အာရက္ခတပ်တော် AA သိမ်းပိုက်၊ ထိန်းချုပ်ထားတဲ့ ရခိုင်ပြည်နယ်မြောက်ပိုင်း၊ ကျောက်တော်မြို့နယ်ထဲက ကိုယ်ပိုင်အထက်တန်းကျောင်းတစ်ခုကို စက်တင်ဘာလ ၁၂ရက် မနက် ၁နာရီကျော်မှာ စစ်တပ်က ဗုံးကြဲတာကြောင့် ကျောင်းသား၊ ကျောင်းသူအများစု သေဆုံးပြီး၊ သေဆုံးသူအရေအတွက်ဟာ ၂၂ယောက်အထိ ရှိလာပါတယ်။
လူအများအိပ်မောကျနေချိန်မှာ ကြဲချခဲ့တဲ့ စစ်တပ်ရဲ့ ဗုံး ၂လုံးဟာ ကျောက်တော်မြို့နယ်၊ သရက်တစ်ပင်ကျေးရွာက ပညာပန်းခင်း ကိုယ်ပိုင်အထက်တန်းကျောင်းကို ကျရောက်ပေါက်ကွဲခဲ့တာပါ။
သေဆုံး၊ ဒဏ်ရာရသူတွေထဲမှာ ၁၁တန်း၊ ၁၂တန်းအရွယ် ကျောင်းသား၊ ကျောင်းသူအများစု ပါဝင်ပါတယ်။ စက်တင်ဘာလ ၁၂ရက်နေ့၊ မွန်းလွဲပိုင်းအထိ သေဆုံးသူ ၂၂ဦးနဲ့ ဒဏ်ရာရသူ ၂၆ဦးရှိပြီး သေဆုံးသူအရေအတွက် ထပ်တိုးနိုင်သေးတယ်လို့ သိရပါတယ်။
ဒီတိုက်ခိုက်မှုနဲ့ပတ်သက်လို့ AA ရဲ့ တုံ့ပြန်ချက်ကိုလည်း ဒီရုပ်သံမှာ ကြည့်ရှုနိုင်ပါတယ်။
