Türklərin gözəl bir məsəli var – “öküz taxta çıxsa padşah olmaz, amma sarayı axıra çevirər.”
Tam da bizim hakimiyyət üçün deyilib. Adamlar dövlətdən, dövlətçilikdən anlamayan marionetkaları başa çıxarıb ölkəni axıra çevirmədilərmi? Böyük vəzifələri kiçik adamlara tapşırıb siyasəti oyuncaq halına gətirmədilərmi? Kimini zor, kimini xoş çirkaba bulaşdırıb, özlərinə tay etmədilərmi? Atın qabağına ət, itin qabağına ot qoyub, məmləkəti baş-ayaq şəklə salmadılarmı? Axı o binəva fransız dili müəllimi Novruz Məmmədovun günahı nə idi ki, zorla siyasətə soxub adını iki paralıq etdiniz? Adam başından bəri daş atıb, başını tuturdu ki, böyük siyasət onluq deyil. Siz neylədiniz? Müəllimi götürüb ölkənin baş naziri qoydunuz. Fağırın nazirliyi də Yusif Sərracın şahlığına bənzədi. Müəllim zor-güc cəmi 1 il 6 gün otura bildi böyük kresloda. Adam diliylə demişdi axı, ondan baş nazir olmaz. “Cənab prezident çağırıb dedi ki, sənin Baş nazir olmağını təklif edirəm. Elə vəziyyətdə qaldım ki… Fikirləşdim, bu mümkün olan şey deyil! Cənab prezidentə dedim ki, Baş nazir olmağı mən bacarmaram. Mənim üçün bu çətin olar. Dedi ki, yox. Mənim bir neçə namizədim var, onlardan biri sənsən…” Novruz Məmmədov dediyi kimi, baş nazir ola bilmədi. Ən azı etirafında səmimi olduğunu isbat etmiş oldu. Onun tək yaddaqalan işi xalqın meşələrdən meyvə və giləmeyvə yığmasını qadağan edən qərarı oldu. O qərarı ki, xalqın arasında məsxərəyə çevrildi və İlham Əliyev tərəfindən də təsdiqlənmədi. Əcəb şou idi! Kimə, nəyə görə lazım idi, anlamadıq getdi.
Əslində, Novruz müəllimin nədən israrla o posta gətirilməsinin səbəbi çoxlarına bəlli idi. Baş nazir vəzifəsi ölkənin kilid postu olduğuna görə, orda çevik və dişli adamın oturması Əliyevlərə sərf etmir. İllər boyu həmin kresloda Artur Rəsizadə kimi mağmın birini oturdub öz bildiklərini ediblər. Onu əvəzləmək məsələsi məcburiyyətə çevriləndə isə, ailəyə sadiq birini tapmaq zərurəti yarandı. Novruz Məmmədov da o vəzifəyə yalnız həmin kriteriyaya cavab verdiyinə görə təyin edildi -ailəyə sonsuz sədaqətinə görə. Müəllim özü də etiraf etmişdi ki, Heydər Əliyevə olan sevgisinə görə nəvələrindən birinin adını Zərifə, birini də Heydər qoyub. Şübhəsiz ki, Azərbaycan gerçəkliyində baş nazir postunda kimin oturdulması heç nəyi dəyişmir. Totalitar sistemlərdə qərarı bir adam verir, yerdə qalan vəzifələr, sadəcə, sarayı rəngləndirmək üçündür. 72 yaşlı Məmmədov oktyabr ayında öz xoşuyla baş nazir vəzifəsindən getdi. Şübhəmiz yox ki, istefasına hamıdan çox özü sevinir. Yəqin həm də ona görə çox sevinir ki, adam nəhayət, aid olduğu yerə gəlib çıxıb. Baş nazir vəzifəsindən sonra müəllim Azərbaycan Dillər Universitetinin prorektoru təyin olunub. Nə deyək, bizə “vətənə, millətə xeyirli olsun.” Hər kəs öz yerində olanda, vətənə, millətə xeyirli olur.