Məmur övladları neft-qaz milyonları ilə Yunanıstanın gündəmində! Təkcə cangüdənlərinə 300 000 manat xərcləyiblər
Yunan mətbuatı azərbaycanlı məmur övladlarının 2 milyon avroluq istirahəti haqqında yazmağa davam edir. Mənbənin xəbərinə görə Bakıdakı neft-qaz şirkətlərindən birində vəzifə sahibi olan şəxslərin övladları Mikonos adasında 19 günlük istirahətə ağılalmaz məbləğdə pul xərcləyiblər. Tanınmış ictimai fəal Bəxtiyar Hacıyevin FB səhifəsində paylaşdığı həmin məbləğin sistemləşdirilmiş siyahısına göz atanda adamın ağlı başından çıxır. Görünür, ölkədəki özbaşınalıqdan yararlanıb yığdığı milyardlarla harınlayan neft baronlarının balaları artıq ərəb şahzadələri ilə bəhsə giriblər.
- Ümumi istirahət üçün xərc: 2 milyon avro (3 milyon 750 min manat)
- Həmin qrupun keçən ilki istirahət büdcəsi: 3 milyon avro (5 600 000 manat)
- 4 saatda barda verdikləri hesab: 65000 avro (122 000 manat)
- Cangüdənlərinə xərclədikləri: 159600 avro (300 000 manat)
- Günlük villa icarəsi: 25 000 avro (47000 manat)
- Günlük nağd pul istifadəsi: 50000 avro (94 000 manat)
“Bu uşaqları tanıyırsınızsa, onlara deyin ki, ataları ilə danışsınlar və birdəfəlik Yunanıstanı satın alsınlar, İbizanı da 99 illik icarəyə götürsünlər. Belə olmaz, gündə bir xəbər sızır, uşaqların təvazökar istirahətlərini xarici qara qüvvələrin mənfur uzantıları olan qaragüruh facebook deyingənləri burnundan gətirir. Son 2 gündə Haqqin.az SOCAR rəhbərini müdafiə edən 2 geniş yazı yayıb. Yazırlar ki, bu uşaqlar SOCAR rəhbərliyinin uşaqları deyil. Xub! Bəs, İbiza polisinə məxsus olan, 2 milyonluq saatla bağlı arayışı yazanda və Bloomberg kimi nüfuzlu KİV bunu təsdiq edəndə niyə bir söz yazmadılar?” –deyə B. Hacıyev paylaşımında yazır.
Haqqin.az.-ın SOCAR prezidentini haqsız və gülməli müdafiəsi
Əslində, bu cürə müdafiə İlham Əliyevi hörmətdən salır. Bu arada hakimiyyətin əsas ruporlarından biri olan haqqin.az. saytının SOCAR prezidentini müdafiə edən yazısına da nəzər saldıq. Sayt yazır ki, uzun illərdir dövlət büdcəsinin və ölkədə ixracın önəmli hissəsini təmin edən şirkəti bu qədər tənqid etmək bədxahlıqdır. Yazar SOCAR prezidentinin xeyli zamandır gündəmi zəbt edən istefa məsələsinə də toxunub. O bildirir ki, şirkət rəhbərlərinin dəyişməsi bir qanunauyğunluqdur. Amma bir rəhbər işində yol verdiyi ciddi nöqsanlara və ya şirkətin imicinə təsir edən ciddi məsələlərə görə işdən azad olunursa, SOCAR-ın belə bir problemi yoxdur. Yəni şirkət rəhbəri də aydan arı, sudan durudur. Məqalədə son illər dünyanın hər yerindən şirkətin fəaliyyəti haqqında xoş xəbərlər gəldiyi vurğulanır. Müəllif yazır ki, sübut üçün elə bu “istefa” xəbəri yayıldığı gün SOCAR-ın Türkiyədən gələn uğur göstəricilərini sadalamaq kifayət edər. Sayt şirkətin son göstəriciləri haqqında geniş məlumat verərək, bütün bunları Rövnəq Abdullayevin gərgin zəhmətinin bəhrəsi kimi qələmə verib.
Biz həmin məqaləni oxuduğumuz arada Bakının yaxınlığında yerləşən Qobu qəsəbəsinin sakinləri etiraz aksiyası keçirirdi. Sakinlər deyir ki, 6 ildir qaz əvəzinə odun işlədirlər. “Qaz ölkəsində qazsız yaşamaq nə deməkdir? Etiraz səsimiz çıxan kimi polisi tökürlər bura, nə edək, gedək xarici səfirliklərdən sığınacaq istəyək?” Sayta nəzər saldım və təəssüf ki, bu insanların etiraz aksiyası haqqında heç bir xəbər getmədiyini gördüm…
Rövnəq Abdullayevin istefasını zəruri edən yüz bir səbəb
Əmin olun ki, yaxın zamanda Mikonosdakı harınların da SOCAR-da çalışanların övladları olduğu üzə çıxacaq. Bunlar oğurluq üstündə tutulanda belə, adamın gözünün içinə dirənməyə öyrəşiblər. Xatırlayırsınız, Rövnəq Abdullayevin oğlu İspaniyanın İbiza çimərliyində 2 milyonluq saatı oğurladanda da, xətanı dolandırıb başqasının boynuna qoymaq istəyirdilər. haqqin.az. saytı da nahaq zəhmət çəkib özünü yorur. Rövnəq Abdullayevin kim olduğunu ölkədə bilməyən yoxdur. Qanunların azacıq işlək olduğu ölkədə onu oğlu Rəşadın İbiza hoqqabazlığına görə çoxdan istefaya göndərmiş və məhkəmə qarşısına çıxarmışdılar. Guya o məqaləni yazan müəllif bilmir ki, Rəşad kimilərin kef-damağa xərclədiyi oğurluq milyonlar bu gün Qobuda zülm çəkən sakinlərə çatacaq qazın pullarıdır? SOCAR-ın uğurları belə fontan vurursa, bəs o pullar hara gedir görəsən? Hər şey gözəldirsə, şirkət o 11 milyard borcu hardan yığıb üstünə? Boşuna özünüz yormayın, Rövnəq Abdullayevin istefasını zəruri edən bir yox, yüz bir səbəb var ortada…
Bir sözlə, Rövnəq Abdullayevin mandatı təhvil verilməlidir və sistemdə reformalar başlamalıdır.