Ölkə başçısı məlum müşavirəsindən sonra Saleh Məmmədovu qəbul etməklə nəyin mesajını verir?
Ölkə başçısı İlham Əliyev bir neçə gün qabaq hakimiyyət daxilində gedən gizli didişmələrdən danışıb, vəziyyətin dözülməz olduğunu dedi. Açıq bildirdi ki, iqtidar daxilində islahatlar əleyhinə olan qruplar onu işləməyə qoymurlar. İqtidar daxilində qarşıdurma qruplarının olması yeni söhbət deyil. Amma maraqlı odur ki, bunu artıq prezident özü də etiraf etmək məcburiyyətində qalıb. Başqa maraqlı bir məsələ də odur ki, ölkə başçısı elə bu mesajın ardınca Avtomobil Yolları Dövlət Agentliyinin sədri Saleh Məmmədovu qəbul edib. Prezidentin onunla uzun bir söhbəti olub və söhbətin mətni mətbuatda yayılıb.
S. Məmmədov bu komandanın ən korrupsiyalaşmış üzvlərindən sayılır. Ölkə başçısının verdiyi mesajın ardınca həmən onu qəbul etməsi də adamın nitqini qurudur. İslahatı Məmmədov kimi tiplərlə etmək istəyirsinizsə, vay bu xalqın halına! Ölkə başçısı ölkədə yol tikintisinin inkişafından razı olduğunu bildirib, bu sahədə işlərin daha irəliləyəcəyini deyib. S. Məmmədov da burğulayıb ki, 2019-cu ilin investisiya proqramında yol tikintisi üçün kifayət qədər vəsait nəzərdə tutulub. Cari ilin doqquz ayı ərzində ölkədə artıq 903,5 kilometr uzunluğunda avtomobil yolları çəkilib və istismara verilib. Onun çıxışına qulaq asanda bir türk dostumun “yolsuzlar yol çəkməyi sevər” deyiminı xatırladım. Son 20 ildə yol tikintisi Azərbaycan büdcəsindən milyonların mənimsənilməsi üçün ən əlverişli sahə olub. Qısa internet araşdırması aparsanız, özünüz də bunun şahidi olarsınız.
Bölgələrə yol tikintisinə ayrılan pullar toza dönür
Bu illər ərzində yol tikintisinə milyardlarla vəsait ayrılıb və xərclənib. Amma ölkədə hələ də bərbad gündə olan yüzlərlə yol sahələri qalır. Bu baxımdan regionlardakı vəziyyət daha acınacaqlı və dözülməzdir. Göyün üzünə bulud gələn kimi keçilməz vəziyyətə düşən həmin qəsəbə və kənd yollarını sosial şəbəkə paylaşımlarından siz də görmüsünüz. Araşdırma aparsaq, çevrəmizdəki hər üç adamdan biri yaşadığı ərazinin yollarından şikayətçi olacaq. Fakt üçün internetdə qarşımıza çıxan 2 rayonun problemini diqqətinizə çatdırırıq. Yaxın tarixə aid birinci xəbərdə deyilir ki, Azərbaycan Avtomobil Yolları Dövlət Agentliyi indiyə qədər Ağcabədidə bir qarış yol çəkməyib. Sakinlər sonuncu dəfə asfaltı sovet dövründə görüblər. Nə icra başçısı Şahin Məmmədovun, nə də Agentliyi sədri Saleh Məmmədovun fikrindən bu yolları düzəltmək keçib. Büdcədən ayrılan vəsaitlər Ağcabədi Yol İstismar İdarəsi rəisi Vidadi Hüseynov tərəfindən mənimsənilib. Onun oğluna məxsus şirkəti – “Fərid Ağcabədi” MMC tenderlərin “şah”ı elan olunub. Nəticədə bahalı avtomobil kolleksiyası, yanacaqdoldurma məntəqəsi, evləri, asfalt zavodu belə var. Xəbərdə deyilir ki, V. Hüseynovun biznesindən S.Məmmədov da xəbərdardır. Milyonçu yol idarəsi müdiri şefin “haqqını” vaxtlı-vaxtında çatdırır.
Başqa bir fakt da Baş Prokurorluğun məlumatına istinadən yayılıb. Xəbərə görə Kürdəmirdə avtomobil yolunun tikintisi zamanı ümumilikdə 2 milyon 161 min manat dəyərində işlər yerinə yetirilmədən rəsmi sənədlərə yalan məlumatlar daxil edib rəsmiləşdiriblər. Dövlət büdcəsindən 143 min manat məbləğində vəsaitin mənimsənilməsi aşkarlandığına görə iki məsul şəxs həbs edilib. Bu siyahını xeyli uzatmaq da olar. Amma nə fərq edər, bölgələrin vəziyyəti, demək olar ki, bir-biri ilə tam bənzərdir. İlham Əliyev isə hər il yol çəkilişi adına büdcədən milyonlar mənimsəyən bir qurumun rəhbəri ilə oturub söhbətləşməklə islahat görüntüsü yaradır. Həqiqətdə isə, mesaj vermiş olur ki, korrupsiya çiçəklənməkdə davam edəcək. Deyəsən ölkə başçısı unudur ki, istismar müddəti bitmiş qatarla yol getmək olmaz. O, məlum komandanı çoxdan istifadədən çıxarıb, yeniləməli idi. Bunu bacarmadığına görə, indi onun özü sükanın arxasından düşüb səssizcə kənara çəkilməlidir.