په خوست کې د طالبانو د والي دفتر اعلان کړی چې سبا (سېشنبه، ۱۱ د لیندۍ) د دې ولایت په لوبغالي کې پر یوه تن د اعدام حکم عملي کېږي.
په خوست کې د طالبانو د والي ویاند مستغفر ګربز ویلي چې دا حکم به سبا سهار شاوخوا لس بجې عملي شي.
ده په خوست کې د طالبانو له سیمهییزو چارواکو او خلګو غوښتي چې د حکم د عملي کېدو ځای ته دې وسلې او کېمره لرونکي ټلیفونونه نه ور وړي.
د طالبانو د والي ویاند ویلي چې کوم کس اعدامېږي، نوموړی د دې ولایت په علي شېر ولسوالۍ کې په یوه دردناکه پېښه کې پړ بلل شوی.
پر افغانستان د طالبانو تر واکمنېدو وروسته دا د دې ډلې دوولسم اعدام چې په عام محضر کې یې ترسره کوي.
دې ډلې تر دې وړاندې په فراه، لغمان، جوزجان، بادغیس او نیمروز کې یوولس علني اعدامونه ترسره کړي.
د بشري حقونو ډلې د طالبانو پر علني سزاوو سختې نیوکې کوي او علني او بدني مجازات د انساني کرامت سپکاوی ګڼي.
