د امریکا ولسمشر ډونالډ ټرمپ اعلان کړی چې واشنګټن به له اسراییلو سره د امنیتي مرستو لس کلن تړون پای ته ورسوي.
د دغه تړون له مخې، اسراییلو هر کال له امریکا څخه ۳.۸ میلیارد ډالره مرسته ترلاسه کوله. دغه مرستې په ۲۰۱۹ کال کې پیل شوې وې او د تړون موده یې تر ۲۰۲۸ کال پورې ټاکل شوې وه.
د فرانسې خبري اژانس د راپور له مخې، ټرمپ ویلي چې اسراییل هم د دغو مرستو له پای ته رسولو سره موافق دی.
هغه له «فاکس اېنډ فرېنډز» خبري خپرونې سره په مرکه کې ویلي: «که اسراییل مرستې ته اړتیا ولري، موږ به ورسره مرسته وکړو.»
نوموړي زیاته کړې چې د اسراییلو له لومړي وزیر بنیامین نتانیاهو سره یې د دغو مرستو د بندولو په اړه هوکړې ته رسېدلی دی.
ټرمپ ویلي: «اسراییل زموږ لومړی متحد دی؛ موږ له بل هر هېواد څخه زیاتې مرستې ورسره کړې دي او اوس دغه هېواد نور دغو مرستو ته اړتیا نه لري. که اړتیا یې لرلای، ما به ویلي وای چې مرستې دې دوام وکړي.»
ټرمپ د خپلې پرېکړې د دلیل په اړه د امریکا د ډیموکرات ګوند د چپاړخي نوماند عبدالسید هغو نیوکو ته اشاره کړې چې د امریکا د سنا مجلس لپاره په ټاکنیزه سیالۍ کې یې مطرح کړې دي. نوموړي د سېشنبې ورځې په منځمهالو ټاکنو کې د خلکو له عمومي نارضایتۍ او د اسراییلو ضد احساساتو څخه ګټه اخیستې ده.
ټرمپ په فاکس ټلوېزیون کې د امریکا له خوا اسراییلو ته د مرستو په اړه ویلي: «ولې باید د عبدالسید په څېر د لېونیانو له امله تر نیوکو لاندې راشو، په داسې حال کې چې اسراییل دغو مرستو ته اړتیا نه لري؟»
