နည်းနည်း လွတ်သွားတယ်။ ကလေးတွေ ကံကောင်းသွားတာပေါ့ဗျာ။ သင်နေတဲ့အချိန် မိရင်တော့ လက်ယက်ကုန်း (ရွာ) လို ဖြစ်မှာပေါ့ဗျာ” ဟု ၎င်းက ပြောသည်။
ယမန်နှစ် စက်တင်ဘာအတွင်း စစ်ကိုင်းတိုင်း၊ ဒီပဲယင်းမြို့နယ်ရှိ လက်ယက်ကုန်းရွာ စာသင်ကျောင်းကို လေကြောင်းမှ တိုက်ခိုက်သဖြင့် ကလေး ၆ ဦး အပါအဝင် ဒေသခံ ၁၃ ဦး သေဆုံးခဲ့ရသည့်ဖြစ်စဉ်ကို ရေဦးမြို့နယ်ပကဖ သတင်းပြန်ကြားရေးတာဝန်ရှိသူက ဆိုလိုခြင်း ဖြစ်သည်။
လေကြောင်းတိုက်ခိုက်မှုအပြီး ဗုံးအစ ရှစ်ခုကို ကျောင်းဝန်းကျင်တွင် တွေ့ရှိထားကြောင်း သိရသည်။ စာသင်ကျောင်းကို ဗုံးကြဲရသည့် အကြောင်းရင်းနှင့် ပတ်သက်ပြီး စစ်တပ်က သတင်းထုတ်ပြန်ခြင်း မရှိသေးပေ။
ယနေ့ တိုက်ခိုက်ခံရသည့် ထန်းတောရွာနှင့် တစ်ဆက်တည်းဖြစ်သည့် တင်းတိမ်ရံကျေးရွာသည် ရေဦးမြို့နယ် အနောက်ပိုင်းအတွက် ဒေသခံများ အဓိကရောင်းဝယ်ဖောက်ကားရာ မြို့ငယ်တမျှ စည်ကားသည့် ကျေးရွာဖြစ်ပြီး အိမ်ခြေ ၁၂၀၀ ခန့်အထိ ရှိသည်။
ယမန်နှစ် နိုဝင်ဘာလအတွင်း တင်းတိမ်ရံရွာနှင့် ထန်းတောရွာကို စစ်တပ်က ဝင်ရောက်စီးနင်းပြီး အိမ်ခြေ ၃၀၀ နှင့် ဆိုင်ခန်း ၂၀၀ ကျော်ကို မီးရှို့ဖျက်ဆီးခဲ့ဖူးသည်။
လက်ရှိတွင် စစ်ကောင်စီတပ်ရန်ကို ကြောက်လန့်သဖြင့် တင်းတိမ်ရံ၊ မြို့ကြီး၊ ထန်းတောကျေးရွာများမှ ဒေသခံအများအပြား ထွက်ပြေးတိမ်းရှောင်နေကြရကြောင်း သိရသည်။ မေလ ၄ ရက်ကလည်း ရေဦးမြို့နယ်အနောက်ဘက် ၆ မိုင်အကွာ ကက်သလစ်ဘာသာဝင်အများစု နေထိုင်ရာ ချမ်းသာရွာကို စစ်တပ်က ဝင်ရောက်စီးနင်းပြီး အထက်တန်းအဆင့် စာသင်ကျောင်းဆောင်ကို မိုင်းခွဲဖျက်ဆီးခဲ့သည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီ လိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
