မင်းကင်းတွင် ဗုံးကြဲခံရပြီး ကလေးများအပါအဝင် ၇ ဦး သေ၊ ၁၀ ဦး ဒဏ်ရာရ 

စစ်ကိုင်းတိုင်း၊ မင်းကင်းမြို့နယ်တွင် ယမန်နေ့ (မေ ၄ ရက်) ဗုံးကြဲတိုက်ခိုက်ခံရသဖြင့် ကလေးသုံးဦး အပါအဝင် အရပ်သား ၇ ဦး သေဆုံးကာ ၁၀ ဦးအထိ ထိခိုက်ဒဏ်ရာရသည်ဟု သိရသည်။

မင်းကင်းမြို့အနောက်ဘက် မိုင် ၂၀ ကျော်အကွာ တောင်တွင်းချောင်းဒေသရှိ ပိက္ခရားရွာကို မွန်းလွဲ ၂ နာရီခွဲဝန်းကျင်အချိန်၌ စစ်ကောင်စီက လေယာဉ်ဖြင့် သုံးကြိမ်ပတ်၍ ပစ်ခတ်ပြီး ဗုံးသုံးလုံးကြဲခဲ့သည်ဟု ဒေသခံများကို သွားရောက်ကူညီနေသည့် အမျိုးသားတစ်ဦးနှင့် မြို့နယ်ပြည်သူ့အုပ်ချုပ်ရေးအဖွဲ့ (ပအဖ) ထံမှ သိရသည်။ 

ဗုံးကြဲတိုက်ခိုက်ခံရသဖြင့် အသက် ၃ နှစ်အရွယ် မောင်ဖိုးအေးနှင့် ၎င်း၏အဘွား ၅၀ ဝန်းကျင်အရွယ် ဒေါ်မြင့်ဝင်း၊ ၆၀ အရွယ် ဒေါ်အုန်းစိန်တို့ ပွဲချင်းပြီး သေဆုံးကာ ၅၃ နှစ်အရွယ် ဦးသန်းဆွေ၊ ၄၅ နှစ်အရွယ် ဒေါ်မအေးတို့မှာ အပြင်းအထန် ဒဏ်ရာရပြီးနောက် သေဆုံးခဲ့သည်။

အမည်မသိရသေးသော သုံးနှစ်နှင့် ငါးနှစ်အရွယ် ကလေးနှစ်ဦးလည်း ဆေးကုသမှုခံယူရန် ပြင်ဆင်နေစဉ် ညပိုင်း၌ သေဆုံးခဲ့ကြောင်း အဆိုပါနေရာသို့ သွားရောက်ကာ ကူညီကယ်ဆယ်ရေးလုပ်ပေးနေသူ ဒေသခံ အမျိုးသားက ဆိုသည်။

ထိခိုက်ဒဏ်ရာရသူ ၁၀ ဦးကျော်အနက် ခြေထောက်ကြွက်သားများ ပြတ်ထွက်သွားသည့် အသက် ရှစ်နှစ်အရွယ် ကလေးတစ်ဦး၊ ညာဘက်ခြေလေးချောင်းနှင့် ခြေဖဝါးတစ်ဝက်နီးပါး ပြတ်ထွက်သွားသည့် အမျိုးသမီးတစ်ဦး အပါအဝင် လေးဦးမှာ ဒဏ်ရာပြင်းထန်သည်ဟု ဆိုသည်။ 

“ပထမခေါက်မှာတင် တော်တော်ထိတယ် ပြောရမယ်ဗျ။ ထိခိုက်မှုတွေက စက်ကလေးနဲ့ ပစ်တာမျိုးဆိုရင် ပေါက်ထွက်တာမျိုးတွေ ဖြစ်ကြမှာဗျ။ အခုက အဲ့လိုမျိုးမဟုတ်ဘဲနဲ့ ဗုံးသီးစမှန်တဲ့ အနေအထားမျိုးတွေချည်း တွေ့ရတယ်။ အားလုံးက စုတ်ပြတ်သတ်သွားတဲ့အနေအထားမျိုးတွေ တွေ့ရတယ်။ ထုတ်ချင်းပေါက်တာမျိုး မဟုတ်ဘဲနဲ့” ဟု အထက်ပါ အမျိုးသားက ပြောသည်။ 

ကျေးရွာစာသင်ကျောင်း အနောက်ဘက်ရှိ ဘောလုံးကွင်းအနီးတစ်ဝိုက်ကို ဗုံးသုံးလုံး ကြဲခဲ့ခြင်းဖြစ်ကြောင်း အသက် ၄၀ ဝန်းကျင်အရွယ် အထက်ပါအမျိုးသားက ပြောသည်။ 

“ပေါင် ၅၀၀ ရှိတဲ့ ဗုံးသီးသုံးလုံး ချထားခဲ့ပါတယ်။ စာသင်ကျောင်းရဲ့ အ‌နောက်ဘက် ဘောလုံးကွင်းတောင်ဘက် ရွာအစပ်မှာ ချထားခဲ့ပါတယ်”

ဘောလုံးကွင်းအစပ် မြေပြင်တွင် အနက်တစ်ပေမှ သုံးပေခန့်ရှိ ကျင်းများ ဖြစ်ပေါ်ခဲ့ကာ နေအိမ် ၂၀ ခန့် ပျက်စီးသည့်အပြင် နွားတချို့ သေဆုံးသည်ဟုလည်း သိရသည်။

“ရွာက လူတွေ ပေါက်ပြား၊ ဂေါ်ပြားတွေ ယူပြီး မြေကျင်းတူးကြဖို့ လုပ်နေတဲ့အချိန် ရောက်သွားပါတယ်။ ငိုယိုနေတဲ့ ပြည်သူတွေအစ ကြားရပါတယ်။ ဖြစ်တဲ့နေရာရောက်တော့ နွားတွေ သေတဲ့ဟာတွေ၊ မသေမရှင်ဖြစ်နေတဲ့ နွားကို တွေ့ရပါတယ်။ အဲ့ဒီနွားကလည်း သေသွားပါတယ်။ အလောင်းတွေကို သင်္ဂြိုဟ်ဖို့ လုပ်ကိုင်နေကြတာ တွေ့ရပါတယ်” ဟု လေကြောင်းတိုက်ခိုက်မှုအပြီး နာရီဝက်ခန့်အကြာတွင် မြင်တွေ့ရပုံကို အထက်ပါ အမျိုးသားက ပြောသည်။ 

မင်းကင်းမြို့နယ်အတွင်း တော်လှန်ရေးလှုပ်ရှားမှု အားကောင်းရာနေရာဖြစ်သည့် တောင်တွင်းချောင်ဒေသမှ ပိက္ခရားရွာသည် လယ်ယာစိုက်ပျိုးရေး အဓိကလုပ်ကိုင်ရာ ကျေးရွာဖြစ်ပြီး အိမ်ခြေ ၁၂၀ ခန့်သာ ရှိသည်။

မြေပြင်တွင် တိုက်ပွဲဖြစ်ပွားခြင်းမရှိဘဲ ရုတ်တရက် လေကြောင်းတိုက်ခိုက်ခြင်းဖြစ်ရာ ရှောင်တိမ်းချိန်မရသည့်အတွက် ထိခိုက်သေဆုံးမှုများရခြင်းဖြစ်သည်ဟု ဒေသခံများက ယူဆသည်။ 

လေကြောင်းအားပြုနေသော စစ်ကောင်စီတပ်က ပြီးခဲ့သည့်လကလည်း ကန့်ဘလူမြို့နယ်၊ ပဇီကြီးကျေးရွာကို လေယာဉ်ဖြင့် ပစ်ခတ်တိုက်ခိုက်မှုကြောင့် ကလေးငယ်များ အပါအဝင် အရပ်သား ၁၇၀ နီးပါး သေဆုံးခဲ့ရသည်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီ လိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)