Elə bir monopoliya tələsindəyik ki, pendiri kimin tələsinə kimin qoyduğunu ayırd etmək zor. Onların hamısı eyni əhatə dairəsində, eyni adamın xidmətində çalışır. Hamısı vahid inhisar şəbəkəsinin vintləridir və biz də kimin hansı yerdə dayandığını dəqiqləşdirmək üçün onları çeşidləyib qruplara böldük. Ən bərk gedən inhisarçılar arasından təyyarə sürəti ilə uçan “ilin monopolisti”ni seçdik, Cahangir Əsgərovu. Dövlət büdcəsindən prezident ailəsinə yarım milyardlıq təyyarə almaqla ilə damğa vuran “AZAL” Cahangiri. Yaxın çevrəsində ona, sadəcə, Canik deyirlər. Əliyevlər ailəsi ilə yaxınlığına və şərikliyinə görə, on illərdir Canikə dəyib – toxunan yoxdur. Adam ölkənin milyardları ilə özünə qanad taxıb yer kürəsini dörd dolaşır. Arada ürəyinə yatan ekzotik ölkələrdə enib günlərlə həyatın dadını çıxarır. Onun əyləncə mərkəzlərində yaşına yaraşmayan düşüklüklə tvist oynayıb, əcnəbi müğənnilərlə əyləndiyini sosial şəbəkələrdə görmüsünüz. Canikin ailə üzvləri də dünyanın bu başından vurub, o başından çıxan macərasevərlər kateqoriyasına daxildir. Xatırlayırsınızsa, illər öncə Moskvada terrorçuların ələ keçirdiyi gecə əyləncə mərkəzində girov saxlananların arasında onun ailə üzvlərinin də olduğu xəbəri yayılmışdı. Lakin Canik dostlar vasitəsilə ailəsini azad etməyi bacarıb. O, zaman məsələyə hətta Heydər Əliyev qarışmışdır.
Əsgərovun “ilin monopolisti” nominasiyasını nədən haqq etdiyini bilirsiniz. Ölkənin ən böyük inhisarçı şirkətlərindən olan “AZAL” illərdir hava məkanını işğal edib, ölkəyə kimsəni buraxmır. Şirkət büdcədən ən çox dotasiya alsa da, regionda ən baha qiymətə bilet satsa da, davamlı olaraq ziyanla işlədiyini bəyan edib göz yaşı axıdır. O, ölkədə fəaliyyət göstərən bütün xarici hava yolları şirkətlərini bir-bir sıradan çıxarıb. Şirkət 4 il əvvəl Macarıstanın “WizzAir” və Türkiyənin “Pegasus” şirkətinin Azərbaycandakı fəaliyyətinin dayandırılmasına nail oldu. Həmin hava yolları şirkətləri biletlərin ucuzluğuna görə populyar idi. Sonradan “WizzAir” aviaşirkətinin ölkədə fəaliyyəti təkrar bərpa edilsə də, hazırda şirkət ancaq Bakıdan Budapeştdə uçuşlar həyata keçirir, həm də baha qiymətə. Əsgərov dayanmadan şirkət üçün bahalı təyyarələr almaqda davam edir. Xatırlayırsınızsa, üç il əvvəl “Boeing” şirkətinin rəhbərləri ilə görüşdə 2018-2020-ci illərdə 10 ədəd Boeing 737 MAX təyyarəsinin tədarükü məsələsi müzakirə olunmuşdu. İlin-günün bu ağır vaxtında ölkə büdcəsini belə bahalı təyyarələrə yönəltmək hansı zərurətdən doğur görəsən? 2016-cı ildə Hesablama Palatası milyardlarla dollar yeyinti faktına görə şirkətdə audit yoxlamalar aparırdı. Sonra yoxlamaların nəticələri ört-basdır edilib getdi, səbəblərini özünüz bilirsiniz.
Caniki hakim ailəyə sirli tellər bağlayır. Bununla bağlı ortalıqda qəribə söhbətlər dolaşır. İşin bu qaranlıq tərəfinin detallarını bilmirik, amma ailə ilə onun biznes ortağı olduğu gün kimi açıq-aydın ortada. Sizcə, Əliyevlər cütlüyünün xeyir-duasını almadan Canik 589 milyon 730 min manata “Boing”in lüks B777-200 (LR) təyyarəsi almağa cəsarət edərdimi? Özü də dövlət büdcəsi hesabına. Yazmışdıq, 2018-ci ilin yekunlarına görə, yerli aviaşirkətlər (“AZAL”, “BUTA”) ümumilikdə 208 milyon 233 min manat zərərlə işləyib. Ortaya maraqlı sual çıxır-gündəlik uçuşlardan bu qədər qazanc götürən şirkətin milyonları hara gedir? Cavabını hamı bilir, macəraçı Əsgərov arxasını hakim ailəyə söykəyib, göylərdə qanad çalır. Amma hər uçuşun bir enişi də var. Əsgərov çox böyük sürət götürüb, özünü qəfil qəza enişindən gözləməsi məsləhətdir.