Bloknotsuz giriş qadağandır!
Deyilənə görə, vitse-prezident Mehriban Əliyeva prezidentlik vəzifəsi üçün kiçik məşqlərə başlayıb. Bu məqsədlə o, ofisində xüsusi qaydalar qoyub və onların hamı üçün hökm qüvvəsində olduğunu elan edib. Xanımın gün ərzində siyasi məsələlərə yalnız iki saat ayırdığını nəzərə alsaq, məşqin məlum komanda üçün xeyli çətinliklər yarada biləcəyi ehtimalını da ortaya çıxarır. Yəni bu müddət ərzində hər bir köməkçi görülən işlərin hesabatını vitse-diktatora təqdim edib, tapşırıqlarını alıb keçməlidirlər iş arxasınca. M. Əliyevanın iş ofisində qoyduğu əsas qaydaya görə onun hüzuruna təşrif buyuran hər kəsin əlində qələm və bloknot olmalıdır. O, özünün görməli olduğu bütün işləri köməkçilər arasında bölüşdürdüyünə görə, hər şeyin detallı hesabatını da onlardan tələb edir. İş təkcə tələb etməklə də bitmir. Xüsusi görüşlərdə, tədbirlərdə, çıxışlarda bəzi önəmli şeyləri bilməyə ehtiyac var, onları da detallı şəkildə işləyib masanın üstünə qoymaq komandanın üzərinə düşür. Onun özü, faktiki olaraq, öz vəzifənə aid heç bir işlə məşğul olmur. Xanım Əliyevanın ofisinə 4 xarici diplomlu köməkçi cəlb etməsi də təsadüfi deyil. Ümumiyyətlə, diktator xanımın bir də xarici diplom tutqusu var. Qərb dəyərlərindən üz çevirib Kremlə üz tutmağına baxmayın, komandası üçün seçdiyi kadrların Amerika və ya Avropa diplomlu olmasına xüsusi önəm verir. Belə olan halda sual yaranır, onda niyə siyasəti Şimala doğru yürüdürsünüz?!
Ofisində tətbiq etdiyi qaydalardan biri də elə budur. Şübhəsiz, onun özü də yaxşı anlayır ki, dostluq etdiyi Kremlin dünyaya primitiv baxışları ilə çox uzağa getmək olmaz. Ona görə, xanım möhkəmləndirməkdə olduğu monarxiya sisteminin qanunvericilik bazasını hazırlamağı belə qərb təhsilli adamlara həvalə edib. Dünyanın ən ideal demokratiya nümunələrini yaratmış ölkə universitetlərdən məzun olanlar bir əcaib diktaturanın xidmətində dayanacaqlar. Tarixin ironiyası bu olsun gərək!
Mehriban Əliyevanın dünya şahzadələri ilə nədən bəhsə girdiyini ötənlərdə yazmışdıq. Birinci ledinin də monarxiya sistemlərinə xüsusi vurğunluğu var. Məlumdur ki, monarxiya sisteminin başında dayananların bir ortaq nöqtəsi olur – hər kəsdən güclü və üstün görünmək hirsi! Bu iddia və təkəbbür o dərəcədə böyükdür ki, onlar həqiqi mənada özlərini hər kəsdən yüksək tutur, hər kəsi özlərinə borclu sayır, hər kəsin əllərini, ətəklərini öpməli olduqlarını düşünürlər. Bir anlıq saraylarda əyanların kral və kraliçaların hüzuruna necə çıxdığını gözünüzün önünə gətirin. Əgər o sistemin bir fərdisinizsə, bəlli ritualları icra etməyə borclusunuz. Saraylarda hər şeyi başda oturanlar diktə edir. Qaydalar müqəddəs və dəyişməzdir, kimsə ondan kənara çıxa bilməz. Bəli, bənzər sistemi idarə edənlərin ən zəif nöqtəsi zəif görünməmək təkəbbürüdür. Elə bu çevrədən olan xanımların moda və lüks düşkünlüyü, hamıdan gözəl görünmək iddiası da bundan irəli gəlir.
Sizcə, vitse-prezident xanımın yarım milyardlıq təyyarədə uçmaq istəyi, dünyanın ifrat lüks, brend, “şoppinq” dəlisi olan moda ikonlarını örnək alması, plastik əməliyyatlara böyük pullar xərcləməsi, özünü mələk simasında göstərmək üçün dünya ölkələrində keçirdiyi layihələrə milyonlar ayırması nəyə xidmət edir? Bəli, hər kəsdən öndə olmaq iddiasına! Monarxiya qaydalarına vurğunluqla hakimiyyət, güc, gözəllik, seçilmək hirsi hər şeydən önə keçir. Yoxsul xalqın, bataqlığa salınmış ölkənin milyardları hesabına birinci olmaq təkəbbürü birləşdirir bu adamları! Bütün totalitar sistemlərin oturuşmuş qaydası belədir və o qaydalardan kənara çıxmaq qəti qadağandır.