اطلاعات روز: فراه کې ځايي سرچينې وایي، چې په دې ولايت کې د دوو کورنيو ترمنځ خپلمنځي شخړه کې څلور کسان وژل شوي او ۵ نور ټپيان دي.
یوې سرچینې وویل، چې دغه خپلمنځي شخړه تېره ورځ (سې شنبه، ۲ د مرغومي) ناوخته د فراه ښار اړوند «کارېز جلال» سیمه کې رامنځته شوې.
سرچينه زیاتوي، چې د دوه کورنيو ترمنځ لفظي شخړه په وسله واله نښته بدله شوې او پر مهال يې ۴ کسان په ډزو وژل شوي او ۵ ټپيان دي.
د سرچينې په خبره، چې په ياده نښته کې د یوه لوري يو کس وژل شوی او دوه ټپیان دي لو د بل لوري بیا ۳ تنه وژل شوي او ۳ ټپيان دي.
په ورته مهال د فراه امنيې قومندانۍ هم دغه پيښه تاييد کړي او زياته کړې یې ده، چې دغه نښته د خيښۍ او دوستۍ د يوې ستونزې له امله رامنځته شوې ده.
طالبانو ویلي، چې په دې نښته کې ښکيل دوه کسان نيول شوي دي.
د هیواد په بېلابېلو سیمو کې د ناسمو دودونو، بې کارۍ او اقتصادي ستونزو له کبله ډیر کله وړې شخړې په لویو دښمنیو بدلیږي او کلونه کلونه دوام کوي.
