اطلاعات روز: د افغانستان په چارو کې د ملګرو ملتونو د بشري حقونو ځانګړي راپورچي ریچارډ بېنټ په خوست کې د یو کس علني اعدام ته په غبرګون کې ویلي، چې عام محضر کې اعدام ظالمانه، غیر انساني او غیر معمولي سزا ده، د نړیوالو قوانینو خلاف عمل دی او باید ودرول شي.
طالبانو اعلان کړی، چې نن (سې شنبه، ۱۱ د لیندۍ) به د خوست په لوبغالي کې یو کس عام محضر کې اعدام شي.
دې ډلې له خلکو غوښتي چې د اعدام په مراسمو کې ګډون وکړي.
خوست کې د طالبانو د والي ویاند ویلي، هغه کس به اعدام شي، چې د دې ولایت د عليشېرو په ولسوالۍ کې په یوه دردناکه پېښه کې مجرم پېژندل شوی دی.
دا دولسم کس دی چې طالبان یې د افغانستان د کنټرول له ترلاسه کولو راهیسې عام محضر کې اعداموي.
دې ډلې تر دې مخکې په فراه، لغمان، غزني، جوزجان، بادغیس او نیمروز ولایتونو کې ۱۱ کسان اعدام کړي دي.
