اطلاعات روز: د زده کړو د حقونو فعال او د طالبانو پخواني بندي مطیعالله ویسا «شیخ تمیم بن حمد آل ثاني» د فساد ضد جایزه وګټله.
د فساد پر ضد د مبارزې په برخه کې د «شیخ تمیم بن حمد آل ثاني» د نهم پړاو نړیوالو جایزو (اې سي اې) د ورکړې مراسم د یکشنبې په ورځ د قطر په پلازمېنه دوحه کې د قطر د امیر په حضور کې ترسره شول.
مطیعالله ویسا د دې پروګرام «د ځوانانو د خلاقیت او مشارکت» جایزې ګټونکی شو.
ویسا زدهکړو ته د لاسرسي په برخه کې په ځانګړي ډول د نجونو لپاره فعالیت کوي او د طالبانو له واکمنېدو وروسته یې هم د نجونو د زدهکړو د حق په ملاتړ کمپاینونه کړي دي.
ویسا د ۱۴۰۲ کال په لومړیو کې د طالبانو لخوا ونیول شو او د دې ډلې په زندان کې له ۲۰۰ ورځو څخه ډیر وخت تیرولو وروسته خوشې شو.
