Azərbaycan hakimiyyəti bütün işlərin rüşvətlə həll olunacağına inanan adamlardan formalaşıb. Zərərli vərdişdir və ölkə illərdir bu çirkin ənənənin ağrısını çəkir. Özü də təkcə ölkə daxilində deyil, beynəlxalq aləmdə də bu siyasətin fəsadlarını yaşayırıq. Bu primitiv düşüncənin nəticəsidir ki, hakimiyyətin böyük pullar xərcləyib şəbəkə qurduğu lobbiçilik fəaliyyəti də iflasa uğrayıb. Keçən il beynəlxalq qurumlarda “kürü diplomatiyası” və çirkli pulların yuyulması ilə bağlı aldığı zərbədən sonra, hakimiyyət guya diaspora işində dönüş yaratmaq qərarına gəldi. Əvvəlki sədri işdən uzaqlaşdırıb, yerinə ailənin yaxın dostu, keçmiş deputat Fuad Muradovu gətirdilər. Deyilənə görə, gənc komitə sədrinin üzərinə öhdəlik qoyulub ki, ölkə-ölkə dolaşıb bu qarışıq işləri qısa zamanda yoluna qoysun. Muradov da o vaxtdan biletini alıb dünya səyahətinə çıxıb. Uzaq ölkələrdə banket verib paylaşdığı şəkillərlə tez-tez qarşılaşsaq da, son iki ilə yaxın müddətdə konkret hansı uğurlara imza atdığını eşitməmişik. Belə görünür ki, heç eşitməyəcəyik də. Çünki bu hakimiyyətin lobbiçilik işinin təməlində çürüklük var. Adamlar anlamır ki, xalqın boğazından kəsilən milyonları bahalı banketlərə, əyləncələrə, hədiyyələrə xərcləməklə lobbiçilik işi alınmaz. Uzun illərdir Amerikadan Avropaya, Avropadan Rusiyaya qədər bütün diaspora rəhbərlərinin adı çirkli işlərin içindən çıxır. Məlum olur ki, adamlar illərlə ölkə adına dünyada faydalı iş aparmaq əvəzinə, kürü paylayıb hakimiyyətin təbliğatı ilə məşğul olublar. Korrupsioner komandanın bir üzvü olan Muradovun qabiliyyəti də, olsa-olsa, eləcə ölkələri gəzib bahalı banketlər verməyə çatacaq.
Əliyevlər hakimiyyəti 26 ildir ölkədə totalitar rejim qurub Azərbaycanı beynəlxalq dünyadan təcrid etdiyinin fərqində deyil. On illərdir diasporun əlində bayraq etdiyi Qarabağ həqiqətlərinin dünyaya çatdırılması yalanı da ortada. Bunu Amerika konqresmenlərinin DQR-ə vaxtaşırı səfərlərindən tutmuş, qondarma qurumun təmsilçiləri ilə konqresdə keçirilən görüşlərə qədər-hər şey sübuta yetirir. Bugünlərdə qondarma Artsax hakimiyyətinin, Dağlıq Qarabağın xarici işlər naziri ilə Konqresdə görüşlər keçirilib, dinləmələr təşkil edilib. Erməni lobbisi Qarabağı bizdən həmişəlik qoparmaq üçün dayanmadan iş aparır. Yaxın günlərdə Amerika konqresində New Jersey-dən olan təmsilçi Frank Pallonenin çıxışında Artsax ermənilərinin adını çəkməsi də təsadüfi deyildi. Azərbaycan tərəfi isə dərin yuxuda “ofşor”, “kürü”, “analoqsuz inkişaf”, “nida” sayıqlaya-sayıqlaya yatır. Xatırlayırsınızsa, Muradov təzə sədr təyin olunanda Rusiyadakı diaspora təşkilatlarımızdan birinin rəhbəri demişdi ki: “Bu gün Fuad Muradov kimi birisinin Diasporla İş üzrə Dövlət Komitəsinin sədri postuna təyin olunması heç də problemlərin həlli demək deyil. Fuad Muradov, bəlkə də, ən uğursuz kadrdır. Bu gün Rusiyada az qala bütün diaspora təşkilatları Kremlin diktəsi ilə hərəkət edir. Buna çarə qılmaq lazımdır. Hazırda aktiv görünən Fuad Muradov bir azdan problemlərin içində qeybə çəkiləcək. O, hazırda aktiv pioner kimidir. Hara desən, gedir, hara desən qaçır… Bir azdan isə barıtı qurtaracaq. Çünki əsl problemləri görəcək. Onda ayılacaq ki, axı bütün bunlar onun gücü imkanında deyil.” Doğrudan da, milyonları boşuna havaya sovurmaqla deyil, imici küllü-aləmdə bərbad olmuş bir hakimiyyətə Fuad Muradov neyləsin, bir başqası neyləsin? Əmin olun ki, onun fəaliyyəti də eləcə ziyafət masaları arxasında şəkil paylaşmaqdan uzağa getməyəcək. Yaxın zamanda deyilənlərə özünüz şahid olacaqsınız.